1پێدجەچێت كۆنگرێسی ئەمەریكا بە فەڕمی گوێی جۆلانی ڕابكێشن و بڵێن بوەستە ، قسەو باسەكانی ناو كۆنگرێس بە ڕونی ئەوە بوون كە جۆلانی و پێڕەكەی دەسبەرداری تیرۆری نێو دەوڵەتی بوونە، بەڵام لە نێو سوریا نا ، بەڵكو ئەم گوێڕاكێشانە جۆرێك لە رسوا بوونی تۆم باراكیشی بە دوادا بێت ، هەقە دیبلۆماسیەتی كوردی و ڕەوەندی كوردی لە دەرەوە داوای گۆڕینی بكەن ، باراك ئەگەر چی نوێنەرایەتی ئەمەریكا دەكات و لە بەر دڵانی ترەمپە ، بەڵام لە كێشەكاندا لایەنی ستەمكاری گرتوە.2لەم ڕۆژانە لە ماڵی دۆستێك بووم كە پێشتر پلەو پۆستی هەبوو برای شەهیدێك هاتبوو بۆ داوای پارەو بە ناوی شەهیدەكەوە سواڵی دەكرد ، هەقە دەزگای شەهیدانی لایەنە سیاسیەكان و وەزارەتی شەهیدان و ئەنفالكراوانی هەرێم بڕیاری ئەوە دەربكەن هەر كەسێك بە ناوی شەهیدەكەیەوە سواڵ بكات سزا بدرێت ، كەس و كاری شەهیدیش بگەیەننە ئاستێك لە دەرگای كەس نەدەن .3عەبیر سەهلانی عەرەبە خەڵكە ناسریەیە ، بە بەرگی كوردیەوە لە یەكێتی ئەوروپا داكۆكی لە ستەملێكراوانی كورد كرد ، تەنها عەبیر كەسی تر نا ، هەرچەند بە هەزاران عەبیر و عەگید لە نێو عەرەب و تورك و فارس هەن ، شەڕی ئازادی كورد دەكەن ، لێ‌ تەنها عەبیر بەسە بۆ ئەوەی كورد سوربێت لە سەر برایەتی گەلان و پێكەوە ژیانی ئاشتیانەی گەلان ، ئەوەش بزانن لە كۆی 12 هەزار شەهیدەكەی ڕۆژئاوا نزیك بە نیوەی عەرەبن.4ژان نۆیەڵ بارۆ وەزیری دەرەوەی فەڕەنساو ئەندامی بزاوتی دیموكراتی لە ڕۆژی ڕەشی كوردا مەردانە دەركەوت ، بەڵام هەر ئەم دەركەوتنە كەمە بۆ وڵاتێكی گەورەی وەك فەڕەنسا بەس نیە ، بە تایبەت فەڕەنسا دەبێت خاوەندارێتی لە كوردی ڕۆژئاوا بكات لەبەر ئەوەی فەڕەنسا لایەنێكی سەرەكی سایكس بیكۆو سێ‌ پارچە كردنی كوردستانەلە نێوان توركیاو عێراق و سوریادا ، ڕەنگە بە تەنگەوە هاتنی فەڕەنسا بۆ كوردستان بەشێكی گرنگی ئەركێكی ئاكاری و چاككردنەوەی شێواندنێكی دیرۆكی بێت.5هەقان فیدان نمونەی كوردی داڕزاوە ، كوردی پشتهەڵكردوو لە باوان و بوونە جاشی نەتەوەیەكی تر ، خۆ ئەگەر هاقان فیدان بەو پۆستەی ئێستەیەوە لە ناو دەوڵەتی توركیا دوو جار بیگوتایە دەبێت كێشەی كورد چارەسەر بكرێت و پێویستە كوردانی ڕۆژئاوا پارێزراو بن ، ڕەنگە ئێستا ئێمە بمانگوتایە دەی قەینا جاشی دەوڵەتە ئەوەتا جوامێریش دەنوێنێت ، بەڵام نەخێر لەوە دەچێت دایكە كوردە بەڕومەتەكەی لە بری شیری پاكی خۆی ، شیری چەقەڵی پێدابێت.

 لەتیف فاتیح فەرەج 

عەبیر سەهلانی و ژان نۆیەڵ بارۆ 

لە كاتێكا ئێمە هەموومان لە خەمی رۆژئاواو رۆژهەڵات و هەموو بستە خاكێكی ئەو نیشتمانە داگیرو دابەشكراوەی خۆمانداین ،لە كاتێكا كچە بە ڕومەت و ڕووسورەكانمان لە بری ماڵە باجێنە ناچاردەبن چەك هەڵبگرن بۆ پاراستنی شەرەف و كەرامەتیان لە تاریكیپەرستەكانی بیابان و دوای شەهید بوونیش لاشەكەیان ئازار دەدرێت ، لەو كاتەدا هەموو دەست لە سەر دڵین كە جاش و خائین و خۆ فرۆش لە ناومان ببڕێت ، خۆمان تەنیاو بێكەس دەبینین ، دوژمنەكانمان هەموو كارێك بۆ لەناودانمان دەكەن ، تەنانەت ئەوانەش كە سور بە سور دەزانن ئەوان خاك و نیشتمان و زمان و هونەرو جوانی ئێمەیان داگیر كردوە، نمونەی ئەحمەد داود ئۆغڵو كە گوایە خوێنەوارەكەیانە، دێت هەڕەشە دەكات و ئەو بەسێ‌ هۆزات و ئازایخوازان تاوانبار دەكات ، لەو كاتەدا لە نێو ئەو هەموو خەمەدا سەرقاڵی خوێندنەوەی كتێبێكی تازە چاپكراوی دكتۆر جەمال نەبەز بووم " الابجدیە الكوردیە اللاتینیەبین دعاتها ومعارزها "ئەم كتێبە ساڵی 2025 چاپكراوەو بریتیە لە كۆمەڵێك وتاری دكتۆر كە كاتی خۆی بە عەرەبی لە ڕۆژنامەی دەنگی كورد بڵاو كراوەتەوە. وتاری زنجیرە دوازدە توشی شۆكی كردم كە لە سەر كوردانی رۆژئاوایە ،دەڵێی مێژوو دووبارە دەبێتەوە، كتێبەكە داكۆكیە لەكوردو زمان و ڕێنووسی كوردی لەو بەشەدا باسی كوردانی ڕۆژئاوا دەكات ، باسی هەڵوێستی كوردان دەكات لە پشتگیری و بەتەنگەوە هاتنی عەرەب&nbsp;لە كێشەی ئەسكەندەرونە، ئەو دەنوسێت كورد داكۆكیان لە عەرەب كردو بە دوای مافی خۆیانەوە نەچوون ، وەك چۆن شێخ مەحمودی حەفیدیش لێرەوە بۆ داكۆكی لە عەرەب چووە شوعەیبەو دواتریش عەرەب بە كیمیا باران و ئەنفال چاكەی نەوەكانی شێخیان دایەوە،لە سوریاش دوای دەركردنی فەڕەنسیەكان كە لانی كەم هەندێك مافی خوێندن و گۆرانی و نوسینیان بە كورد دابوو ، عەرەب نەك هەر ئەوانەشیان نەهێشت تەنانەت ناسنامەشیان لە كورد سەندو كەوتنە عەرەباندنی وڵاتەكە ، ئەو عەرەبانەی ئێستا دەیانەوێ‌ كورد لە زۆر شوێن دەربكەن ، باپیرانی كورد شەرەف و ناموسی ئەوانیان پاراست ، ناوی گوند و شاری كوردەكانیان كردە عەرەبی، ئەمە گێڕانەوەی دكتۆر جەمال نەبەزە . ئەو دەڵێت تەنانەت قەدەغە كرا ناوی مناڵ بە كوردی بنرێت هەروەها باسی بیر فاشیزمێكی وەك زەكی ئارسۆزی دەكات كە كتێبێكی نووسیوە بە ناویكێشەی نەتەوەكەمان و هەڵوێستی حزبەكان ، هەڵبەت كتێبەكە عەرەبیە، جا ئەم زەكیە بە چیرۆكێك دەست پێدەكات كە من چیرۆكەكەی ناگێڕمەوە بەڵام دیارە زۆر دژی زمان و نووسینی كوردیەو دەیەوێت بونەوەرێك نەمێنێ‌ لە سوریا بە ناوی كورد ، لە كاتێكا سوریا قەرزاری هەرە گەورەی كوردن لە سەلاحەدینەوە تا تارو ماری داعش ،خۆش ئەوەیە ئەم فاشیە نوسیویەتی فەڕەنسا كوردیان هێناوە بۆ سوریا. من دوا قسەم گرێدەدەم بە ڕوداوەكانی ئەم دوایەی ئەشرەفیەو شێخ مەقسودە وە كە نازانم كوێی تری بە دوادا دێت ، دەمەوێت پرسیارلەو مەلاو خاوەن مێزەرو خوێنەوارو نەخوێنەوارە كوردانە بكەم ، كە لە بری ئەوەی ڕووی دەم و ڕەخنەیان لە ستەمكارو داگیر كەربێت ، تیر ئاراستەی سینگی كورد دەكەن و بۆ ئەمەش هەمیشە بیانوو بە دەستن ، ئەرێ‌ سەت ساڵە ئەوانەی ئێمە كوشت و بڕدەكەن ، فەڕەنساو ئەمەریكاو ئیرائیل و بەریتانیان یان تورك و فارس و عەرەب؟ پرسیارێكی زۆر سادەیەو دەكرێت زۆر سادەش وەڵام بدرێتەوە ، ئایە ئەوەی جاش سوری و هەرچی و پەرچی جاش تورك و ئیگۆرو ڕیش بزنی بە ناو سوپا لە حەلەب دەرهەق كورد كردیان لە كوێی قورئان و فەرمودەی پەیامبەردا ڕێی پێدراوە ؟، كورد شایانی ئەو ستەمەیە ؟.

