با بە پێش ڕووداوەکان نەکەوین، چونکە رێبەری بزاڤەکە ڕوون و ڕاشکاو دەلێ،بەرپرسیارێتی مێژوویی ئەم بانگەوازە دەگرمە ئەستۆ. بانگەوازی بەڕێز عەبدولڵا ئۆجەلان بۆ ئاشتی و کۆمەڵگەی مەدەنی، کە دوێنێ بە زمانی کوردی و تورکی لە لایەن ئەحمەد تورک و پەروین بۆلدان خوێندرایەوە و پاشان دەقی بانگەوازەکە بە خەتی دەستی ئۆجەلان بلاوکرایەوە، شەپۆلێک لێکدانەوەی جودا، پێشوازی لێکردن و پشتگیریی لێکردنی لە ئاستی بەشەکانی کوردستان، تورکیا و نێودەوڵەتان لێکەوتەوە.پەیامی ئۆجەلان ڕوونە، پێویستی بە شرۆڤە و لێکدانەوەی زۆر نییە، چونکە ؛1. ناوەڕۆکی ئەو بانگەوازە بەدەر نییە لە سیاسەتی گشتیی و گوتاری سیاسی پەکەکە لە چارەکە سەدەی ڕابردوودا، واتە نوێ نییە.2. ئەو بانگەوازە دەستپێشخەرییەکی دیکەی ئۆجەلانە، بۆ دەستپێکردنەوەی پرۆسەی ئاشتی ساڵی 2013، لەو جێگەیەی تێیدا وەستا.3. بانگەوازەکەی ئێستا، لە ناوەڕۆکی پەیامی عەبدولڵا ئۆجەلان بۆ نەورۆزی ساڵی 2015، کە لە شاری ئامەدی باکووری کوردستان خوێندرایەوە، بوونی هەیە، لەوێش باسی قۆناخێکی نوێی خەبات و کۆتاییهێنان بە خەباتی چەکداری و داوای بەستنی کۆنگرە لە پەکەکە هەیە، دیسان ئەوەش نوێ نییە. بەڵام ڕەوشەکە نوێییە.4. ئۆجەلان دەلێ: منیش لەم پرۆسەیەدا بانگەوازی چەکدانان دەکەم و بەرپرسیارێتی مێژوویی ئەم بانگەوازە دەگرمە ئەستۆ، ئەمە نوێیە.5. لە ناوەڕۆکی بانگەوازەکەدا، پەکەکە و شۆڕشی چەکداری ئامانج نییە، ئامرازە. دەڵێ پەکەکە لە سەدەی بیستەمدا، لە سەدەیەکی هەرە توندوتیژی مێژوودا دامەزرا. واتە ڕەوایی داوە بە پێویستیی بوونی پەکەکە و سەرهەڵدانی شۆڕشی چەکداری لە بەرانبەر نکۆڵیکردن و قەدەغەکردنی ئازادییەکان. 6. ئامانجی بانگەوازەکە، دەستبەرداربوونی خەبات و چۆکدادان نییە، ئامانج گۆڕینی خەباتە لە قۆناخێکەوە بۆ قۆناخێکی دیکە، گۆڕانی شێوازی خەباتی سیاسییە.7. لە ڕاستیدا ئەو بانگەوازە، بە بانگەوازێکی تاکە کەسی ئۆجەلان ناژمێردرێت، چونکە گفتوگۆ و ڕاگۆڕیینەوە، ڕاستەوخۆ لەگەڵ سەرکردایەتی دەم پارتی هەبووە، لە ڕێگەی شاندی دیار و باوەڕپێکراوی ئیمڕاڵی بە ئاشکرا گفتوگۆ لەگەڵ پارتەکانی تورکیا، هەرێمی کوردستان، پەکەکە هەبووە.8. دەبێ دان بەوەدا بنێین کە دوو پارتی دەسەڵاتدار لە تورکیا، کۆتاییهێنان بە پەکەکە و خەباتی چەکداری دەکەنە بە دەستکەوت بۆ خۆیان، بەبێ دەستکەوتی خۆیان لە پرسەکە نزیک نابنەوە.9. هاوکاتیش کورد پێویستی بە ئاشتییە و ئاشتی چارەسەرە، پەکەکەی ئێستا بریتی نییە لە پەکەکەی دوێنێ و لە حزبێکی سیاسی و بەس، پەکەکە ئێستا بزاڤێکی سیاسی فرە لایەنە و سەدان رێکخراوی سیاسی، پیشەیی، کۆمەڵایەتی، ڕۆشنبیری و نێوەندی دیار و کارای هەیە. 10.پەکەکە و لایەنە سیاسییەکانی کورد لە تورکیا دروشمی سەرەکییان لە قۆناخی ئێستادا، داننان بە ناسنامەی کورد و زمانی کوردییە، لەڕاستیدا ئەگەر دەرفەتی خەباتی سیاسی و مەدەنی هەبێت، خەباتی چەکداری پێویست نییە.11.