&nbsp; &nbsp;لە سەروبەندی نزیکبوونەوە لە حەوتی ئۆکتۆبەر و لە گەرمەی هێرشە چڕەکانی سوپای ئیسرائیل بۆ سەر کەرتی غەززە، بە نیازی داگیرکردنی تەواوەتی و لەناوبردنی حەماس و تەنانەت هەوڵدان بۆ ڕاماڵینی غەززەییەکان بۆ دەرەوەی غەززە، بەریتانیا، فەرەنسا، کەنەدا، ئوسترالیا و هەندێ وڵاتی تریش جارێکی تر پرەنسیپی دوو دەوڵەتی بۆ چارەسەر دێننەوە ناو هاوکێشەکان و دان بە دەوڵەتی فەڵەستینیش دا دەنێن. بەرلەوەی خوێندنەوەو شیکاری بۆ ئەمە بکەین، پێویستە ئەو ڕاستیە لەبەرچاو بگرین، کە ئەمریکا و ئیسرائیل هەموو شتێکیان لە پشتی پەردەوە سەبارەت بە کۆتاییهێنان بە دۆسیەی غەززە بڕاندۆتەوە، بڕیاریان لێیداوەو و چرای کەسکیش بۆ ئیسرائیل لە لایەن ئەمریکاوە هەڵکراوە. بۆ پشتڕاستکردنەوەی ئەم ڕاستیەش، لە ١٨ ی سێپتێمبەر واتا ئەم مانگە لە کۆبوونەوەی ئەنجومەنی ئاسایشی نەتەوە یەکگرتوەکان بۆ ڕاگرتنی جەنگی غەززە، بینیمان ئەمریکا لەدژی وەستانی جەنگ چۆن ڤیتۆی بەکارهێنا!&nbsp;&nbsp;ئیسرائیل نزیکترین و متمانەپێکراوترین هاوپەیمانی ئەمریکایە لە ڕۆژهەڵاتی ناوین، کە ئەمە بابەتێکی نوێ نیەو پێشینەی مێژوویی هەیە، لەگەڵ ئەوەشدا لەم گۆشەیەی جیهاندا تەواوی بەرژەوەندیەکانیان پێکەوە گرێدراو و هەمئاهەنگن.&nbsp;جگە لەوەش لۆبی جولەکە لە ئەمریکا یەکجار بەهێزەو ڕەگ و ڕێشەی قوڵی هەیە. ئەگەر ئاوڕێک لە مێژووی هەشتا ساڵ بەر لە ئێستاو سەرەتای دامەزراندنی دەوڵەتی ئیسرائیل بدەینەوە، بەڕوونی ئەوەمان بۆ دەردەکەوێ کە چۆن ئەوکاتیش لۆبی جولەکە بەهەموو توانایەوە لە هاوکاری دارایی و کۆکردنەوەی فاند بۆ دەوڵەتە تازەکەی ئیسرائیل درێغی نەکردووە. لەسەردەمی ئێستاشدا لۆبی جولەکە نەک هەر لە ئەمریکا بەڵکو لەئەوروپا و تەواوی دنیای خۆرئاوادا لەوپەڕی بەهێزی دایەو و جۆرێک خۆیان ڕێکخستوە، کە لە کایەی ئابووری و تەنانەت سیاسیشدا ڕۆڵی کاریگەریان هەیە و هەرکاتێک پێویست بکات، توانای گۆڕینی ئاڕاستە سیاسیەکانیان لە بەرژەوەندی دەوڵەتی ئیسرائیل دا هەیە.