لەتیف فاتیح

جوانگۆیی دكتۆر جەمال نەبەزو دوبارە بوونەوەی مێژوو

1توركیاو جاشەكانی بەربوونەتە وێزەی هەردوو گەڕەكی ئەشرەفیەو شێخ مەقسود و دەیانەوێت جینۆسایدی بكەن ، ئامانج لەم پەلامارە :یەكەم: بۆ بە چۆكدا هێنانی قەسەدەیە، بەڵام شتی وا هەرگیز ڕونادات.دوەم : تێكدانی ئەو ڕێكەوتنەیە كە لە نێوان دیمەشق و ڕۆژئاوا كراوە.سێیەم : وەڵامە بەپەیامە شەڕەنگێزیەكانی رابردوی ئەردۆغان و فیدان و باخچەلی.ئێستا لەو دوو گەڕەكە شەهیدو بریندار هەن ، بۆردومان بەردەوامە، ئەمڕۆ دۆستێك لەوێوە پێی وتم بارو دۆخەكە خراپە، بەڵام ئێمە خاوەنی ئیرادەین.2هەر ئەوەندەی عەرەب خۆیان بۆ ئیسرائیل چەماند لە پاریس ، یەكسەر پەلاماری شێخ مەقسود و ئەشرەفیە درا ، من لەوە بە ئازارم عەرەب لە هەموو وڵاتانەوە مل بۆ جولەكە دەدەن كەچی ئەگەر كوردێك بڵێت پێویستە كوردو جوو پەیوەندیان هەبێت نەك هەر خۆیان پەلاماری دەدەن و بە پیاوی جووی لە قەڵەم دەدەن جاشە كوردیش دەكەن بە گژیداو هەر ئەوەی ماوە خوێنی حەڵاڵ بكەن ، كوردی ڕۆژئاوا دەبێت لە ئێستادا باشترین پەیوەندی لە گەڵ جوو هەبێت بە كوێرای چاوی دیمەشق و ئەنكەرەوە.3ئەوەی لە ئەشرەفیەو شێخ مەقسود بەڕێوە دەچێت ئامانج لێی هەموو ڕۆژئاوای كوردستانە، بۆیە بەرپرسیارەتی ئاكاری ئەمەریكاو فەڕەنسایە ، رێگری بكەن و نەهێڵن ئامانجی توركیاو جاشەكانی بێنە دی ، فەڕەنساو ئەمەریكا لە هەر وڵاتێكی تر زیاتر بەرپرسن لەوەی ڕۆژئاوای كوردستان بپارێزن و بیگەیەننە كەناری ئارام ، ڕۆژئاوای كوردستان لە پێناوی مرۆڤایەتیدا هەزاران شەهیدیان دا .4هەرێمی كوردستان و سەرۆكی هەرێم و حكومەتی هەرێم و هەردوو حزبی سەرەكی ئەركی گەورە دەكەوێتە ئەستۆیان لە ئێستادا بۆ لە لایەكەوە پاراستنی شێخ مەقسود و ئەشرەفیەو هەروەها دابین كردنی داو دەرمان و دواتر هەوڵی دیبلۆماسی بۆ بەرگرتن لە فراوان بوونی شەڕەكە، دڵنیام بیانەوێت دەتوانن زۆر شت بكەن .5ئەوەی لە ئەشرەفیەو شێخ مەقسود ڕوودەدات ، جینۆسایدە لە سەر دەستی تورك و جاشەكانی بە بەر چاوی هەموو دنیاوە ، بۆیە ناكرێت دنیا لەم ستەمكاریە بێدەنگ بن ، بەتایبەت نەتەوە یەكگرتوەكان و ڕێكخراوەكانی مافی مرۆڤ كە دەیان ساڵە چاوپۆشی لە هەموو ستەمكاریەكی توركیا دەكەن .

