نەک کەرکوک موسڵیش بەشێکە لەکوردستانی باشورو ویلایەتی موسڵ هەمیشە باشوری کوردستان بووە، ئەوە باسی بەدرەو جەسان و زڕباتیەو شارەبان و ئەو شوێنانە هەر مەپرسە، کورد لەبەر ئەوەی نەیتوانیوە وەک ئەوانی تر سود لەدینی ئیسلام وەربگرێ بۆ خۆ خاوەنی ودینەکەی وەک پیرۆزیەکی ڕەها وەرگرتوە، جگە لەوەش هەرگیز نەیداوەتە سەر شارو گوندێکی ئەوانی ترداو بیانکوژێ و ئەنفالیان بکات و داگیری بکات، بەردەوام پێدەشتەکانی بۆ ئەوانی تر بەجێهێشتووە، ئەگەر کەرکوک عێراقێکی بچوکە ئەی بۆ دڵی کوردستانە، ڕاستی دەبێ ئەو جۆرە قسانە وەڵام بدرێتەوە، جاخۆبەغداش کوردوعەرەب و تورکمان و جوو کلدۆئاشورو هتدی تیایە ئەی ئەوێ کوێی بچوکە تورکیا، یان سعودیە؟؟. کەرکوک شارێکی کوردستانی سەد دەر سەتە، داگیرکراوە، عەرەباندن و بەعساندن و شیعاندن و تورکاندن و هەموو ستەمێکی تیاکراوە، سەت ساڵ لەمەو بەر بە ڕێژەی نەبوو عەرەبی تیابووە، سەت ساڵە گۆڕانکاری نەرێنی تیا دەکرێت، کورد هەمیشە ئامێزی بۆ بەلەنگازو داماوان کردوەتەوە، بڕۆن لە بەساڵاچوانی شوان و جەباری و زەنگەنە و داوێ و تاڵەبان بپرسن، دواتریش خەڵکی تر بەکەڵەگایی و بەپاڵپشتی دەسەڵات هاتون، مرۆڤ لاڵ نابێ گەر ئەم ڕاستیانە بڵێت. دەربارەی تورکمانی کەرکوک زۆربەیان بەبنچینەو ڕیشە کوردن ئەمە من نایڵێم مێژوو حەقیقەت دەیڵێ، پێنجسەت ساڵ سەردەستی تورک ئەوانی کردوە بە خوێنەوارو مەئمورو بەرپرس زۆرێکیش بۆ پلەو پۆست ڕەگی باوکیان گۆڕیوە، عوسمانی پێنجسەت ساڵ تورکاندنی کردوە، بۆ ئەوە ناوی گوندو شارۆکەو شوێن و ئەوانە شاهیدن،&nbsp;بەرەی تورکمانیش خۆ ئەگەر عێراق مسقاڵێ سەروەری هەبێت دەبێت هەڵیبوەشێنێتەوە، چونکە ڕاستەوخۆ لینکی بەوڵاتێکی ترەوەیەو لەوێ پارەو مەشقوشتی دیکەش دەکات، ئەو وڵاتەش بەردەوام لەسەری دێتە دەنگ و دەستوەردان لەعێراق دەکات، شەرمە دەوڵەت بیت و نەتوانی ڕەگی جاسوسی&nbsp;ئاشکرا نەک شاراوە ببڕیت.خەڵکی کەرکوک دەتوانن بەیەکەوە بەئارامی بژین پێویستیان بەئامۆژگاری و قسەی زلی کەس نیە، لەو خەڵکە گەڕێن با کەمێ بحەسێنەوە، هەر دڵۆپە خوێنێکی کەرکوکی بڕژێ بە ئەستۆی ئەوانەیە کە ئاژاوە گڕدەدەن.