دواجار لە پرۆسەی ئاشتی، بەرە بەرە کورد دەستکەوتی دەست دەکەوێت، بەڵام هەمووی پێکەوە نا.سەرکەوتنی پرۆسەی ئاشتی بە پلەی سەرەکی بۆ کورد ئامانجە، لە قۆناخی سەرەتایی دا، بەند نییە بەوەی چەند دەوڵەتی تورکیا بە جددی دێتە پێشەوە، بەندە بە یەکڕیزیی کورد، بەندە بە پشوودرێژی، بەندە بەوەی لایەنی کوردی چەند دەتوانێت لە ڕێگەی خەباتی سیاسی و مەدەنی و دیپلۆماسی لە قۆناخی ئاشتی، دەوڵەتی تورکیا ناچار بکات بە سەلماندن و چەسپاندنی مافەکانی گەلی کورد لە دەستووردا.بۆ هەموو لایەك ڕوونە، چارەسەری کێشەی کورد لە تورکیا، لە بەرژەوەندیی تورکیا دایە و هۆکارێکی گرینگە بۆ سەقامگیریی لە ناوچەكە و دەرفەتێکی مێژوویشە بۆ مسۆگەرکردنی پشتیوانی کۆمەڵگەی نێودەوڵەتی بۆ پرسی ڕەوای کورد .ئەوەی ئێمەومانان هەر خوێندنەوەیە، ئەوەی دەتوانێت خاڵ لەسەر پیتەکانی ئەم پڕۆسەیە دابنێ، مانایەکی مێژوویی بە پرۆسەکە بدات، ئۆجەلان و پەکەکە و کۆمەڵگەی کوردیە لە تورکیا، لە دەرەوەی ئەوە ئەم پرسە پێویستیی بە پشتیوانی و پشتگیریی هەیە.

بێکەس قادر 

با بە پێش ڕووداوەکان نەکەوین!

بەر لە هەر شتێک، ئێستا کە قۆناخێكی نوێ لە چارەسەرکردنی دۆزی کورد لە تورکیا بووە بە مژاری گفتوگۆ لە نێوەخۆی تورکیا و بە عەلەنی گفتوگۆ لەگەڵ بەڕێز عەبدولڵا ئۆجەلان دەستی پێکردووە، دەکرێ ئەوە بە دەستپێکی کۆتاییهاتنی قۆناخی نکۆڵیکردن لە کورد و ناسنامەی کورد بژمێرین، لانی کەم دەسەڵاتدارانی تورکیا بە ئاشکرا لە لێدوانەکانیان باس لە برایەتی تورک و کورد دەکەن، باس لە پەندوەرگرتن لە سەد ساڵی رابردووی کۆمار دەکەن و بۆ چارەسەری دۆزی کورد تێگەیشتنی هاوبەش لە نێوان لایەنەکانی دەسەڵات و ئۆپۆزسیۆن بەدی دەکرێت. شارەواوە نییە، کە لە قۆناخەکانی ڕابردوو، گفتوگۆ هەبووە و بە هۆکاری جیا جیا بێئاکام ماوەتەوەو چارەسەرکردنی ئاشتیانەی دۆزی کورد لە ناوەوە و لە دەرەوەدا بێ ئاستەنگ و نەیار نەبووە، ڕاستە ئێستا بەهۆی پێشهاتی نوێ و گۆڕانکاریی لە نەخشەی سیاسی و لە تەرازووی هێز لە ناوچەكە، لە لایەنی خودی و بابەتییەوە، لە ئاستی ناوەوە و دەرەوە ئاماژەکانی ڕەوشێکی لەبار دەرکەوتووە. بەڵام هێشتا ڕاستەڕێکردنی پرۆسەی ئاشتی بێ ئاستەنگ نییە، پرسی کورد لە تورکیا، نەک هەر لە ڕووی سیاسییەوە، بەڵکو لە ڕووی دەستووری و یاساییشەوە، بەسەدان گرێکوێرە گرێدراوە، کردنەوەیان هەروا ئاسان و بێ ئاستەنگ نییە، بەڵام چ زوو، چ درەنگ ، دواجار دۆزی کورد لە تورکیا هەر دەبێ لە ڕێگەی دیالۆگەوە چارەسەر بکرێ و زەمەنی نکۆڵیکردن بەسەر چووە و ئێستا گەلی کورد بۆ خاوەنێتی لە خۆی و ماف و ئازادییەکانی ئامادەیە.