ئەشرەفیەو شێخ مەقسود و دنیا 

<h3 class="ql-align-justify"> </h3> سیاسەت و دۆخی سیاسی كوردستان و پەیوەندی حزبایەتی پاشەكشەیەكی مەترسیداری كردوەجاران ئەگەر كێشەیەك ڕویبدایە خەڵكانی خەمخۆر ، لایەنە سیاسیەكانی دەرەوەی كێشەكە، مامۆستایانی ئاینی ، كەسایەتی كۆمەڵایەتی ، نوسەرو ڕۆشنبیر قسەی خۆیان دەكرد ، خوا هەڵناگرێت كێشەدارەكانیش گوێیان دەگرت و ئەهوەن دەبونەوە،سیاسی پێشتر ، مام جەلال ، كاك نەوشیروان ، بەرهەم ساڵح ، كاك مەسعود و نێچیرڤان بارزانی و هی دیكەش هەبوون بۆ گوێ‌ گرتن ، من بە سەعات لە گەڵ كاك فەلەكەدین گفت و گۆم كردوەو ڕەخنەم لە وەزارەتەكەی و حزبەكەشی گرتوە، لێ‌ ئەو گوێی گرتوە،ئەرێ‌ ئێستا كەس هەیە بۆ گوێگرتن .گریمان&nbsp;هەندێك هەبون بۆ گوێگرتن ، ئەرێ‌ كەس هەیە بۆ قسە كردن ، قسەیەك حسابی بۆ بكرێت ، ئەرێ‌ گەلۆ پارتی و یەكێتی بۆوا یان بەسەر هاتوە ، بۆ ناتوانن بە لۆژیك و ئاوەز دوو كێشە چارەسەر بكەن ، ئەوە بۆ ئەوەی بە دڵی لایە لەو دوولایەنەبێت ئاژاوە گێڕەو فیتنەیەو جاشی ئەم و ئەوە ، تۆ بڕوانەپارێزگاری پایتەخت بیت لە بری چارەسەری كێشەو دوو قسەی خێر بۆ بنەبڕكردنی كێشەكە جارێ‌ پەلاماری لایەكی تر بدەیت و بكەویتە تانەو تەشەر لێدان ، تۆ بڵێی ئەو خەڵكە بەو كارانە خۆیان خۆشەویست بكەن ، یان لە بنچینەدا ئامانجەكە خۆ لادانە لە چارەسەری كێشەكە.دیمەنەكانی لالەزارو لاجان و كۆڕەوی ژن و مناڵی هەركی لە زێدی خۆیان ناشرینی دەسەڵات نیشان دەدات و نەبووننی ئاوەزی چارەسەری كێشە دەردەخات ، جا قوربان هەموو ناشرینە ئیتر ئێمە بەراورد بكەین یان نا ئەم جۆرە كارانە دەسەڵات لە مەرگ نزیكدەكاتەوە نەك ژیان ، دەردی ئازیزێك گوتی ئەمە بكەن و نەیكەن نیشانەی نەمانیانە، ئیتر با هەر خەنی بن بەوەی "پەح دەنگی زۆرهاتوە"، دەنگ كەمبێنەو درز مەخە پەیوەندی كۆمەڵایەتی كۆمەڵگەوە.پارتی و یەكێتی پێویستیان بە كۆمەڵێك كەسی ئاوەزدارە لە شوێنێكا بیانوەستێنێ‌ ، دڵنیام لە ناو ئەو دوو حزبەدا ئاوەزدار زۆرن بۆ قسە ناكەن ، جێی سەرسامیە ، ئەدی بەرپرسانی ئۆپۆزسیۆن لە دۆخی لەم جۆرەدا لە كوێن ، ئەبو كاروان و سەلاحەدین محەمەد بەهادین و عەلی باپیرو عەلی حەمە ساڵح خۆ خوا نەخواستە ئەوانیش نەبراونەتە زیندانێكی دیكەی وڵات ، كەسایەتیە كۆمەڵایەتیەكان بۆ دەنگیان نیە ، ئەوە كەس نیە بچێ‌ لە دەرگای بارزانی باوك بدات و بڵێت " ئەزبەنی فریای نیشتمان سازی بكەوە هەموو پاڵاوگەی دنیا خوێنی مرۆڤێك ناهێنێت، دواتر ئەرێ‌ كەس نیە بپرسێت ئەم هەموو ملیار دۆلارە هی كێیە دراوە بە پاڵاوگە، باشە ناكرا ئەو كێشەیە بە لۆژیك چارەسەر بكرێت .پارتی و یەكێتی حزب نەماون ، خۆ ئەگەر حزب مابان دەبوو ئێستا دەیان كادیری ئەو حزبانە ڕەخنەی حزبەكەی خۆیان بكردایە ، كەچی ئەوەندەی گوێ‌ بیستی پانكردنەوەی ماستاچی حزبین ، ئەوەندە گوێ‌ بیستی ڕەخنەنین، لە گەڵ ئەوەشدا میدیایەكی سێبەری مەترسی دار كە لەوە دەچێت هەندێكیان خەڵكی دەرەوەی كوردستانیش هەڵیان سوڕێنێ‌ دەیانەوێت هەر سبەی وڵات خوێن بیبا ، پەیتا پەیتا ئاگری شەڕ خۆش دەكەن ، یانی یەكێك لە هۆیەكانی ئەوەی ئێمە هێشتا لە دەرەوەی دیرۆكداین هەر ئەم خۆ خۆری و لەئاست یەكتر دڕیەیە.من داوا لە بارزانی باوك و سەرۆكی حكومەت و سەرۆكی یەكێتی دەكەم لانی كەم با یەك ڕۆژ ئەوان لە بری ئەوەی هەر قسە بكەن و خەڵك ناچاری گوێگرتن بكەن ، خۆیان گوێ‌ بگرن ، با وێنەڕاستیەكە ببینن، وێنەی ئەوەی ئەوان ئێستا لای گشتە خەڵك چۆن دەبینرێن، من ئامادەم لە بەرچاوی كامێرا یان پشتەوەی كامێرا راستی وێنەكەیان نیشانبدەم ، هەر من نا خەڵكی تریش ، ئەرێ‌ گەلۆ سەرۆكی هەرێم لە هەموو ئەو ڕوداوانەلە كوێ‌ ئەوە هیچ جێگرەكانی بە میكرۆسكۆبیش نابینرێن .تەقە كردن لە بەر پرسی كۆمیتەیەك و گرتنی بە برینداری، وەك ئەوە وایە بە لایەكەی تر بڵێی تۆش بەرپرسی ناوچەیەك تاقیبكەرەوە ، ئاخر چۆن حزب ئەوە دەكات .