لەتیف فاتیح

کەرکوک عێراقێکی بچوک نیە

ئەگەر مرۆڤ خۆی تەرخانبکات بۆ وەڵامی ئەو هەموو نائاوەزیەی بەرپرسانی کوردستان، دەبێت تەمەنی نوح داوا بکات،&nbsp;ئەوانەی کەدەڵێن پارەو موچە چیەو خەڵک لەبرسا نەمردوە، هەریەکەو بای هەزار ساڵ گەندەڵی و دزی و فزیان کردووەو هەرچی نەشێ کردویانە بۆئەوەی بۆ دە نەوەی داهاتوشیان بخۆن وبڕێن و بخەون، ئەوان ئاگایان لەوپاکەوانە نیە کە موچەکەی نەبێ دەبێ دەست پانبکاتەوە، ئاگایان لەوهەموو دەرچووەدانەمەزراوەی زانکۆو پەیمانگایانە نیە، کەڕوویان نایەت داوای هاوکاری لەدایک و باوکیشیان بکەن، ئەوان لەبری ئۆتۆمبیلی دوامۆدێل فڕۆکەو لەبری جادەی پڕتاسەو کەندو لەند جادەی تایبەت و کارەبای فول و زانکۆی تایبەت و لەماڵەکانیاندا مەلاوانگەو هۆڵی وەرزش و ساوناو باڕو، سینەماو هەرچی دەڵێی هەیانەو دێن باسی ئازادی بێ نان بۆ خەڵک دەکەن، وەک ئەوەی خەڵک نەزانێ سی و سێ ساڵە ئەوان چی دەبەن و چی دەدزن، ئەوان ڕۆژگارێ ئەو تەحین و دۆشاوەشیان دەدزی کەهاوپەیمانان بۆ خەڵکیان دەهێنا، ئەو کاوجۆیەشیان دەخوارد، کەڕێکخراوێک بەخێر بۆ گوندە وێرانەکانی دەنارد، ئازادی ڕووت بەبێ قوت درۆیەکی گەورەیە، بڕۆن سەیری خوان و گیرفانی هەژارەکان بکەن، نەک خوان و گیرفانی خۆتان. باسی ئازادی بۆ برسی قسەی قۆڕ زیاتر نیە، نەخۆش و بەلەنگازو پێ پارەو دەربەدەر چی لەو ئازادیە بکەن کەتۆ بەویستی خۆت چوار چێوەت بۆ کێشاوەو تەنها لەوێدا قەبوڵی دەکەی کەتۆ گەورەو سەردار بیت و هیچ قسەیەک لەقسەتا نەکرێت، تۆ پێت وایە ئێمە لەنرخی ئازادیە ساختەکەی تۆ ناگەین. ئێمە ئێستا تاریکی دەخوێنینەوە، دەزانین لەم سەردەمەداو لەنێو تاریکیەکی نوتەکدا چی دەگوزەرێ و کێن حاکمە نهێنیەکانی نێو ئەو تاریکیە،ئێمە ئیتر خەڵکانی بێ ئاگاو کزۆڵە نین، دەزانین هەر ئێستا لەمۆسکۆ پۆتن بیر لەچی دەکاتەوە، لات وایە ناتوانین خەیاڵی خۆێنین و خۆڵاوی تۆ بخوێنینەوە، ئازادیەکەی تۆ لەوێدا دادەخرێت کە جیاواز لەبینینی تۆ شتەکان ببینین، ئازادیەکەی تۆ دەتەوێ ئێمەی پێ فری بدەی ماڵە باجێنەی دەستی خۆتەو هیچی تر. خەڵک پێویستی بەقوت و موچەیە دواتر ئازادی ڕاستینە، ئازادی بئ کۆت و بەندی دەسەڵات، ماخوداش نانی نەخستوەتە پێش ئازادیەوە، وەک چۆن ئێمەش دەڵێین نان و ئازادی،کەمێک لەبەهەشتەکەی خۆت وەرە دەرەوەو سەیر ئەو دۆزەخە بکە کەبەناوی ئازادیەوە بۆ خەڵکت چێ کردوە.