&nbsp;گۆڵدا مایەر لە کتێبی ( ژیانی من ) دا باس لەوە دەکات، چۆن لە کاتە سەختەکاندا داوود بنگۆریۆن یەکەم سەرۆک وەزیرانی ئیسرائیل، ڕایسپاردوە بچێت بۆ ئەمریکا بۆ کۆکردنەوەی فاند و کۆمەک لە نێو جالیەی جولەکەدا لە ئەمریکا، زۆر جار دوو ئەوەندەو زیاتریش پارە کۆدەکرایەوە لەو بڕەی کە خۆیان پێشبینیان کردبوو، شایانی ووتنە دواتر گۆڵدا مایەر لە ساڵی ١٩٦٩ تا ١٩٧٤ بوو بە یەکەم سەرۆک وەزیرانی ژن لە ئیسرائیل. بۆیە وا دەردەکەوێ لە قۆناغی یەکەمدا پلان و بەرنامەی ئەمریکاو ئیسرائیل کۆتاییهێنان بێ بە دۆسیەی غەززە، نرخ و بەهای جێبەجێکردنی ئەم پلانەش هەرچیەک بێ بۆ ئیسرائیل و ئەمریکاش گرنگ نیە. هەرچی حەماسیشە هیچ کارتێکی بەدەستەوە نەماوە بەکاری بهێنێت، هەرچەندە باس لە ئازادکردنی بارمتەکانیش دەکرێت، بەڵام پێموانیە ئیتر گرنگیەکی ئەوتۆی مابێ، لەبەرئەوەی جگە لەو بارمتانەی کە ئاڵوگۆڕیان پێکرا و ئازادکران، ئەوانەی ئێستا لای حەماس ماون بەشی زۆریان لە ژیاندا نەماون، ڕەنگە لە ئێستادا بیست دانەیەکیان بە زیندوویی لای حەماس مابن، بۆیە بۆ حەماسیش ئیتر ئەو کارتە بەهێزە نەماوەو ئیسرائیلیش لەبەر خاتری بیست بارمتەی زیندوو، سڵ لە جێبەجێکردنی پڕۆژە گەورەکەی خۆی ناکاتەوەو وەک قوربانی بۆ دەسکەوتە گەورەکەی ئیسرائیل لێی دەڕوانێ و ڕەنگە دواتر مۆنۆمێنتێکیشان لە تەلئەبیب بۆ دروست بکەن.کۆبوونەوەی لوتکەی عەرەبی و ئیسلامیش لە دەوحەی پایتەختی قەتەر خوێندنەوەی جیاوازی بۆ کرا، کە تێیدا باس لە پێکهێنانی هاوپەیمانێتیەکی عەرەبی ئیسلامی هاوشێوەی ناتۆ کرا لە دژی جموجۆڵ و پلان و هەڕەشەکانی ئەم دواییەی ئیسرائیل لەسەر وڵاتانی ناوچەکە. بەڵام لە کۆتاییدا لە مانۆڕێکی سیاسی و هەڵوێست نیشاندان شتێکی تری لێ نەهاتە بەرهەم، سەرەنجام بەڕۆشنی دەرکەوت کە هەموو دەنگە بەرهەڵستکارەکانی ئیسرائیل لە ناوچەکە، دەنگی بێ هێز و بێ کاریگەرن، ئەمەش بۆ ئیسرائیل و ئەمریکاش نوێ نیە و هەر لە دوای دروستبوونی دەوڵەتی ئیسرائیل وڵاتانی دژە جولەکە، بەتایبەتیش وڵاتانی عەرەبی هەر بەو ڕیتمە ڕێبازی بەرهەڵستکاریان گەیاندۆتە ئەمڕۆ.لە حەوتی ئۆکتۆبەری ٢٠٢٣ ش ڕێکخراوی حەماس باشترین بیانووی دابەدەستەوەو دەستی ئیسرائیلی بۆ کۆتاییهێنان بە دۆسیەی عەززە بەتەواوی کردەوە، بۆیە جگە لە هێرشی سەربازی بۆ سەر غەززە، کوشتنی ئیسماعیل هەنیە لەناو جەرگەی پایتەختی ئێران و دواتر لەناوبردنی سنوار و سەرکردەکانی تری حەماس، کوشتنی نەسروڵای سەرۆکی حزبوڵا و لێدانی حوسیەکانیش لێکەوتەو دەرئەنجامی ئەمە بوون. بێمەوە سەر کرۆکی بابەتەکە، کە دانپێدانانی