لەتیف فاتیح فەرەج

پارتی و یەكێتی و كۆمەڵگەی كوردی

كتێبێكی قەبارە گەورەم هەیە بە ناوی برینەكانی قودس و دڵ لەوێدا لە سەر زۆرێك لە كێماسی و چەوتیەكانی حزبی كوردیم دەرهەق بەو شارە نووسیوە ، شارێك كە سەدان ساڵی لەبەردەم ستەم و هەڕەشەدا گوزەراندوە لەم سەت ساڵەوە نا لە سەدان ساڵی هێرشە یەك لە دووی یەكەكانی داگیركارانەوە، جا خۆش خۆش شەڕی پارتی و یەكێتی لەسەر ئەو شارە هەندێك جار لە سەر ئەوەیە بە یەك واو بنوسرێت یان بە دوو واو لە كاتێكا زۆر دایك و هاوسەرو خوشكی كوردی ئەو شارە واو نا، هەزاران جار وا وەیلایان بۆ كردوە، لەم بانگەشەی هەڵبژاردنەدا لەوە خراپتر كرۆكی كوردی دەركەوت دەست لە خاتونە بەر بژێرەكانیش نەپارێزراو هەزار تۆمەت و تانە بە فلسێ‌، ئەوەی ئەوەشی دەكرد كوردە حەیاتەكە بوو، هەندێك شیعری بێمانای هەجوو لە سەر چەند كەسێك وترا بەڕاستی وەجاخی شێخ ڕەزایان كوێر كردەوە، ئەمە لە كوێ‌ و شیعری تەڕو ناسكی شێخ لە كوێ‌، سیاسیش هەبوون شیعریان بە باڵای كەركوكدا دەوت، شیعرەكەش هەر بۆ ئەوە بوو بڵێن قودس نیەو دڵە، جا قوربان كە دڵە بۆ لە قولە پێدا داتانناوە، خۆ دڵ شوێنی ئەوێ‌ نیە، لە هەموو هەڵبژاردنێكدا كۆڵێك قسەی ناشرین بە یەكتر دەڵێن ، هەرگیز نازانن برابن . لە كەركوك پێویستمان بە هەراو هوریای ناسیونالیستی كوێر بین و هەڕەشەو گوڕەشەی بێكرداری فاشیانە نیە، پێویستمان بە پێكەوە ژیان و یەكتر قەبوڵكردن و ڕێزگرتنە لە جیاوازی یەكتر، بانگەشەی هەڵبژاردن دەرخست ئێمە هێشتا بە تەواوەتی لەو مێژوەدا نین كە ئامانجمانە، وەك دیرۆك كەركوك كوردستانیە ، وەك جوگرافیا كوردستانیە ، وەك ستەملێكردن كوردستانیە ، گەلۆ كەركوك لە سەردەمی عوسمانیدا یان بە شارەزورەوە ویلایەتێكی سەربەخۆو كوردستانی بووە ، یان بە موسڵەوە كوردستانی بووە، وەك ستەملێكردنیش دەی با هەق و حسابی ئەوە بكەین لە كەركوك كێ‌ لە بەردەم هەڕەشەدا بووە ، كێ‌ راگوێزراوە ، دەركراوەو دەربەدەر كراوە ، كێ‌ ڕووبەڕووی سڕینەوەو ئەنفال بوەتەوە ، كورد بۆ كورد ئێ‌ دیارە هۆیەكەی هەر ئەوەیە ستەمكار ئەركی دەركردنی خاوەن ماڵە بۆ ئەوەی ڕاستی بشارێتەوە، ئەمە بە هەراو زەناو شیعرو میعر چارەسەر ناكرێت ، ئێ‌ نایشكرێت ئەركی پیرۆزی شیعر لە شاعیرانی گەورەی وەك ئەسیری ، لەتیف هەڵمەت ، شێركۆ بێكەس و عەبدوڵا پەشێووزۆری تر بسەنرێتەوەو ئەوەش بۆ سیاسی ناسیاسی قۆرخبكرێت. لە كەركوك پێویستمان بەوەیە سەرەتا خۆمان چاكبكەین ، پەیوەندی دروست بكەینەوە ، واز لەشۆراوی پارتی و یەكێتی بێنین و شۆراوی كەركوك دروست بكەین ، ئەم پەلاماردانی یەكە ناشرینیە ، هەر هیچتان پێناكرێت چاو لە كۆچكردو زاهیر شكور بكەن ، كە كتێبی دەناردە ماڵەكانەوە، چاو لە تاریق كارێزی و ماڵەكەی بكەن ، بڕۆن سەردانێكی خانەی ڕەنجوری بكەن ، ئێمە بیست ساڵ پترە داواو پێشنیازی ئاكاری دەكەین و هەندێك لە بری ئەوەی بە قسەمان بكەن مناڵ و تواڵی شوێنی ترمان تێبەردەدەن ، كەركوك بە ئاكارو جوانكردن و بایەخپێدانی ئاكاری دەگەڕێتەوە، نەك بە شەڕی واوی درێژو واوی كورت.باشترین كارێك بكرێت ئەوەیە بەشێك لە ئەرك و خەمی كەركوكی لێگەڕێن بۆ خودی كەركوكیەكان خۆیان ، لە ناو كەركوكیەكانیشدا بۆ ئەوانەی وەك گەلی مەكە شیوودۆڵ و پەلی كەركوك لە هەموو كەس شارەزا ترن&nbsp;

لەتیف فاتیح فەرەج 

كەركوكەكەی دڵ و قودس 

&nbsp;نیشتمان موڵكی هەموومانە، كەواتە برینێكی نیشتمان، كێماسیەكی دەبێت هەموومان لە خەمیدا بین ، وەك جوانیەكیی نیشتمانیش دەبێت مایەی دڵخۆشی گشتمان بێت . جیاوازی كردن لە نێوان شوێنێك بۆ شوێنێكی تری ئەو نیشتمانە بە هەر بیانویەك ستەمە، ناشرینیە ، بێئاوەزی و جیاكاریە. نەوت و غازی كوردستان لە چەمچەماڵ بێت یان زاخۆ هی گەلی كوردستانە، بەرتاقای ئەوەی زاخۆی پێجواندەكرێت دەبێت چەمچەماڵیشی پێجوانبكرێت ، بگرە زیاتر لەبەر ئەوەی لێرەوە ئەو غازە دەكشێ‌ . دەبوو ئێستا لە كۆرو مۆرەوە تا سلێمانی جادەی دوو سایدی سەت مەتری هەبا و ئەم بەرو ئەو بەری جادەش دارو سەوزای با، دەسەڵات دەبوو دانا غازی ناچار بكردایە ئەو كارە بكات ،&nbsp;نەك وێنەی شوێنێكی تر بە مەبەست دڵی خەڵكی جەباری و شێخان و شوان و سەنگاوو چەمچەماڵی پێبگوشرێت. حكومەت یان نابێت هەبێت یان دەبێت هی هەموو كوردستان بێت، لە ناو حكومەتیشا خۆ وەك ئۆپۆزسیۆن نیشان دان لە بەر ئەوەی نەتوانراوە نوێنەرایەتی بكرێت، ناشرینیە ، لە بری پرتەو بۆڵە شەڕی یەكسانی و عەدالەت بكە. پێمخۆشە هەولێر ببێتە بەهەشتی ڕۆژهەڵاتی ناوەڕاست ، بەڵام پێمناخۆشە ئەمە وانیشانبدرێت كە ئەها سلێمانی چۆنەو هەولێر چۆن، شەرمە لە بری هەڵبەستی درۆو پیاهەڵدان جیاوازی لە نێوان دوو یانەدا بكرێت بۆ نەورۆز بكڕوزێیتەوەو بۆ زاخۆش بخەنیتەوە، فەرموو ئەوەش بۆ نەورۆز بكە كە بۆ شوێنی تری دەكەیت . سەرۆكی حكومەت و جێگرەكەی دەبێت نوێنەری هەموو خەڵكی كوردستان بن ، نەك كادیری لق و مەڵەبند وەك ئەوەی لەبانگەشەی هەڵبژاردنا وا دەردەكەون . لە تەك ئاوەدانی و جادەو بان و سەوزایدا دەبێت شعوری ئەوە هەبێت شكۆ بۆ پارلەمانیش بگێڕدرێتەوە كە ئێستابە هەوەس پەكخراوە، دەبێت بایەخ بە مرۆڤێكیش بدرێت كە خۆ بڕیارو خۆ خاوەن بێت نەك فێری كۆیلایەتی و چۆنێتی پیاهەڵدانی&nbsp;سەرۆكی حزب و كارەكتەری حزب بكرێت . نەوت و غاز هی حزبێك نیە، ڕاستە، بۆیە ناكرێ‌ حزب بۆ فریودانی خەڵك ، قوتكردنەوەی سەرمایەداری مشە خۆر ، میدیای چەواشەكاری حزبی بخرێتە گەڕو پەروەردەو تەندروستی پشتگوێ‌ بخرێت و ناخودای حزبیش بۆ پژمەیەك ببرێتە ئەڵمانیاو نەمساو ئەمەریكاو خەڵكیش چاوی دەر ئەهات ، پێمەڵَێ‌ چەند جادەت كردوە پێمبڵێ‌ كەرتی تەندروستی و پەروەردەت چۆنە . نەوت و غاز هی حزب نیە، بەڵام حزب خەڵكی پێدەكڕێت ، حزب جباوازی پێدەكات ، حزب دەتوانێ‌ لادێی پێ‌ بكاتە شارو شاری پێ‌ لە شاری بخات ، ئەوانە ڕاستین و نكوڵیان لێناكرێت ، حزب زەوی تەخشان و پەخشان دەكات ، شاخیش هەلا هەلادەكات و بە دەستی خۆی دەست دەنێتە بینەقاقای داڕبەڕوو سەوزایی نیشتمان، لە زەوی و زاریش كێی بوێت دەیداتێ‌ و كێشی نەوێت دەیبات بە ناخی زەویدا.حزب دۆخی حزبی بونی ناچاری ، یان حزبی بوونی ئیجباری دەدات بە سەر هاونیشتمانیداو ئەوەی ئەوەش نەكات، نیشتمانەكەی لێدەكاتەدۆزەخ، وەك بۆ هەندێكی كردوە بە دۆزەخ، باسی بەهەشتی كۆیلەكان و مۆدێلەكان و بەكرێگیراوەكان ناكەم