لەتیف فاتح فەرەج

نان و ئازادی

1هه‌ڵبه‌ت ئه‌گه‌ر له‌ناو خۆدا ته‌باو ڕێك بن، له‌ خه‌می هاونیشتمانی و میله‌ته‌كه‌دا بن ، لانی كه‌م سه‌باره‌ت چاره‌سه‌ری كێشه‌كان، پرسی موچه‌، یه‌كخستنه‌وه‌ی پێشمه‌رگه‌، پرسی كه‌ركوك&nbsp;و ناوچه‌ دابڕێنراوه‌كان یه‌كهه‌ڵوێست بن، به‌رژه‌وه‌ندی گشتی بخه‌نه‌ سه‌رو به‌رژه‌وه‌ندی تایبه‌تی و حزبیه‌وه‌و سه‌رۆكی حكومه‌ت و جێگرو وه‌زیرو گزیرپیاوی حكومه‌ت بن و كه‌متر پیاوی حزب بن، ده‌كرێت بڵێن سبه‌ینێ‌ باشتر ده‌بێت له‌ ئێستا، به‌ڵام به‌م ئاوه‌زو ئاكارو سیاسه‌ته‌وه‌ هه‌رگیز سبه‌ینێیه‌كی باشتر بونی نیه‌ .2گوێنه‌گرتن له‌ خواستی مامۆستایان، ئه‌وانه‌ی ئه‌حمه‌د شه‌وقی به‌ پێغه‌مبه‌رانیان ده‌چوێنێت، هه‌ر گوێ‌ نه‌گرتن نیه‌ له‌وان، هه‌وڵه‌ بۆ په‌راوێزخستنی ته‌واوی كۆمه‌ڵگه‌و گه‌مژه‌كردنیان، داخستنی ده‌رگای قوتابخانه‌كان به‌و جۆره‌ به‌رهه‌مهێنی گه‌مژه‌ییه‌، به‌رپرسی ئه‌م تاوانه‌ گه‌وره‌یه‌ له‌ ئه‌ستۆی سه‌رۆكی حكومه‌ت و جێگره‌كه‌یدایه‌، چونكه‌ نه‌گوێ‌ له‌ مامۆستایان ده‌گرن ، نه‌له‌گه‌ڵیان داده‌نیشن، نه‌باكیان به‌ وێرانكردنی په‌روه‌رده‌یه‌ له‌ سنوری سلێمانی و گه‌رمیان و ڕانیه‌و شوێنه‌كانی دیكه‌، ئه‌و ناوچانانه‌ی كوره‌ی شۆڕش و دژایه‌تی سته‌مكارین .3هاواره‌كه‌ی مه‌سعودی نانه‌وا&nbsp;هاواری هه‌موو هه‌ولێرو دهۆكه‌، تێناگه‌م چۆنیه‌ پارتی له‌بری هه‌ڵوه‌سته‌كردن له‌سه‌ر ئه‌و هاواره‌، دێت هه‌موو ناجۆریه‌كان په‌رده‌ پۆش و ناشرینیه‌كان جوانده‌كات و هه‌موو ئه‌وانه‌ش به‌ دوژمن ده‌زانێت كه‌ له‌خه‌مخۆریه‌وه‌ هاواری چاكسازی ده‌كه‌ن،&nbsp;مادام