ئەو ووڵاتانەیە بەدەوڵەتی فەڵەستین و هێنانەوەی پرەنسیپی چارەسەری دوو دەوڵەتی بۆ سەرمێز لە دوو هەفتەی ڕابردوو. ناکرێ ئەم بابەتە بە چاوێکی ڕۆمانسیانە و دوور لە واقیعی حاڵ و لێکدانەوەی هاوکێشە سیاسیەکان سەیر بکرێت. پێش هەرشتێک پێویستە ئەوە لەبەرچاو بگیرێ کە زۆرینەی وڵاتانی ڕۆژئاوا هاوپەیمانی ئیسرائیلن و لە سەروی هەمووشیانەوە ئەمریکا، بەریتانیا، کەنەدا، فەرەنسا، ئەڵمانیا و زۆرێک لە وڵاتانی تری ئەوروپا. لە سەرەوەش ئاماژەم پێدا چۆن پێکهاتەی جولەکە کاریگەری سیاسی و ئابووری و دیپلۆماسی بەسەر زۆرینەی وڵاتانی بەشی خۆرئاوای جیهاندا هەیە، بۆیە هەموو ئەم وڵاتانە و بەتایبەتیش فرەنسا و کەنەدا و بەریتانیا لەو ڕاستیە زۆر بەئاگان، کە بڕیاری کۆتایی دراوە سەبارەت بە کۆتاییهێنان بە دۆسیەی غەززە، وە لە لایەن ئیسرائیلەوە چۆتە بواری جێبەجێکردن بە پاڵپشتی تەواوی ئەمریکا.نەتانیاهۆش لە کۆبوونەوەی نەتەوە یەکگرتوەکان ئەو ڕاستیەی درکاند، کە زۆرینەی ئەو وڵاتانەی کە لەسەرەوە نیگەرانی سەبارەت بە جەنگی غەززە دەردەبڕن، لە ژێر مێزدا دەستخۆشیان لێدەکەن. هەموو ئەمانەو پاڵپشتی تەواوی ئەمریکاش وای لە ئیسرائیل کردووە، بێباکانەو بە تەواوی بڕوا بەخۆبوونەوە لە ماوەیێکی کورتی زەمەنیدا سەرەڕای بەردەوامی جەنگی غەززە، گورز لە سوریا، لوبنان، یەمەن بوەشێنێ و جەنگی دوازدە ڕۆژەش لەگەڵ ئێران بەڕێوەببات و دواجاریش هێرش بکاتە سەر دەوحەی پایتەختی قەتەر بۆ کوشتنی سەرکردەکانی حەماس، جارجارەش لەگەڵ تورکیا ئاڵوگۆڕی هەڕەشەو چاوسوورکردنەوەش بکات، لە نەتەوە یەکگرتوەکانیش پەیامی بۆ میلیشیای حەشدی شەعبی عێراقیش نارد، لە بچوکترین جولەی دژ بە ئیسرائیل لەناویان دەبات. بۆیە ڕەنگە داننان بە دەوڵەتی فەڵەستین لە لایەن ئەم وڵاتانەی ڕۆژئاوا مەبەست لە دەوڵەتی فەڵەستین بێت لە کەرتی ڕۆژئاوا، کە ئەویشیان هەر ناکرێ و خۆشیان ئەمە باش دەزانن، چونکە ئەگەر کۆدەنگی نێودەوڵەتی و هەرێمایەتیش هەبێ بۆ ئەمە، ئەوا نە عەرەب و فەڵەستینیەکان بەم سنوورانەی ئێستا ڕەزامەند دەبن و نە ئیسرائیلیش بە سنورەکانی پێش ساڵی ٧٣ . بۆیە نیاز لەو داننانە یەکەم:&nbsp;وەک نیشاندانی هەڵوێستێکە بۆ ڕای گشتی جیهانی عەرەبی و دووەمیش بۆ چاوبەستی سیاسی و لادانی فۆکۆسە لەسەر کۆتاییهێنان بە غەززە.