نەوت و غاز هی حزب نیە، بەڵام

<h3> </h3>لە ماوەی پێشوودا دوای چەند كاتژمێرێك لە ڕاسپاردنی بۆدروستكردنی حكومەت سەرۆك وەزیرانی فەڕەنسا دەستكێشانەوەی لە كارەكە ڕاگەیاند، یەكێك لە مەرجەكانی زندوێتی تاكەكانی هەر گەلێك ئەوەیە كە بەردێك هەڵنەگرێت كە ناتوانێ‌ بیوەشێنێت، فەڕەنسا لە شۆڕشی فەڕەنسیەوە تا ئێستا خاوەنی زندو ترین گەلی دنیایە ، گەلێك كە ئەگەر هەموو ڕۆژێك لە پێناوی ئازادیدا، ئازادی خەڵكی تریشدا بێتە سەر جادە ماندوو نابێت، گەرچی گەلی فەڕەنساش زۆر جار بە هۆی دەسەڵاتداری ستەمگەراوە بووە بە بەشێك لە چەوسانەوەی خەڵكانی دیكە، بەڵام شۆڕشی فەڕەنسی لە شوێنێكا ئەوەی ڕاگرت، لانی كەمی ستەمكاری زۆر پاشە كشەی كرد ، لێ‌ گەلی فەڕەنسی هێشتا بۆ هەر بابەتێك كە پەیوەستە بە مافی مرۆڤەوە ئامادەیە بڕژێتە سەر جادە، لە گەڵ ئەوەشدا هێشتا ئەوروپا بە گشتی و فەڕەنساش نەیانتوانیوە خۆیان لە خۆسەپێنی سیاسەتی ئەمەریكی رزگار بكەن، كە قسە لە رزگار بوون لە خۆسەپێنی ئەمەریكی دەكرێت ، مانای ئەوەیە قسە لە خۆبڕیاری دەكرێت ، ئەو خۆ بڕیاریەی پێویستە فەڕەنساو ئەوروپا جگە لە بەریتانیا هەیانبێت و لە دەرەوەی نەخشەی سیاسەتی ئەمەریكیدا پیادەی بكەن ، هەڵبەت هەڵاوێرد كردنی بەریتانیا گرێدراوە بەوەوە كە ئەمەریكا و بەریتانیا لە سیاسەت و هەنگاودا وەك " گیانێكن لە دوو جەستەدا".بەشێكی گرنگی خۆپیشاندان و توڕەیی بەردەوامی گەلی فەڕەنسا پەیوەستە بەو خاڵەی سەرەوە، یانی سیاسەت&nbsp;بە جۆرێكی خۆخاوەن و سەربەخۆ، ئەوە ئەگەر لە ململانێی حزبەكانیشدا بۆ گەیشتن بە دەسەڵات ڕەنگ نەداتەوە، ئەگەر ڕای گشتیش بە جۆرێكی ئاشكرا دەرینەبڕێت، بەڵام&nbsp;سیاسی و بیرمەندو دەستەبژێری فەڕەنسی دركی پێدەكەن ،لە جەنگی جیهانی دوەمەوە ئەمەریكا هەموو ڕێگەیەكی گرتوەتە بەر بۆ كەوی كردنی وڵاتانی ئەوروپی، ئەوەی لە گەڵ هەر وڵاتێكی تر پێكرا بێت لە گەڵ فەڕەنسا پێی نەكراوە، گەرچی زۆر جارو لە زۆر بواردا لەمپەری خستوەتە بەردەم هەنگاوەكانی ، وەك ئەوەی ڕێگری كرد لە مامەڵەی فڕۆكەی فەڕەنسی لە گەڵ ئوسترالیا، ئەمەیان بابەتێكی ترەو ئێمە نامانەوێت لەو بارەیەوە قسە بكەین ، بەڵام بابەتی ناڕەزایەتی بەردەوامی گەلی فەڕەنسی بەرتاقای ئەوەی شەڕی باشكردنی ژیان و ئابوریە ، شەڕی ئازادیشە ، ئازادی بەو مانایە نا كە لە ناو فەڕەنسادا ئازادی نیە، بەو مانایەی فەڕەنسا سیاسەتی ئازادانەو خۆ خاوەنیانەی خۆی هەبێت و نەبێتە بەشێك لە سیاسەتی وڵاتگەلی دیكە .سیاسەتی ئازادانە بێلایەنی نیە، كە ئەمڕۆ بێلایەنی نەماوە، سیاسەتی ئازادانە نەكەوتنە ژێر كاریگەری ئەمەریكاو ڕوسیایە، هەڵبەت پێش شەڕی ئۆكراین و لە دوای ئەو شەڕەشەوە كە پێچەوانەی بۆچونی شڕۆڤە كارانی سیاسی زۆری درێژە كێشا، ئەوروپا بە جۆرێك دەبینرێت كە وابەستەی سیاسەتی ئەمەریكیەو بە گشتی دەرگایان بە ڕوی هەموو گفت و گۆیەكدا لە گەڵ ڕوسیا داخستوە، ئەمەریكاش هەر ئەوەی دەوێت، ئەوەشمان بیر نەچێت كە ئەمەریكا لە ناو زۆربەی وڵاتانی دنیادا نەك هەر ئەوروپا دەتوانێت كێشە دروستبكات، خۆ پیشاندانەكانی ئێستای فەڕەنسا ، گەڕان بە دوای ئازادی فراوانتری نێو دەوڵەتیدا سەرەتای ژانی لە دایكبونێكی نوێیە، ئەگەر گیانی ڕاسیستی كە خەریكە ئەوروپا دەتەنێت تێكی نەدات، ئەگەر شۆڕشی شۆڕشی بە گژا چونەوەی چینایەتی و ڕژێمی پاشایەتی و نادادی&nbsp;بووبێت ، ئێستا لە هەر كات زیاتر فەڕەنسا پێویستی بە شۆڕشی خۆخاوەنی و جیاكردنەوەی دیدی سیاسیە لەوانی دیكە بۆ بەرژەوەندی گشتی نەك هەر لەناو خۆی فەڕەنسا بگرە بۆ تەواوی ئەوروپا و جیهان، بێگومان لەمەدا گەلانی ستەملێكراوی وەك گەلی كورد زیاتر لە هەر گەلێكی دیكە چاویان لەوەیە فەڕەنسا و گەلی فەڕەنسی لەو خۆخاوەنیە سیاسیەدا ببنە پاڵپشت و پەناگەیان بۆ گەیشتن بە ئازادی.

