&nbsp;&nbsp;شەڕی ڕاگەیاندنی نێوان پارتی و یەکێتی لەم ساڵانەی دواییدا هێندە قێزەون بووە لە قۆناغی ڕەخنەی سیاسی دەرچووە و گەیشتووەتە ئاستێک کە دەتوانین ناوی بنێین خۆکوژیی سیاسی یان سووتاندنی کارتە نیشتمانییەکانیشی لەگەڵدا.​لێرەدا چەند سەرنجێکی وورد لەسەر ئەم ئاست نزمبوونەوەیە و لێکەوتەکانی دەخەینە ڕوو:١- &nbsp;گواستنەوەی کێشەکان بۆ دەرەوە (بەغدا و وڵاتانی تر):​ئەوەی جێگەی داخە، ئێستا هەردوو لایەن بۆ لێدان لە یەکتر پەنا دەبەنە بەر ناوەندە دەرەکییەکان، ئەوەش بەڕوونی وەدیدەکرێت کاتێک بەرپرسێکی باڵا دەچێتە بەغدا یان پایتەختێکی ئەوروپی و لەوێ لە جیاتی بەرگریکردن لە قەوارەی هەرێم، خەریکی باس کردنی گەندەڵی و کەم و کوڕی لایەنەکەی ترە کە زۆر جارە لەمیانەیاندا بەشێک لە حەقیقەتی یەکتریش دەخەنە ڕوو، ئەمەش وای کردووە پێگەی هەرێم بەرامبەر بەغدا یان وڵاتانی هەرێمی لاواز دەربکەوێت و ئەو دوولایەنەش بێ بەهاتر لەچاو پێشتریان سەیر بکرێن تەنانەت یاریشیان پێ بکرێت، هاوکاتیش ​لەلایەن کۆمەڵگەی نێودەوڵەتیەوە بەجۆرێک متمانەیان لەدەستداوە کە چیتر وەک هاوبەشێکی جێگیر سەیری هەرێم نکرێت.​٢- ئاستی نزم و (تەشهیر) لە میدیای سێبەردا:​شەڕەکە تەنها لە میدیا فەرمییەکاندا نییە، بەڵکو گواستراوەتەوە بۆ سوپایەکی ئەلیکترۆنی و میدیای سێبەریش کە ​تایبەتمەندیە کەسیەکانیش لەبەرچاو ناگیرێن تەنانەت پەلاماری ژیانی تایبەتی و خێزانی یەکتریش دەدەن، دەمێکیشە ​زمانی زبر بۆتە هەوێنی پرسەکانیان کە ئەوەش هەر بۆخۆی بەرهەمهێنانی کلتوورێکی سیاسی زۆر خراپە و ئاسەواری بۆ نەوەی نوێ و داهاتوومان جێدەهێڵێت.​٣- دژبەری پیرۆزبایی و ڕق:​ئێوە سەیر بکەن ئەم دوو لایەنە کاتێک "عەلی زێدی" یان هەر کەسێکی تر لە بەغداوە پۆست وەربگرێت یا وەریگرتبێت تەنها ئەوەنەبێت کە کورد بێت، بەوپەڕی دیپلۆماسییەت و زمانێکی نەرمەوە پیرۆزبایی لێ دەکەن و باوەشی گەرم و یەکتر گوشین و ماچەکان شاهێدی دەدەن، کەچی بۆ یەکتر زمانی ئاگر و ئاسن و تەخوین بەرامبەر یەك بەکار دەهێنن ئەمەش نیشانەی ئەوەیە کە ئیرادەی ڕێککەوتنی ناوخۆیی نییە، واتا بۆ بێگانە نەرمن، بەڵام بۆ هاوخوێن و هاوبەشی ناوخۆیی توند و دەمارگیر دەوەستنەوە، بەجۆرێک بەرژەوەندی حیزبی لە سەرووی بەرژەوەندی نیشتمانییەکان دەبینرێن، چونکە لای ئەوان گرنگ نییە حکومەتی هەرێم پەکی کەوتووە یا نا ، بەڵکو گرنگ ئەوەیە کێ پشکی شێری لەولا بەردەکەوێت!​٤- لێکەوتە مەترسیدارەکان:​ئەم شەڕە ڕاگەیاندنە تەنها قسە نییە، بەڵکو کاریگەری ڕاستەوخۆی هەیە لەسەر ​ساردبوونەوەی خەڵک لە هەڵبژاردن و تەواوی پڕۆسەی دیموکراسی کاتێک خەڵک دەبینێت دوای ساڵێک لە هەڵبژاردن هێشتا شەڕە جنێو قایمترە لە خەمی پێکهێنانی حکومەت و گرێدانی کۆبوونەوەکانی پەرلەمانی کوردستان کە دەیان و سەدان کێشە هەروا بە هەڵپسێردراوی ماونەتەوەو کەس مێش میوانی نییە، هەموو ئەمانەش​دابەشبوونی کارگێڕی (دوو ئیدارەیی) قوڵتر دەکاتەوە و مەترسی ئەم زمانە زبرو ڕقە بێ مۆڕاڵەیان زەمینە خۆشتر دەکەن بۆ ئەوەی هەرێم لە ڕووی کردارییەوە ببێتە دوو ناوچەی لێکدابڕاو، کە ئەمەش گەورەترین هەڕەشەیە بۆ سەر داهاتووی کورد. ​لەکۆتایی دەمەوێ ئاماژە بە پرسێکی هەستیار بکەم، ئەویش زۆرجار ئەم شەڕە ڕاگەیاندنانە وەک دوکەڵێک بەکار دەهێنرێن بۆ شاردنەوەی شکستی کارگێڕی و نەبوونی خزمەتگوزارییەکانیان، تا هاوڵاتی لە جیاتی داواکردنی مافەکانی، سەرقاڵی ئەو ململانێ بێ ئەنجامانە بێت کە لە میانەی بەرژەوەندیە ناڕەواو کەسیەکانیان بەرهەمیان هێناوە.&nbsp;

