زیاد لە جارێکە دۆناڵد ترەمپ، سەرۆکی ئەمریکا، تۆمەتی دزینی چەک دەخاتە پاڵ کوردەکان، قسەکانی بۆ هەر مەبەستێک بن و هەر ئامانجێکی سیاسییان لە پشتەوە بێت، هیچ لەو ڕاستییە ناگۆڕێت کە ئەم جۆرە لێدوانانە بێڕێزین بەو قوربانییە گەورانەی کورد لە شەڕی دژ بە تیرۆردا پێشکەشی کردووە. جەنابی سەرۆک؛ پێویستە لەبیرت نەچێت کە کورد بە درێژایی مێژووی دوور و نزیکی خۆی، ئەزموونێکی تاڵ و پڕ لە برینی لەگەڵ متمانە کردن بە ئێوە چەشتووە. ئێوە دۆستە کوردەکانتان دەیان جار وەک کارتی فشار بەکارهێناوە و لە نیوەی ڕێگەدا بە تەنیا جێتان هێشتوون. سەیرە جەنابی سەرۆک؛ تۆ کە لە دووریی هەزاران کیلۆمەترەوە فڕۆکەوانێکی ونبوو دەدۆزیتەوە و لە کۆنگرە ڕۆژنامەوانییەکانتدا دەیکەیتە گەورەترین دەستکەوتی مێژووی نوێی وڵاتەکەت، چۆنە ئێستا نازانیت چەکەکانت لەکوێن؟ ئایا ئەمە نیشانەی پرسیار ناخاتە سەر سیستەمە وردەکەت، یان ئەمە تەنها بیانوویەکە بۆ یارییەکی سیاسی نوێ؟ کورد تا ڕادەیەکی زۆر لەوە تێگەیشتووە کە تۆ دەتەوێت گەلی ئێمە پەلکێشی ناو شەڕێک بکەیت کە سەرەنجامەکەی تەنها بۆ بەرژەوەندی ئێوە ڕوونە. ئەزموونی ڕۆژئاوای کوردستان (سووریا) باشترین بەڵگەیە بۆ ئەو بێ متمانەییەی لای ئێمە دروست بووە؛ چونکە لای تۆ سیاسەت تەنها لە یەک هاوکێشەدا کورت بووەتەوە: "چەند دەدەیت، تا بتپارێزم!"&nbsp;جەنابی سەرۆک؛ پێویستە ئەوە بزانیت کە بە پارە دەتوانیت هەموو جۆرە چەکێک دروست بکەیت. بە پارە دەتوانیت پێشکەوتووترین تەکنەلۆژیا بەدەستبهێنیت و گەورەترین و ئامادەترین سوپا پێکبهێنیت و هەرچییەکت بووێت ئەنجامی بدەیت، بەڵام هەرگیز ناتوانیت "دۆز" و "باوەڕ" بۆ مرۆڤەکان دروست بکەیت.

زۆزک سابیر

جەنابی سەرۆک؛ ئێمە چەکمان نەدزیوە، ئێوە متمانەتان دزی!

پاراستنی هەرێمی کوردستان لەلایەن حکومەتی فیدراڵییەوە "خێرێکی سیاسی" یان "منەت" نییە کە لایەنێک بەسەر لایەنێکی تردا بیبژێرێت؛ بەڵکو ئەرکێکی دەستووریی و نیشتمانییە و تاقیکردنەوەیەکی گەورەیە بۆ چەسپاندنی چەمکی دەوڵەتداری.کاتێک هێرشە مووشەکی و درۆنیەکان ڕۆژانە دەکرێنە سەر هەرێمی کوردستان هیچ کاردانەوەیەک لە لایەن بەغداوە هەست پێناکەین، ئەم بێدەنگیی و بێدەسەڵاتییەش وای لە گروپە لە یاسادەرچووەکان کردووە وەک "گوڵۆپێکی سەوز" و چرایەکی ڕێگەپێدان بیبینن بۆ بەردەوامبوون لە تێکدانی سەقامگیری هەرێم، بەتایبەت کاتێک سزایەکی کردەیی و لێپرسینەوەیەکی یاسایی نەبێت.لێرەدا تەنیا باس لە کێشەیەکی سیاسی ناکەین، بەڵکو باس لە پێشێلکردنی ڕاشکاوی ماددەی 110ی دەستووری عێراق دەکەین. ئەم ماددەیە دەسەڵاتی دارشتنی سیاسەتی ئاسایشی نیشتمانی و پاراستنی سنوورەکانی عێراقی "تەنیا و تەنیا" بە حکومەتی فیدراڵی بەخشیوە. کەواتە، کاتێک گروپە چەکدارەکان بە ئارەزووی خۆیان خاک و ئاسمانی وڵات بۆ مەرامی تایبەت بەکاردەهێنن، ئەمە سووکایەتیکردنە بەو دەسەڵاتە دەستوورییەی کە دەبوو بەغدا وەک "پارێزەری سەروەری" پیادەی بکات. بێدەنگیی بەغدا، واتای پاشەکشەکردنی دەوڵەتە لەو ئەرکە تایبەت و ناچارییەی کە دەستوور بۆی دیاری کردووە.مەحاڵە عێراق بە هەموو دەزگا ئەمنی و هەواڵگرییەکانییەوە نەزانێت ئەو گروپانە کێن و ئامانجیان چییە؛ بۆیە کێشەکە لە نەزانیندا نییە، بەڵکو لە نەبوونی ئیرادەدایە. بۆردومانکردنی ڕۆژانەی شارەکانی هەرێم پێمان دەڵێت: عێراق هەرچەندە وەک ناو لەسەر نەخشەی جیهان ماوە، بەڵام لە ناوەوە سەروەرییەکەی لەدەست داوە. ئێستا بڕیاری سیاسی و سەربازی لە دەستی دەوڵەتدا نییە، بەڵکو لە ژێر هەژموونی چەند گروپێکی لادەردایە کە ئەجێنداکانیان لە سەرووی بەرژەوەندی نیشتمانییەوە داناوە.

بابەتەکانی زۆزک سابیر

جەنابی سەرۆک؛ ئێمە چەکمان نەدزیوە، ئێوە متمانەتان دزی!

پاراستنی هەرێم ئەرکە نەک منەت!