فەڕەنسای ئازادی و خۆپیشاندان

گرتنەكەی عەجاج و هلەتیف فاتیح فەرەجەندێ‌ زانیاری نەبیسراو ئەمڕۆ ڕاگەیەنرا كە عەجاج گیراوە ، پێرێ شەو هەواڵەكەیان پێدام و داوای ئەوەش كرا جارێ‌ باس نەكرێت ، هەڵبەت چەند گەواهیدەرێكیش ڕۆژانی بەرێ‌ چووبوون بینیبویان ، عەجاج لەم هەموو ساڵەدا چەندین شوێنی كردوەو نەشتەرگەری جوانكاریشی كردوە كە نەناسرێتەوە، ساڵی 2003 چەند میدیاكارێك عەجاجیان بینیبوو، گفت و گۆشیان لە گەڵ كردبوو ، بەڵام دواتر ئەو بابەتەیان شاردەوە و باس نەكرا ، من خۆم چەند جارێك داوای دیدارەكەم كرد پێم نەدرا تەنانەت داوای ئەوەم كرد وێنەیەكم بدرێتێ‌، ئەوەشیان بە بیانوی دیار نەبوونەوە پێنەدام .لە ساڵانی ڕابردودا چەند جارێك هەواڵی مردنی بڵاو بوەوە، هەموو جارێكیش هەواڵەكە بە درۆ دەخرایەوە ، ئێمە تیمێك بووین لە ساڵی 2003 سۆراغی زۆری ئەومان كرد ، بەڵام شتێكی ئەو تۆمان دەستنەكەوت ، عەجاج جەلادی هەرە دیاری نوگرە سەلمان بوو، قوربانیەكان هەمیشە لە گەڵ ناوی عەجاجدا ناوی سەگە ڕەشەكانی بیابانیشیان دەهێنا ، نزیكی دوو ساڵێك لەمەوبەر لەبەغدا بووم لای مزگەوتی شێخ عەبدولقادری گەیلانی ، ناسیاوێك یەكێك لە جاشە خوێنڕێژەكانی كوردستانی نیشاندام ، كە لەوێ‌ خۆی وەك موسوڵمانێكی عەیارە بیست و چوار نیشاندەدا ، بە داخ بووم لەوەی كەماوە، لە گەڵ چەند دۆستێك باسی ئەوەم كرد كە نەدەبوو ئەو جەلادە لە ژیاندا بێت ، برادەرێك وتی تۆ چی دەڵێیت خۆ عەجاجیش لە ژیاندایەو كەسیش پێی ناڵێت پشتی چاوت برۆیە .ئێستا كە عەجاج گیراوەو ڕۆژی ڕاگەیاندنی گرتنەكەی كەوتە ڕۆژی جینۆسایدی بارزانیەكانەوە، زۆر گرنگە دادگای بكرێت ، من پێرێ شەو بەو دۆستەم وت هەقە داوابكرێت بهێنرێتەوە بۆ كوردستان و لێرە دادگای بكرێت، وتی نەكەی لە ڕێی خودا پێشنیازی وانەكەیت ، نەبا وەك بەرزەكی بانان بۆی دەرچێت ، بیرم لە قسەكەی كردەوە كە یەك ئامر مەفرەزەو موستەشار دادگای نەكراو پارتی و یەكێتی تەنانەت پاكانەیان بۆ جەلادەكانی بەعس دەكرد وتم دیارە ئەو ئەو قسەیە لە خۆیەوە ناكات .هیوادارم بەر لەوەی عەجاج تووشی هەر ڕٍوداوێك بێت هەموو ئەو زانیاریانەی لایەتی لێی وەربگیرێت ، بەتایبەت كوشتنی ئەو سەدان كەسەی قەڵای سەلمان ، كە من خۆم لیستێكم لایە هەموویان یەك هۆكار بۆ مردنەكەیان نوسراوە، ئەو لیستە ئەوانەن كە نەخۆشخانەی سەلمان ناوی نووسیون ، نەك ئەوانەی لەناو قەڵاكە مردون و هەر لەو دەورو بەرە خراونەتە نێو خۆڵی بیابانەوە .

لەتیف فاتح فەرەج

گرتنەكەی عەجاج و هەندێ‌ زانیاری نەبیسراو

&nbsp;دەزانم چ بەڕێز ماكرۆن و چ بەرپرسانی فەڕەنسی و بەتایبەت وەزیری دەرەوە ژان نووێل بارۆ زۆر باش محەمەد جۆلانی و سەرانی ئێستای دیمەشق دەناسن . ئەو هێزە بڕندەو هارەی جۆلانی كە هەمە چەشن داعش ، نوسرە ، بە كرێگیراوی توركیا ، خەڵكانی وڵاتانی دیكە ، نە بە محەمەد جۆلانی و نەبە باوكی تۆم باراكیش داناساكێن و كەوی نابن . ئەو هێزانەو خودی ئەحمەد شەرعیش هی ڕێكەوتن و دان و ستان نین .ناكرێت ڕۆژئاوای كوردستان ، ئیدارەی خۆسەرو مەسەدە قەسەدو هەسەدە ناچاری ئەوە بكرێن بچنە خزمەت ئەحمەد شەرعێكەوە كە خۆی لە خزمەتی خەڵكی تردایە . ڕۆژئاوا خۆ بەڕێوەبەریەکی دیموكرات و پێشكەوتووە، دە ساڵە داعش و توركیاو هەتەش و نوسرەو بڕندەكانی سوڵتان دەیانەوێت بیخەن ناكەوێت ، ئەسەد زۆر هەوڵی دا بیخات نەیتوانی ، ئێستا ناكرێت بە بیانوی ئاشتیەوە ئەم دام و دەزگا سەركەوتوە و ئەو هێزە مەشقپێكراوە یەكگرتوە ڕادەستی دیمەشق بكرێت . دۆستە فەڕەنسیەكان زۆر باش دەزانن كەمترین چارەسەر بۆ سوریا فیدراڵی و خۆ بەڕێوەبەری ناوچەییە، دوور لە دەمار گیری تائیفی و دنەدانی شەڕی تائیفی .جۆلانی ناتوانێت دیموكراسی بێت ، چونكە ئەو لە دانتۆنی چەقۆ بە دەستی سەردەمی شۆڕشی فەڕەنسی دەچێت دانتۆنی وەزیری داد،داد نابێت بدرێتە دەست چەقۆكێشەوە . دەبێت فەڕەنسا ئەو ڕاستیە بزانن تەنیا كوردو نوێنەرانی بارۆس درۆنازانن و ڕاستگۆن، یانی سیاسەت بە ئاكارەوە دەكەن ، نابێت ڕۆژئاوای كوردستان ناچار بكرێت بچێتە باوەشی دیمەشقەوە ، دەبێت دیمەشق ناچار بكرێت لە ڕۆژئاواوە فێر بێت .ئیلهام ئەحمەد و مەزڵوم عەبدی ، یان ڕیش و شمشێر .ئاشتی كاتی&nbsp;ئامادە كاریە بۆشەڕ ، چارەسەری هەمیشەیی گێڕانەوەی شكۆیە بۆ چەوساوەو ستەملێكراوان .كوردو دروزو عەلەوی ومەسیحی دەبێت ئازادانەو خۆخاوەنانەو دور لە خاوەندارێتی عەرەبی سونەو عەرەبی دەشتەكی و دەستوەردانی توركیا بژین ، ئەمەڕاستیە . با جارێكی تر مناڵی كوردو دروزو عەلەوی نەبنە بارمتەی دەستی ئەوانەی بۆ كوشتن فریا ناكەون نەعلەكانیشیان لە پێ‌ بكەن و دەستدرێژی سێكسی كردنە سەر مناڵی دە دوازدە ساڵ بە جیهاد دەزانن.پێش كۆبونەوەكە هەقە بەڕێز ماكرۆن و ژان بارۆ ئەو ڕاستیانە لە بەر چاو بگرن.&nbsp;