دارەوانی مام نوری

برینە قووڵەکەی جەستەی سیاسیی هەرێمی کوردستان

&nbsp;ڕاگەیاندن بەسەرجەم کەناڵەکانیەوە بە سۆشیال میدیاشەوە، بەسەرچاوەیەکی گرنگ و سەرەکی پەروەردەکردن و هۆشیاری کۆمەڵایەتی دادەنرێن، بەڵام مخابن لەو هەرێمەی ئێمە کە تائێستا بە ئامانجی خۆی نەگەیشتوە دەپرسین ئایا شایستەی ئەوەیە بەو دەردە ببردرێت و لەشکرێک لە میدیای جۆراوجۆری قین لەدڵی بارگاویکراو بە عەقڵیەتی دۆگمای حزبی، دووژمن بە نیشتیمان و خزمەت بەبێگانە، هەرچی لەدەستیان دێت ژەهر دەرخواردی هاونیشتیمانیانیان بدەن !؟لێرەدا ڕایدەگەینین کەوا ڕشتنی ژەهری کوشندە لەلایەن میدیاو سۆشیال میدیاوە خۆی لە بڵاوکردنەوەی زانیاری بەردەوامی نادروست و هەڵە و چەواشەکاری بێ بنەما دەبینێتەوە، بەجۆرێک پەیامەکانیان لە هەموو ئاداب و ئەخلاقیاتێکی تەندروست دەردەچن و پابەندی هیچ بنەمایەی ئیتیکی پیشییانەی ئامانجدار بە پەروەردەکردن و بەرزکردنەوەی ئاستی هۆشیاری کۆمەڵگا ناگرێتەوە. لە ماوەی چەند ساڵی حکومڕانی حزبەکانی دەسەڵاتدار لەهەرێمی کوردستان، لەگەڵ هەرپێشهات و گۆڕانکاریەکی سیاسی یا لەگەڵ ئامادەکاری و دەسپێکردنی هەڵمەتی هەڵبژاردنەکاندا، بەردەوام لەپاڵیدا هەڵمەتی (ژەهردەرخۆر)ی خەڵکیان کردۆتە پیشەیان و هەرچی وشە و ڕستەی چەمکی نەشیاوی دوور لە ڕەوشتی کۆمەڵایەتی هەیە کە شایستەی گووتن نین، خستویتیانە ناو ئەدەبیاتی پەیام و تێکستەکانی ناو کەناڵ و میدیاکانیانەوە، هێندە زێدەڕۆیی لەسەرکراوە و چەندبارە بۆتەوە، ئاکارەکە بەشێوەیەک تەشەنەی کردوە، دەتوانین بڵێین وەکو نەریتێکی نەخوازراو جێی خۆی کردۆتەوە، جێگای داخە بەشێک لە کەناڵەکانی دەرەوەی جووت حزبیش بەهەمان پەتا ئاڵوودە بوونەو خوویان پێیانەوە گرتووە، وەكو ئەوەوابێت ئەوە ڕێگا ڕاستەکە بێت لاساییان کردوونەتەوە ، کە ئەمەیان هێندەی دیکە دۆخەکەی مەرتسیدارتر کردۆتەوە. کردەوە دزێوەکانش بەم شێوانە ئەنجام دەدرێن:١-هەڵبژاردنی ناونیشان و ناوەڕکی بابەت و ریپۆرتاژ وهەواڵ و سەردێروبندێرەکانیان سەرنجی خەڵک بەلاڕێدا دەبەن، بەجۆرێک چەواشە دەکرێن تائاستی ئەوەی بابەتە گرنگ و سەرەکیەکانی ژیانگوزاری وەک کێشەی( ئاو ، کارەبا ، مووچە، نەوت ، نیشتەجێبوون ، هەلی کار و ناوچە جێناکۆکەکان....