كار گه‌یشته‌ هاوار با حكومه‌تی پارتی له‌بری گرتن و سزا بیر له‌وه‌ بكاته‌وه‌ چی بكرێت باشه‌، بۆئه‌مه‌ش هه‌ر قوربانی دانێك ئه‌ركێكی ئاكاریه‌، مه‌سعود نه‌ قسه‌ی زبری كرد نه‌ هه‌ولێریه‌كانی ناشرین كرد، شه‌ڕه‌كه‌ش شه‌ڕی ئه‌ووهه‌ولێریه‌كان نیه‌ ،شه‌ڕه‌كه‌ شه‌ڕی چاكسازی و چاره‌سه‌رو گۆڕانكاری ڕیشه‌ییه‌، كه‌ موچه‌ نه‌بێت نه‌ك&nbsp;ده‌ نان سه‌ت نانیش بكه‌ی به‌ هه‌زار فلسێك ناهێنێ‌، پاره‌ نیه‌ كێكی چی بخۆن .4ئه‌و&nbsp;داتایه‌ی سنوری گه‌رمیان كه‌له‌باره‌ی هاوسه‌رگیری و هه‌ڵوه‌شانه‌وه‌ی خێزانه‌وه‌ بڵاوكراوه‌ته‌وه‌، ته‌واوی دام و ده‌زگا دادوه‌ری و كۆمه‌ڵایه‌تی و ئاینیه‌كان ده‌خاته‌ ژێر پرسیاره‌وه‌و حكومه‌تیش به‌رپرسیار ده‌كات له‌وه‌ی كه‌ به‌ دواداچوونی ورد بۆ ئه‌م دۆخه‌ بكات و پرسیاری ئه‌وه‌ بكات ئه‌و دۆخه‌ شێواوه‌ خێزانی و كۆمه‌ڵایه‌تیه‌ی چه‌ند ساڵێكه‌ ئه‌م وڵاته‌ی گرتوه‌ته‌وه‌ هۆكاره‌كانی چین ، له‌و سنوره‌ له‌ ساڵێكدا 2618 هاوسه‌رگیری كراوه‌و 1352 هه‌ڵوه‌شانه‌وه‌ی خێزان و ته‌ڵاق ڕویداوه‌، ئه‌مه‌ مه‌ترسیدار نه‌بێت هیچ مه‌ترسیدار نیه‌، هه‌ڵبه‌ت بۆ ئه‌م تێكچونه‌ كۆمه‌ڵایه‌تی و خێزانیه‌ هۆكار زۆرن ، نه‌بونی، لێكنه‌گه‌یشتن، بارو دۆخی ئابوری و كۆمه‌ڵایه‌تی، نه‌بونی بژێوی وكاربه‌ڕێكردی خێرای دادوه‌ره‌كان و نه‌بونی ئامۆژگاری و هتد ، له‌هه‌مووشی خراپتر ئه‌وه‌یه‌ مه‌لایه‌ك به‌ كۆڵێك ڕیشه‌وه‌ له‌ كه‌ناڵێكی ئاسمانیه‌وه‌ به‌ خاتونێك بڵێت له‌ هاوسه‌ره‌كه‌ت جیابه‌ره‌وه‌و داواكارێكی گشتیش نه‌بێت ڕایكێشێته‌ به‌رده‌م دادگا، مۆدێل و به‌ربادییش له‌ولاوه‌ بوه‌ستێت .