پێش كۆبونەوەی پاریس

هەمیشەو لە هەر گاڤێكی هەستیاردا ئەوەی دەبێت دوا قسەو قسەی یەكلاكەرەوە بكات ڕۆشنبیرانن، لە فەڕەنسا هەر كاتێك سارتەر قسەی بكردایە حكومەت لە شارڵ دیگۆلەوە تا خوارێ‌ گوێیان دەگرت، ئەوە ڕۆشنبیرو نوسەرو هونەرمەند و میدیاكاری بوێرو قسە لە ڕوون كە بە گژ ناهەقیدا دەچنەوە، محەمەد حەسەنێن هەیكەل پەنجا ساڵ لە ڕێی نوكی قەڵەمەكەیەوە ڕەخنەی ئاراستەی دەسەڵاتدارانی عەرەب كرد، شاعیری عەرەب نزار قەبانی بە شیعر عەرشی دەسەڵاتی عەرەبی دەخستە لەرزە ، شاعیری كورد شێركۆ بێكەس كە باوكیشی بە شیعری بیست و حەوت ساڵە ئینگلیزی شەرمەزار كرد، دواجار لە چامەی ئێستا كچێك نیشتمانمە بە دەسەڵاتی كوردی وت ئیتر بەسە ، لەتیف هەڵمەتی گەورە شاعیری كورد پتر لە پەنجا ساڵە بە تەنێ‌ كولەكەكان دەشكێنێت و بە دەنگی بەرز بانگ دەدات . لە بارو دۆخێكی هەستیارو ناخۆشداین ، سەدان ڕۆشنبیر ، قەڵەم بە دەست ، هونەرمەندو شاعیر لە نێو دام و دەزگاو میدیاو ڕاگەیاندنی پارتی و یەكێتیدان ، دەبێت بەر لە هەر كەس ئەوان ڕووبەڕووی حزب و سەرۆكی حزبەكانیان دەنگ هەڵبڕن و بڵێن وەرن بڕوانن ژیانی خەڵك چۆنە ، ئاخر كەی ئەوە ڕەوایە موچە خۆرێك دوو كیلۆ تەماتەو پیاز بە قەرز وەربگرێت و ژیانی سەرانی حزب و مناڵی نێو خانەوادەكانیان زۆر لە شاهانە شاهانە تر بێت و سەرۆكی حزب ئۆتۆمۆبیلی گرانبەهای سفر كیلۆ مەتر ببەخشێتەوە، چەند شەرمە كەس و كاری شەهید، دایك و كچی شەهید بە قوڕگی پڕ گریانەوە باسی نەبونی بكەن و دەسەڵاتیش نەبان و ڕۆشنبیرانیش بێدەنگ بن ، لە ناو ناوەندە میدیاییەكانی پارتی و یەكێتیدا زۆر ڕۆشنبیر هەن كە دەكرێت ئێستا یەخەی حزبەكانی خۆیان بگرن ، دڵًنیام ئێستا كە سانی وەك شێركۆ بێكەس ، فەلەكەدین كاكەی لە ژیاندا بوایەن دەنگیان بەرز دەكردەوە ، هەڵبەت ڕۆشنبیری ڕاستی لە هەر كوێ‌ بێت نابێت بێدەنگ بێت ، ئەركی ڕۆشنبیر قسە كردن و هەڵوێست وەرگرتن و بە گژا چوونەوەی نادادی و ناجۆریە . بۆ من هەرگیز ئەوە كێشە نیە ڕۆشنبیر لە كوێیە ، چونكە ئەویش وەك هەر مرۆڤێك ئازادە دەیەوێت لە كوێوەو بە چ جۆرێك كار بكات ، بەڵام بێدەنگبوونی لە بەرانبەر نادادی و ستەم كێشەیەكی گەورەیە، لە ڕاستیدا ڕۆشنبیران و نوسەران و هونەرمەندانی هەولێرو دهۆك دواتر سلێمانی و گەرمیان و هەڵەبجەو ڕاپەڕین لە ئێستادا بەرپرسیارن بەرانبەر ئەو بارو دۆخەی هەیە ، بەرپرسیارن لەوەی كە ئەو هەموو ئازارو نەهامەتیە دەبینن و بێدەنگن ، خۆ دەكرێت لقەكانی نوسەران و ڕۆژنامەنووسان بە بەیان و نووسین و ڕەخنەگرتنی دەسەڵاتدارانی هەرێم لانی كەم، كەمێك لەو بەرپرسیارەتیە لە ئەستۆی خۆیان لابەرن، كاتێك ژنێك ، گەنجێك ، پێشمەرگەیەك هاواری لێهەڵدەستێ‌ و هەندێك لە توڕەیدا ڕژێمگەلی ستەمگەرای تورك و فارس و عەرەب بە باشتر لە دەسەڵاتی كوردی ناودەبەن و هەشن هێند توڕەن سەدام لەمانە بە باشتر دەزانن، ئەوە ئەو كاتەیە كە دەبێت ڕۆشنبیران بێنە قسەو بە دەسەڵاتی كوردی بڵێن بۆ بگاتە ئەم ئاستە . زۆر بابەت هەیە دەبێت ئەهلی قەڵەم قسەی خۆیانی تێدا بكەن ، بێدەنگی ئەوان یەكێكە لە بێدەنگیە هەرە مەترسیدارەكانی مێژوو، ئایە ئەو بێدەنگیەبۆ بارو دۆخی هەرێمی كوردستان چارەسەرە ؟.