شاهۆ پاڵانی

خوێندنەوەی دیوی شاراوەی دانپێدانانی بەریتانیا , فەرەنسا و کەنەدا بە فەڵەستین

جوڵە و پشێویە سیاسی و سەربازیەکانی ئەم دواییەی کارەکتەر و بەشداربوانی ناو بازنەی ڕووداوو و گۆڕانکاریەکانی وڵاتانی ناوچەکە، بە ئەمریکاو تەواوی ڕۆژئاواشەوە چەند ئاماژەیەکی لێ دەخوێندرێتەوە. کە یەکێک لەوانە هەڵگیرسانەوەی جەنگێکی ترە لەناوچەکە، کە ڕەنگە ئەمجارەیان وا بەئاسانی دانەمرکێتەوەو درێژە بکێشێ تا ئاستی هەموارکردنەوەی سایکسپیکۆ و داڕشتنەوەی نەخشەی ناوچەکە بەپێی خواستی بەرژەوەندیەکانی ئەمریکاو ئیسرائیل، چونکە سەدەیەک بەسەر ئەم دابەشکاریەدا گوزەراوەو هەل و مەرجی ناوچەکەو جیهانیش تەواو جیاوازە لە هەل و مەرجی ئەوسا. ئێستا ململانێی وڵاتانی ناوچەکەو دروستبوونی زلهێزی هەرێمایەتی نوێ دۆخێکی تازەی هێناوەتە ئارا، کە دوور و نا هاوسەنگە لەگەڵ بەرژەوەندیەکانی ئەمریکا و ئیسرائیل ی هاوپەیمانی، کە لەماوەی حەفتا ساڵی ڕابردوودا بووەتە زلهێزێکی بەتوانای ناوچەکە.ئەمەش وایکردوە ئیسرائیل بیر لە پڕۆژەی کۆریدۆری داوود بکاتەوە، کە ڕێڕەوێکی ئابووری مەزن و جیۆپۆلیتیکی گرنگە، کە ئیسرائیل بە هەرێمی کوردستانەوە دەبەستێتەوەو هەژموونی ئیسرائیل بەسەر تەواوی ناوچەکەدا باڵادەست دەکات و ئاسایشی زامن دەکات، لەهەمانکاتدا هاوتەریب و هەماهەنگە لەگەڵ خواست و بەرژەوەندیەکانی ئەمریکا. کۆریدۆرەکە جگە لەوەی سوودی جیۆپۆلیتیکی هەیە و هەژموونی باڵای هێز بەسەر تەواوی ناوچەکەدا دەسەپێنێ، لەهەمانکاتدا لە ڕووی ئابووریشەوە هێندە گرنگە بەجۆرێک دەبێتە ڕێڕەوێکی گرنگی بازرگانی و دەبێتە ڕیگەیەک بۆ گواستنەوەی نەوتی دێرەزوور و ڕەققە و تەنانەت نەوتی هەرێمی کوردستانیش بۆ سەر دەریا، ئەوەش فاکتەریێکی بەهێز دەبێت بۆ کەمکردنەوەو دابەزینی بەرچاوی ڕۆڵی تورکیا لە ناوچەکەو لەدەستدانی گرنگی جیۆسیاسی و مانای بێ بایەخبوونی دەگەیەنێ.هەربۆیە تورکیا ئۆقرەی لەبەر بڕاوەو نازانێ چۆن هەڵسوکەوت لەگەڵ ئەم دۆخە نوێیەی ناوچەکە بکات، دەوڵەت باخچەلی هەر زوو هەستی بە مەترسیەکە کردبوو و لەگەڵ ئەدۆگان ئەم پرۆسەی بەناو ئاشتیەیان ووڕوژاند، ئەمەش تەنها و تەنها هەوڵێکە بۆ گۆڕینی ئاڕاستەی تەوژمی گۆڕانکاریەکان و هەوڵی دوورخستنەوەی کوردە لە هاوکێشە نوێیەکەدا، کە خەریکە بەرژەوەندی نەتەوەیی لە چوارچێوەی پڕۆژەکەی ئیسرائیل جێگا دەگرێت. ئەوتا باخچەلی هەڕەشەی هێرشی سەربازی لە هێزەکانی سوریای دیموکرات دەکات، لەئەگەری تێکەڵنەبوون بە سوپای سوریا و ڕێکنەکەوتن لەگەڵ دیمەشق، یاخود هەر جۆرە هەوڵێک لەژێر ناوی لامەرکەزی و فیدراڵی لە سوریا. ئەردۆگان لە کۆبوونەوەی شانگهای تەواو بێزاری خۆی بەرامبەر بە ئیسرائیل دەخاتەڕوو و هەڕەشەی ئەوش دەکات کە ئیتر قبوڵی ناکەن ئیسرائیل دەست لە پشتی کورد بدات لە سوریا، ئەمەش وەک هەڕەشەو