كوردستان ئارام نیه‌

له‌ كۆبونه‌وه‌ی لوتكه‌ی وڵاته‌ عه‌ره‌بی و ئیسلامیه‌كان كه‌ له‌&nbsp;سعودیه‌&nbsp;سه‌باره‌ت غه‌زه‌ به‌سترا ، زۆر سه‌رۆك و شاو ئه‌میر قسه‌یان كردو زۆربه‌ی قسه‌كانیش گله‌یی برایانه‌ بوون له‌ ئیسرائیل ، متوه‌یه‌ك بێده‌نگیم هه‌ڵبژارد به‌ڵكو خودایه‌ كوردێك له‌ سه‌ر قسه‌كانی دوو سه‌رداری ئێران و توركیا شتێك بڵێت نا ، نه‌بوو . ئه‌گه‌ر ئه‌وه‌ی ئه‌ردۆغان و ڕه‌یسی وه‌ك دوو سه‌رۆكی توركیاو ئێران گوتیان دوو وه‌زیر بیانگوتبا ، دوو دووفه‌رمانده‌ی سه‌ربازی ، ره‌نگه‌ هیچ پێویستی به‌ هه‌ڵوه‌سته‌ نه‌كردبا ، لێ‌ ئه‌وان دوو سه‌رۆكی دوو وڵاتی زه‌به‌لاحن كه‌ سه‌دان ساڵه‌ كورد كوشت و بڕ ده‌كه‌ن ، ژن و منداڵ ده‌كوژن . من له‌ كه‌ناڵی ئاسمانی كوردسات ته‌ماشای لێدوانه‌كانی ئه‌و دووه‌م ده‌كرد ، كه‌ هه‌ردوك ئاگریان له‌ هه‌ناوی به‌ربووبوو بۆ غه‌زه‌ ، لێ‌ بوێری ستۆپێكیان نه‌بوو له‌ ئیسرائیل ، ئه‌و دووه‌ باسی كوشتنی ژن و منداڵیان ده‌كرد ، هه‌ر له‌و سه‌رو به‌نده‌ی پیاوانی ئه‌وان به‌ به‌رچاوی دنیاوه‌ ژن و منداڵی كورد ده‌كوژن ، زۆر نیه‌ له‌ ڕانیه‌ فڕۆكه‌ی توركی دوو خاتونی بریندار كرد ، پێشتریش خاتونێكی به‌ ڕومه‌تی له‌ گوندی خۆیان هه‌ر له‌و ده‌ڤه‌ره‌ شه‌هید كرد ، ئیدی منداڵ كوشتنیش له‌ كورته‌كه‌وه‌ تا كانی ماسی و شه‌نگال و عفرین&nbsp;هه‌رمه‌پرسه‌ . كاسبكاری كورد ده‌كوژن ، كۆڵبه‌ری كورد ده‌ده‌نه‌ به‌ر ڕێژنه‌ی گوللان ، ئازادیخوازی كورد له‌ دار ده‌ده‌ن ، له‌ سه‌ر وشه‌ زیندانه‌كان پڕده‌كه‌ن له‌ كوردی به‌شه‌ره‌ف ، ته‌نانه‌ت مافی بینین له‌ سه‌ردارو سه‌رۆكی كوردان له‌ زیندان قه‌ده‌غه‌ ده‌كه‌ن، له‌و لاشه‌وه‌ شین و شه‌پۆڕی ژن و منداڵی غه‌زه‌ییانه‌ . چه‌ند قشت ده‌ڵێن ئیدانه‌ی كوشتنی ژن و منداڵی بێتاوان ده‌كه‌ین ، وه‌ك ئه‌وه‌ی ژن و منداڵی كورد تاوانباربن ، وه‌ك ئه‌وه‌ی كورد بوون تاوان بێت ، مۆراڵ بۆ سه‌رباز زۆر گرنگ نیه‌ ، لێ‌ بۆ سه‌رۆك گرنگه‌ ، چونكه‌ مۆراڵ بۆ سه‌رۆك په‌یوه‌سته‌ به‌شه‌ره‌فه‌وه‌ ، مۆراڵی له‌ق بێت شه‌ره‌فیشی له‌قه‌ . چه‌ند شه‌رمه‌ مرۆڤ برینی دورترببینێت و برینه‌خوێناویه‌كانی ده‌ستی خۆی نه‌بینێ‌ .