 لەتیف فاتیح فەرەج

ڕۆشنبیران كەی قسە دەكەن

ئەمڕۆ شازدەی مانگ و سبەی هەڤدەی چوار دیداری زانکۆی&nbsp;ئەمەریکی سلێمانی کە بەدیداری سلێمانی ناوی ڕۆیشتوە بەڕێوە دەچێت، دیدارەکە لەسەرو بەندی یادیسی و حەوت ساڵەی ئەنفالدایەو نۆیەمین دیدارە، دکتۆر بەرهەم ساڵح بەوە ناسراوە پیاوێکی بە ئاگایەو وردە لە خوێندنەوەدا، هەروەها بەچاوێکی گرنگیشەوە سەیری پرسی ئەنفال و جینۆسایدی گەلەکەی دەکات، دەکرا، لەم دیدارەدا ئەوە ڕەنگی بدایەتەوەو ڕۆژی یەکەمی دیدارەکەی لەمۆنۆمێنتی ئەنفال لەچەمچەماڵ بەڕێوە بردبا، کە هۆڵ و شوێن و ڕێ ئامادەبوو، دەبوە هەنگاوێکی گەورەش بەوەی ئەو هەموو بەرپرس و سەردارەی بهێنایەتە خزمەتی ڕوفاتی ئەنفالکراوانی کورد،کەهەندێکیان مەگەر ئاوا دەنا هەرگیز ئامادەنین بێنە شوێنگەلی وەک چەمچەماڵ کە شاری شەهیدان و ئەنفالکراوانە. ئەگەر بەرهەم ساڵح&nbsp;بڕیاری بدایە ڕۆژی یەکەمی دیدارەکە لەچەمچەماڵ و لە مۆنۆمێنتی ئەنفال بەڕێوە دەچێت بڕواناکەم زانکۆ لاری هەبوایە، جگە لەوەش خۆ ئەگەر بەرپرسێک و سەردارێک خۆی نەیویستبایە بێت، ئەوەخۆی بەر پرسیار دەبوو لەوەی ڕێزی ئەو شوێنە پیرۆزە ناگرێت، ئەوەندەی من بزانم خەڵکی چەمچەماڵ و شۆڕش زۆربەیان بەرهەم ساڵحیان خۆش دەوێت، گەرچی لەسەردەمی حوکمداری ئەوەوە تا ئەمڕۆش پڕۆژەی ئاوی گۆپتەپە -چەمچەماڵ جێبەجێ نەکراوە، بەڵام هێنانی دیدارەکە بۆ چەمچەماڵ بایەخ و گرنگی خۆی دەبوو، لانی کەم هەر لەوێش دەکراپرسی ئەنفال ومجینۆسایدی کورد بخرایەتە بەر باس و یارو نەیار ببرانایەتە سەر گۆڕی قوربانیەکان.لەهەموو دنیادا ئەمجۆرە دیدارە گرنگانە&nbsp;دەبرێتە هەندێ شوێن بۆ ئەوەی ئازارو ژیارو شارستانیەتی خۆیان نیشانی ئەوانی تر بدەن، چەمچەماڵ، جگە لەچەرموو قەڵاو نەوت وغازو مۆنۆمێنتی ئەنفالکراوانیشی لێیە لەوە زیاتر چی؟.

دیداری سلێمانی و ئەنفال

وتەی سەلەفیەکی سعودیان بۆ ناردوم بەزمانێکی سەقەت باسی حەرامبوونی خۆی وتەنی عیدی نیرۆز دەکات، بۆ من جێی خۆشی بوو کە زۆر کەس بەکۆمێنت دابویانە دەمیا، کابرای سەلەفی وەک شۆڤێنیەکی هەرە دواکەوتوی عەرەب دەیەوێت بەگژ نەورۆزی کوردا بچێتەوە، من چاوەڕێ بووم چوار مەلای کورد پێی بێژن شەکرت شکان، لێ نەبوو، پار لە خورماتو کۆڕێکیان بۆ ساز کردم لەسەر نەورۆز لەوێ بەبەڵگەو ئەرگۆمێنت باسی ئەوەم کرد کە نەورۆز یەکێک لەبۆنە هەرە پڕ بایەخەکانی گەلانی دێرینی زاکرۆزە، بڕواشم وایە لەسەر ئەم سەر زەمینەی ناوی کوردستانەو زۆر لەجوگرافیای ئێستای هەر چوار پارچەکە گەورەترە، گەلی کورد خاوەنی هەرەسەرەکی هەموو ئەفسانەو داستان و شارستانیەتی ئێرەیەو ئەوانی تر کەهاتون بەچاک یان خەراپ هاوبەشی کوردیان کردوە، کاتێک کورد جەژنی نەورۆزی گێڕاوە، باو باپیری ئەم عەرەبە سەلەفیە لەنێو شەوەزەنگی جەهلدا بوونە، هەڵبەت وەکوئێستای، لەکۆڕەکەمدا مەلایەکی گەنجی کورد هەستا بڕێک قسەی زۆر جوان و ئاوەزی کرد، خۆزگە هەر ئەو مەلا گەنجە وڵامێکی کەپو شکێنی ئەو شتەی دەدایەوە.مێژوی عەرەب لیپە لەکوشت و بڕو تاڵانی و ئەنفال و پەلاماردانی ژن و کچی خێڵی خۆیان و گەلانی تر ، ئەمە مێژوە جوانەکەی خۆیان وادەڵێت، نەک من، لەسەدەی ڕابردودا چەندین ناسیونالیستی عەرەب ویستیان ئەو مێژوە بۆ کەمێک لەجوانی بگۆڕن، نەیانتوانی، کەنعان مەکیە لەباسی ئەو مێژوەدا دەڵێ هیچ تولەرانسێکی تیانیە، خەزعەل ماجدی دەڵێ عەرەب شارستانیەت و ژیاریان نیە، عەبدوڵا قوسەیمی دەڵێ جگە لەدیاردەیەکی دەنگی هیچی تر نین، دیکتاتۆرێکی وەک سەدام حوسێن پێی وتن ئێوە پێ پەتی بوون من فێری پێڵاو لەپێکردنم کردن قەزافی دەڵێ من کردمن بەمرۆڤ، هەر کەئەو کوژرا، بەربوونە وێزەی یەک، ئەم سەلەفیە، چونکە خۆی دڵی پیسەو چاوی لەسەر هەموو ژنی دنیایە، ژن و مناڵ و هاوسەری خۆی لەتاریکی هەڵکێشاوە، ژنیش بە کەم ئاوەزو مەڕو بزن دەزانێ، پێی ستەمە ژن ئازاد بن، مێژوی کورد تا ئەم ئاوەزەی تێکەڵ نەبووبوو، مێژووی بەشداری کارایانەی ژن بوو لەژیانی هاوبەشدا، ئەو بەمە کوێر دەبێ، بۆیە دێت پەلاماری نەورۆزی ڕەنگاو ڕەنگی کوردان دەدات.نەتەوە بریتیە لەژیارو کولتورو ئاکارو ڕوە گەشەکانی ڕابردوو، هەڵبەت ناشرینی و دزێویش بوونی هەیە، ناکرێت، لات و لوتێکی نەتەوەیەکی دیکە، کەکچ بەعەورەت دەزانێ و بۆ ئەوەی نەبێتە خۆراکی خێڵە نەیارە هاوزمانەکەی زیندە چاڵی دەکات، بێت ئامۆژگاری نەتەوەیەکی تر بکات، پێویست بوو مەلای کورد وەک چۆن کاتی خۆی خانی داکۆکی لەنەورۆز کردوەو شانازی پێوە کردوە هەمان کاریان کردباو، نەتەوەی کوردیان لەکولتورو ئاوەزی داعشیانەی ئەم بونەوەرەتاریکە بپاراستایە، بەوەی هەموو ڕێ و ڕچەی خۆیان لەم تاریکیە نوتەکە جیابکەنەوە.

بابەتەکانی لەتیف فاتح فەرەج

عەبیر سەهلانی و ژان نۆیەڵ بارۆ

جوانگۆیی دكتۆر جەمال نەبەزو دوبارە بوونەوەی مێژوو

ئەشرەفیەو شێخ مەقسود و دنیا

پارتی و یەكێتی و كۆمەڵگەی كوردی

كەركوكەكەی دڵ و قودس

نەوت و غاز هی حزب نیە، بەڵام

فەڕەنسای ئازادی و خۆپیشاندان

گرتنەكەی عەجاج و هەندێ‌ زانیاری نەبیسراو

پێش كۆبونەوەی پاریس

ڕۆشنبیران كەی قسە دەكەن

دیداری سلێمانی و ئەنفال

نەورۆزو سەلەفیزم