ناڕاستەوخۆ چونە جەنگ لەگەڵ ئیسرائیل لێکدەدرێتەوە، لە لایەکی ترەوە دەڵێ کورد لە هەر کوێیەک بێت برای ئێمەیە و هەڕەشەش لە ئیسرائیل دەکات کە کورد بەکارنەهێنێت بۆ مەرامەکانی خۆی. هەموو ئەو دڵەڕاوکێ و تەنگەنەفەسیەی تورکیا توشی هاتووە، بە هۆی پڕۆژەی کۆریدۆری داوود و بێبایەخ کەوتنی تورکیایە لەناوچەکە، لەهەمانکاتدا هاوتەریب بوونی بەرژەوەندی کوردە لەگەڵ پڕۆژەکەی ئیسرائیل، بۆیە کورد پێویستە زۆر بەوردیەوە مامەڵە لەگەڵ ئەم دۆخە بکات و هەلی مێژوویی لەدەستنەدات و لە ئاستی ڕووداو و پێشهاتەکان بێت.کۆمەڵێک فاکتەر هەن بۆ ڕەخساندنی ژینگەیەکی لەبار بۆ سەرخستنی پڕۆژە دیزاینکراوەکەی ڕێڕەوی داوود لە لایەن ئیسرائیل، لەوانە ڕوخانی ڕژێمی ئەسەد، نەمانی مەترسی پرۆکسیەکانی ئێران، لاوازی حکومەتی سوریای دوای ئەسەد و پاشاگەردانی و نەبوونی سوپایەکی بەهێز، لە لایێکی ترەوە بوونی پێکهاتەی نەتەوەیی و ئاینی و مەزهەبی جیاواز، کە لەلایەن گروپە چەکدارەکانی سەربە حکومەتی کاتی و لەژێر ناوی سوپای سوریادا، دوچاری هەڕەشەو هێرش و پەلاماردان و کوشتنی بەکۆمەڵ دەبنەوە، بەجۆرێک دەرگای دەستوەردانی بۆ ئیسرائیل ئاوەڵا کردووە، کە لەم سۆنگەیەوە ئیسرائیل پرەنسیپی پاراستنی پێکهاتەکان جێبەجێ دەکات، بەجۆرێک پشتیوانی و کۆمەکیان دەکات تا دەرفەتی خۆسەری و فیدراڵیان بۆ بڕەخسێنێ، بەتایبەتیش بۆ دروز و کورد کە دەکەونە بازنەی پڕۆژە دیزاینکراوەکەی. بینیمان ئەمریکاش لەو بارەیەوە هەڵوێستی خۆی ڕاگەیاند و لەسەر زاری تۆم باراک ئەوەی خستە ڕوو کە جۆرێک لە فیدراڵی باشترین بژاردەیە بۆ سوریا و ناڕاستەوخۆش باسی هەموارکردنەوەی نەخشەی سایکسپیکۆی کرد، ئەمەش بەو مانایە دێت کە ئەمریکا هەوڵی هەموارکردنەوەی سایکسپیکۆ دەدات و ناڕاستەوخۆش دەستی ئیسرائیلی بۆ ئەم پڕۆژەیە ئاوەڵاکردووەو بنکە سەربازیەکانیشی لە باکورو ڕۆژهەڵاتی سوریاو بنکەی تەنەف لە سێگۆشەی سنوری عێراق، سوریا و ئوردن هاوکارو پشتیوان دەبن. جەنگی دوازدە ڕۆژەی ئیسرائیل ئێرانیش، بۆ تاقیکردنەوەو هەڵسەنگاندنی توانای ئاستی سەربازی و ڕاددەی هێزی بەرگری ئێران بوو لەلایەن ئیسرائیل و ئەمریکا. ئێرانیش ئەو ڕاستیە باش دەزانێ و ترس و نیگەرانیشی لە دووبارەبوونەوەی ئەو جەنگە بە ڕوونی پێوەدیارە، بەتایبەتیش لەدوای پەڕوباڵکردنی پرۆکسیەکانی ئێران لە دەرەوەی سنورەکانی و گەیشتنی جەنگ بۆ بەردەرگا و ناو جەرگەی وڵاتیش. بۆیە خۆکۆکردنەوەی ئێران بۆ جەنگێکی لەم شێوەیە بە ڕوونی دیارە و هەموو هەوڵێک دەدات، ڕێککەوتنی ئەمنی لە نێوان ئێران و عێراق لە دوو حەفتەی ڕابردوو هەر لەم چوارچێوەیە بووە و بەدەرنیە لە هەماهەنگی نێوانیان بۆ ئەگەری پێشهاتێکی وا. بۆیە ئەمجارە نەک عێراق لە جەنگەکە تێوەدەگلێت، بەڵکو بەهۆکاری دابەشبوونی هەرێمی کوردستان بەسەر هەردوو جەمسەری ناکۆک، پڕوشکی ئاگرەکە بەر هەرێمی کوردستانیش دەکەوێت.