مۆراڵ و سه‌رۆك

بۆ به‌ دیهاتنی سه‌ربه‌خۆی نه‌ك هه‌ر بۆ باشوری كوردستان ، بۆ هه‌موو كوردستان كه‌س له‌ خۆم له‌ پێشتر نابینم ، ئه‌وه‌ وێڕای ئه‌وه‌ی به‌ كرده‌وه‌و به‌ به‌ڵگه‌ش كارم بۆ به‌ دیهاتنی ئه‌و هیواو ئومێده‌ هه‌میشه‌ گه‌شه‌ كردووه‌ ، ئه‌مه‌ نه‌ته‌وه‌گه‌ری كوێرانه‌ش نیه‌ وه‌ك ئه‌وه‌ی ناسیونالیستانه‌ بیر بكه‌مه‌وه‌ ، ئه‌مه‌ بڕوابوونه‌ به‌ ئازادی و خۆخاوه‌نی ، له‌ پێش ڕیفراندۆم به‌ ماوه‌یه‌كی زۆر هه‌میشه‌ بیرمان له‌وه‌ ده‌كرده‌وه‌ كه‌ی ده‌كرێت سه‌ربه‌خۆو ئازادبین ، هه‌ڵبه‌ت له‌ باره‌ی ده‌ستورێك بۆ كوردستانیشه‌وه‌ له‌ كه‌ركوك چه‌ندین دانیشتنمان كردو له‌ زۆربه‌یاندا من قسه‌ كه‌ری سه‌ره‌كی بووم ، ده‌یان وتاریشم له‌ سه‌ر ده‌ستورو پرسی كه‌ركوك نووسی ، وه‌ك چۆن بۆ ڕیفراندۆم و ڕاپرسی یان گشتپرسیش چه‌ندین وتارم نوسی و چه‌ند ڕۆژێكی كه‌م پێش ڕیفۆاندۆم داوام له‌ دۆستێك كرد ئه‌ركی چاپكردنه‌كه‌ی بگرێته‌ ئه‌ستۆ وتی باشه‌و به‌ڵام نه‌یكرد ، له‌ ژیاندا چه‌ندین باشه‌و به‌ سه‌رچاوی بێ‌ ئه‌نجاممان وه‌رگرتووه‌،ئه‌ویش چووه‌ سه‌ر ئه‌وانی دیكه‌ .ئێمه‌ دركمان به‌وه‌ كرد ڕیفراندۆم به‌و شێوازه‌و به‌و بێمنه‌تیه‌ و به‌و سوربوونه‌ جگه‌ له‌ باڵۆنێكی به‌تاڵ هیچی تر نیه‌ ، مه‌ترسی له‌ ده‌ستدانی كه‌ركوك و ناوچه‌كانی دیكه‌شمان به‌ به‌رنامه‌و به‌ نووسین و كۆڕ گرتن له‌ چه‌ندین شوێن باسكرد ، هه‌وڵی زۆریشمان دا ئه‌و ڕاستیانه‌ بگه‌یه‌نینه‌ شوێنی خۆی ، ته‌نها یه‌ك شه‌و پێش 25ی 9 به‌رپرسێكی كه‌ركوك پێی وتم دڵنیابه‌ له‌ كه‌ركوك ناكرێت ، كراو ئه‌نجامه‌كه‌یشیمان بینی ، من ده‌زانم زۆرێك خه‌ڵكی دڵسۆزو خه‌مخۆرو كورد په‌روه‌رو پڕهیوا له‌و په‌ڕی بێگه‌ردی و پاكیه‌وه‌ ئه‌و ڕۆژه‌ چوون و وتیان به‌ڵێ‌ ، ئه‌وان به‌شی زۆریان بڕوایان وابوو سه‌ركردایه‌تیه‌كه‌ له‌ هه‌نگاوه‌كانی پاشگه‌ز نابێته‌وه‌و ئاماده‌كاری زۆر پێشهاتی كردووه‌ ، وا ده‌رنه‌چوو ، نه‌ئاماده‌ كاری و نه‌هیچ ، به‌ توندیش به‌رپه‌رچی ماكگۆرك و تیله‌رسن و دۆسته‌كان درایه‌وه‌ ،ئێستا هه‌ر بڕو بیانویه‌ك بیهێنرێته‌وه‌ ، هیچ له‌وه‌ ناگۆڕێت&nbsp;ژه‌هری سێوه‌كه‌ تا ئێستاو تا ئه‌مڕۆله‌ نێو گه‌روماندا ده‌گڕێ‌ و به‌ڵێنداره‌كانیش هه‌ر یه‌كه‌و به‌ جانتای پڕی خۆیه‌وه‌ پشتی كرده‌ كورده‌كه‌ .