هتد) لەبیر خەڵك ببەنەوە.٢- لەئەگەری خستنەڕووی هەر پرسێک لە کێشە چارەنووسازەکانی تایبەت بە خەڵكیشەوە، ئەوان تائاستی ئەوەی کە بەرژەوەندیەکانیان پارێزراوە، تەنها ئەو ڕووە نمایش و پەخش دەکەن کە خۆیان مەبەستیانە، بە درۆی ڕتووشکراو و درووشمی قەبەی لەچەشنی بەرژەوەندی باڵای خاک و وڵات و ئاسایشی نیشتییمانی هێندەی دیکە پرسەکان بەلاڕێدا دەبرێن.٣- هەمیشە پەیامە ناڕاست و نالۆژیکیەکانیان بەبەردەوامی دووبارەو چەندبارە دەکەنەوە، تاوەکو لە زهنی خەڵک بچەسپێنن کە ئەوەی ئەوان نمایشی دەکەن ڕاستیەکی یەقینە.٤- زۆربەی جار زمانێکی تایبەتی هەڕەشەئامێز و مەترسیدار لە پەیامەکانیان بەکاردەهێنن تاوەکو مۆتەکەیەک لەلای خەڵكی دروست بکەن و جورئەت نەکەن زانیاری زیاتر بەدەستبگەیەنن.٥- لەپێناو پاساوهێنانەوە بۆ پرسە ناڕەواکانیان، بەردەوام لەم بۆنانە چەندین کەسایەتی دیاریکراوهەن لەبەرنامە جۆراوجۆرەکان و چاوپێکەوتن و لێدوانەکاندا دەیانخەنەڕوو، ئەوانیش بێ گوێدانە ئیتیکی سیاسی و ئادابی کۆمەڵایەتی لەغەیری بەرژەوەندی تایبەتی حزبەکانیان بترازێت حساب بۆ هیچیەك لە دۆخی سایکۆلۆژی خەڵک و ئابووری بازاڕو و بوارەکانی دیکە ناكەن، هەرچی قسەی نەگوتراوو نەشیاوە ریزبەندی دەکەن، بەدراسەکردنی ئەو مێژووەی کە ئەزموونیان کردووە، جێی داخە ژمارەیەک لەو وشە و دەستەواژانە بوونەتە ئیدیۆم و لەسەر زاران دەگوترێنەوە.٦- بەکارهێنانی وێنەو وێنەڤیدیۆی چەواشەکارانە، کە بەمەبەستی ئامانجێکی دیاریکراوی حزب بەجۆرێک لەجۆرەکان مۆنتاژ دەکرێن تەنهاو تەنها مەبەستیان شکاندنەوەی لایەن و کەسی بەناونەیاریانە، ئەوەشیان یەکێکی دیکەیە لە ئاکارە ناڕەواکانی مرۆڤایەتی و دووریشە لە هەموو بەها جوانەکانی پێکوەژیان و ئاشتەوایی کۆمەڵایەتی.&nbsp;&nbsp; &nbsp;&nbsp;&nbsp;&nbsp;&nbsp;&nbsp;&nbsp;

بابەتەکانی دارەوانی مام نوری

برینە قووڵەکەی جەستەی سیاسیی هەرێمی کوردستان

ئەو ژەھرەی لە رێگەی ڕاگەیاندن دەڕشترێت