لەگەڵ ڕوخانی ڕژێمی ئەسەد و هاتنەسەر دەسەڵاتی هەیئەی تەحریر شام بە سەرۆکایەتی ئەحمەد شەرع (ئەبو محەمەد جۆلانی) ئیسرائیل کاتی بەفیڕۆ نەداو دەستوبردی کرد لە خاپوورکردنی ژێرخانی سەربازی سوریا کە ، وەک ئامادەکاریەک بۆ ڕێگە خۆشکردن لە پێناو خستنە سەر ڕێگای پلانە ستراتیژیەکانی خۆی بۆ قۆناغەکانی داهاتوو، کە ئامانج لێی فراوانخوازی و پڕۆژەی ئیسرائیلی گەوەرەیە لە ڕێگای جێبەجێکردنی کۆریدۆری داوود. جگە لەوەش لە دوای حەوتی ئۆکتۆبەر هەمووان شایەتی ئەوە بووین، کە چۆن گورزی کەمەرشکێنی لە حەماس داو سەرکردە باڵاکانیشی بەئامانج گرتن و لەناوی بردن. چارەنووسی حزبوڵڵاش لەوەی حەماس باشتر نەبوو و دەستێکی بەسەرکردەکانی دا هێناو ڕایماڵین بە حەسەن نەسروڵڵا شەوە، ئێستا پێگەی حیزبوڵا گەیشتۆتە دوا قۆناغی پوکانەوەو کار بەوە گەیشتوە، حکومەتی لوبنان تاوتوێی چەککردنیان بکات.بۆیە گروپەکانی ناو بەرەی مقاوەمە بەتەواوی بێخێر کرابوون و ئەوەی تروسکاییەکی بۆ ئێران هێشتبۆوە، حوسیەکان و حەشدی شەعبی و گروپە وەلائیە شیعەکانی عراق بوون، لە چەند ڕۆژی ڕابردووش بە ئامانجگرتنی سەرۆک وەزیر و چەند وەزیرێکی تری حوسیەکان ئەم تروسکاییەشی کوژاندەوە، هەرچی حەشدی شەعبی و گروپەکانی عێراقیش لە دۆخێکی وادا نین کە خۆزگەیان پێ بخوازرێ، ئەوەتا جگە لە فشار و هەڕەشەکانی ئەمریکا بۆ سەر حکومەتی عێراق بۆ هەڵوەشاندنەوەی حەشدو گروپە وەلائیەکان، دەستیشیکردوە بە کشانەوەی بەشێکی بەرچاوی هێزەکانی لە بنکە سەربازیەکانی وەک عەین ئەسەد و ئەوانی تر، وە جێگیرکردنی بەشێکیان لە هەرێمی کوردستان و ئەوانی تریش لە باکور و ڕۆژهەڵاتی سوریا کە لەژێر هەژموونی هەسەدە و ئیدارەی خۆسەری ڕۆژئاوای کوردستانە، کە ئەمە ئاماژەیە بۆ ئەوەی لەکاتی هەڵگیرسانی جەنگدا حەشد و گروپەکانی تر هێرشی توندیان دەکرێتە سەر و چارەنوسێکی باشتر لە حەماس، حزبوڵا و حوسیەکانی یەمەن چاوەڕێیان ناکات. بۆیە جەنگی بەوەکالەت و بەرەی مقاوەمە دواساتەکانی ژیان و هەناسەکانی خۆی دەژمێرێ.هەموو ئەو فاکتەرانە ئەوەمان پێدەڵێن، کە جەنگەکە نزیک بۆتەوە، گۆڕانکاریەکان خێران، پڕۆژەی کۆریدۆری داوودیش بڕیاری لێدراوەو تەنها پەیوەندی بە کاتەوە هەیە، ڕەنگە پرسیاری ئەوە بکرێ، کە تورکیا ئەندامی ناتۆ و هاوپەیمانی ڕۆژئاوایە، چۆن دەکرێ خواستەکانی فەرامۆش بکرێت، بەڵام دنیای سیاسەت وادەخوازێ، کاتێک بژاردەی باشتر و ئەلتەرناتیڤی بەهێزترت هەبێ، بەجۆرێک هەموو دەستکەوتەکانت بۆ فەراهەم بکات و هاوبەشە کۆنەکەشت بێ کاریگەر بکات، ئیتر بۆچی سڵی لێبکەیتەوە!!؟

بابەتەکانی شاھۆ پاڵانی

خوێندنەوەی دیوی شاراوەی دانپێدانانی بەریتانیا , فەرەنسا و کەنەدا بە فەڵەستین

ڕێڕەوی داوود بڕیاری لێدراوەو مانایەکیش بۆ سایکسپیکۆ نەماوەتەوە