تاڵاوی ڕیفراندۆم ناكرێت گه‌لی كورد بكاته‌ قومار چیه‌ دۆڕاوه‌كه‌و وێڕای ڕوتبوونه‌وه‌ی ته‌واو هێشتا خۆی به‌ براوه‌ بزانێت ، ئێمه‌ دۆڕاین كه‌ ده‌ڵێم ئێمه‌ به‌ هه‌موو ئه‌وانه‌وه‌ كه‌ وتیان به‌ڵێ‌ و ئه‌وانه‌شی نه‌چوون وئه‌وانه‌ش كه‌ وتیان نه‌خێر ، دۆڕاین و كه‌سیش له‌و به‌رپرسانه‌ دۆڕانه‌كه‌ی نه‌خسته‌ ئه‌ستۆی خۆی، نه‌ك ئه‌وه‌&nbsp;&nbsp;ته‌نانه‌ت له‌ ناو حزبێكی وه‌ك یه‌كێتیدا كابرا له‌ بری ئه‌وه‌ی دان به‌ دۆڕانه‌كه‌دا بنێت ده‌هات هاوحزبیه‌كانی خۆی تۆمه‌تبار ده‌كرد، ئه‌مه‌ جۆرێكه‌ له‌ خۆ دزینه‌وه‌ی حوشتر ملانه‌ ، ئه‌وه‌ش كه‌ سور بووله‌ سه‌ر كردنی له‌ بری ئه‌وه‌ی بڵێت ببورن كات و ساته‌كه‌ گونجاو نه‌بوو كه‌وته‌ وێزه‌ی خه‌ڵكی تر ، ئه‌مه‌ به‌ جۆرێك له‌ جۆره‌كان شێواندنی دیرۆك و خۆ پاككردنه‌وه‌یه‌ له‌ شكست،دوای شه‌ش ساڵ كه‌ به‌ سه‌ت ساڵ له‌ كورد ڕۆی ، ئێمه‌ هێشتا باج ده‌ده‌ین و زڕ براكانی ده‌وروبه‌ریش خۆشاوی شكستی ئێمه‌ ده‌خۆنه‌وه‌ له‌ بای بای عیراقه‌وه‌ به‌ فه‌ڕمی وه‌ك ده‌رۆزه‌ كه‌ر ئێمه‌یان نارده‌وه‌ به‌رده‌م ده‌رگای به‌غداو خڕ موحتاجی ده‌ستی خاتوو ته‌یف سامیان كردین ، سه‌یریش له‌وه‌دایه‌ ده‌ڵێن نابێت بڵێن شكست بوو ، ئاخر خواتان بێت بۆ ئه‌و خۆشیه‌تان له‌و بابایه‌ تێك دا كه‌ پاسه‌پۆرته‌ عیراقیه‌كه‌ی دڕاندو هه‌ڵپه‌ڕكێكه‌یتان كرده‌ ئه‌وه‌ی وابزانێ‌ ڕادیۆ بوو ، یان ئه‌و مامۆستایه‌ی وتی له‌ته‌ورات و ئینجیل و قورئانا وتراوه‌ كه‌سێك به‌ ناوی بارزانی ده‌وڵه‌تی كوردی دروستده‌كات ، هه‌ڵبه‌ت پێشتری وت ، من ده‌مه‌وێ‌ بیری بخه‌مه‌وه‌ ، ئاخر كێ‌ دڵخۆش نه‌بوو ، كێ‌ نه‌یووت بای بای عیراق ، جگه‌ له‌وانه‌ی ئێوه‌ هه‌زار تۆمه‌ت و ناووناتۆره‌تان دایه‌ پاڵیان ، هه‌موو ئه‌و خاوه‌ن به‌ڵێ‌ جوانانه‌تان ئیحراجی به‌رده‌م به‌غدا كرده‌وه‌ .ریفراندۆم به‌و جۆره‌ی كراو به‌و شێوه‌یه‌ی لێی پاشگه‌ز بوونه‌وه‌ هه‌ره‌سی خه‌ونی نه‌ته‌وه‌یه‌ك بوو كه‌هیچی له‌ ئاشبه‌تاڵی بزوتنه‌وه‌ی چه‌كداری ئه‌یلول كه‌متر نه‌بوو ، له‌به‌ر ئه‌وه‌ی بۆ ماوه‌یه‌كی دورو درێژ خه‌ڵكی له‌ خۆخاوه‌نی نائومێدو بێهیوا كرد ، ئه‌وه‌ جگه‌ له‌وه‌ی لێكه‌وته‌كانی دواتری بووبه‌ هۆی په‌رت بوون و هه‌لا هه‌لا بوون و ته‌خوینی یه‌كترو شكاندنی شكۆی كورد، ئه‌و نه‌ته‌وانه‌ی كه‌ له‌ ناو خه‌باتی ڕزگاریدان هه‌میشه‌ ڕابه‌ره‌كانیان ده‌بنه‌ فریادڕه‌س و گه‌ل له‌ قۆناغێكه‌وه‌ ده‌گوازنه‌وه‌ بۆ قۆناغێكی تر ئه‌مه‌ تا ئێستاش له‌ زۆر وڵات و شوێن درێژه‌ی هه‌یه‌ له‌ كوردستان ئه‌مه‌ ته‌واو پێچه‌وانه‌ بووه‌وه‌ كاتێك ته‌واوی سه‌ركرده‌و ڕایه‌دارانی سه‌ری سه‌ره‌وه‌ی ریفراندۆم وتیان نه‌ڕیفراندۆم بۆ سه‌ربه‌خۆی بوو ، نه‌ئێمه‌ ده‌مانه‌وێت له‌ عیراق جیا بینه‌وه‌، ئه‌وه‌ له‌ كاتێكا پێش پرۆسه‌كه‌ باسی ئه‌وه‌یان ده‌كرد كه‌ ده‌كرێت دوو دراوسێی باش بین له‌ گه‌ڵ عیراق ، ئه‌و شكسته‌ گیانیه‌ی توشی كورد كرا تا ئێستا به‌رینه‌داوه‌ بۆیه‌ به‌ ناچاری هه‌موو ئه‌وانه‌ی به‌ڵێیان كرد، ده‌یانه‌وێت بیانوو بۆ ئه‌و به‌ڵێیه‌ بێننه‌وه‌و بۆ ئه‌مه‌ش ده‌ستی تاوانباری بۆ خه‌ڵكانی تر درێژ ده‌كه‌ن ، له‌ ڕاستیدا ئه‌گه‌ر پاشگه‌ز بوونه‌وه‌ نه‌بوایه‌ هه‌ر ئه‌وه‌ ڕویده‌دا كه‌ ئێستا ڕووده‌دات و كۆسته‌كه‌ له‌وه‌ زیاتر نابوو كه‌ ئێستا تێیداین ، ئه‌مه‌ش پێمان ده‌ڵێت باشه‌ ئه‌گه‌ر ریفراندۆم سڕنه‌كرایه‌و هه‌ڵنه‌وه‌شایه‌ته‌وه‌ چی له‌مه‌ خراپتر ڕووی ده‌دا، ئه‌مه‌ ئه‌و پرسیاره‌یه‌ كه‌ هه‌قه‌ ئه‌وانه‌ی خه‌ڵكیان خسته‌ هه‌ڵپه‌ڕكێ‌ بێ‌ هه‌ڵچوون و تانه‌و ته‌شه‌ر وه‌ڵامی بده‌نه‌وه‌ .

بابەتەکانی لەتیف فاتح فەرەج

کەرکوک عێراقێکی بچوک نیە

نان و ئازادی

كوردستان ئارام نیه‌

مۆراڵ و سه‌رۆك

به‌ یادی بای بایه‌كه‌وه‌