دوای ئەوەی شاندی ئیمراڵی چەند دیداریان لەگەڵ ئۆجەلان هەبووە و بە نوێنەرایەتیی ئۆجەلان بە جیا دیداریان لەگەڵ پارتەکانی تورکیا کرد و چەند ڕۆژێک لە باشووری کوردستان دیداریان هەبوو. ئێستا چاوەڕوانی پەیامی دەنگی و ڕەنگی بەڕێز ئۆجەلان دەکرێت، تا گفتوگۆکردن بچێتە قۆناخێکی ئامانجدارەوە. ڕاستە هێشتا لە بەرەکانی شەڕ دەنگی تفەنگ دێ، هێشتا سیاسەتی پێشوو بەکردەوە لە بەرانبەر کورد پیادە دەکرێت، هێشتا هیچ یەکێک لەو یاسایانەی لە دژی کورد داڕێژراوە و بەرکارە، هەموار نەکراوە. بەڵام ئەوەی ڕووی داوە و ئەوەی لە ڕۆژەڤە، نابێ بەکەم تەماشا بکرێ.یەک : ڕێگەدان بە دیدار لەگەڵ بەڕێز ئۆجەلان و خاوەنێتیکردنی لە پڕۆژەی چارەسەری دۆزی کورد لە ڕێی ئاشتی. دوو: زەمینەسازی بۆ دەستپێکردنی پرۆسەی ئاشتی. سێ: بە جودا لە پێشتر، ئەمجارە لە نێو پەرلەمانی تورکیا گفتوگۆ لەبارەی پرسی ئاشتی دەکرێ.چوار : گفتوگۆی ئاشکرا لەگەڵ ڕێبەریی پارتی کرێکارانی کوردستان، واتە دەوڵەتی تورکیا دان بە ڕەوابوونی بزووتنەوە و شۆڕشی چەکداری کورد دەنێت. چارەسەرکردنی دۆزی کورد لە تورکیا، هەر لە بەرژەوەندیی گەلی کورد و بەدیهێنانی بەشێک لە ئامانجە ڕەواکانی نییە، بەڵکوو لە بەرژەوەندیی ئێستا و داهاتووی تورکیایە و کارتێکردنی لەسەر تەناهی و سەقامگیریی ناوچەكەش دەبێت. بەرەوپێشچوونی پرۆسەی ئاشتی لە تورکیا، کارتێکردنی ئەرێنیی لەسەر ڕەوشی کورد لە بەشەکانی دیکەی کوردستان هەیە، بۆیە ئەم پرسە، بە تەنیا پەیوەست نییە، بە پارچەیەکی دیارکراوی کوردستان، بەڵکوو پاڵپشتی و بەرپرسیاریی سەرکەوتنی پرۆسەی ئاشتی ئەرکی بەرپرسیاری بەشەکانی دیکەیە، بە تایبەتی هەرێمی کوردستان. گواستنەوە لە قۆناخی شۆڕش و خەباتی چەکداریی، بۆ قۆناخێکی دیکەی خەبات و مسۆگەرکردنی مافەکانی گەلی کورد، هەم هەستیارە و هەم بەرپرسیارێتیەکی گرینگی مێژووییە، لەو ڕەوشەدا،بزاڤی ئازادییخوازی کورد لە باکووری کوردستان، لە بەردەم تاقیکردنەوەیەکی دیکە و دەرفەتێکی مێژوویی گەورە دایە، ڕاستە دەرفەت هەیە، بەڵام ئاستەنگیش هەیە، سروشتی گفتوگۆ و پرۆسەی ئاشتی و هەنگاونانی بنیاتنەرانە، پێویستیی بە نەخشەڕێگەی ڕاست و دروست و گونجاو هەیە، پێویستیی بە کات و پشوودرێژی و بەردەوامبوون و سوود وەرگرتن لە ئەزموونەکانی ڕابردوو هەیە. سڕینەوەی ئاسەواری یاسایی و دەستووری نکۆڵیکردن لە کورد و ناسنامەی کورد، لە زمانی دایک لە تورکیا، کاریگەری گەورەی دەبێ لەسەر پێشکەوتنی ڕەوشی کورد و خەباتە سیاسیەکەی . بەرەوپێشبردنی پرسی گفتوگۆ و ئەو ڕەوشە لە ئاستی باکووری کوردستان، پێویستیی بە یەکێتیی و یەکڕیزیی هەیە، لە ئاستی بەشەکانی دیکەی کوردستانیش پێویستیی بە پشتیوانی و پشتگیریی هەیە.دواجار گفتوگۆ، شێوەیەکە لە شێوەکانی خەبات و لە قۆناخی ئاشتی و گفتوگۆ خەبات هەر درێژەی دەبێ و کورد خۆی بەرژەوەندیی لە ئاشتی و برایەتی و پێکەوەژیانی گەلانە. ڕۆژانی دادێ نەخشە ڕێی بەڕێز عەبدولڵا ئۆجەلان دەبیستین و دەبینین، ئەگەر دەوڵەت وەڵامی ئەرێنیی و عەمەلی هەبوو، ئەوا پڕۆسەی ئاشتی ڕێگە ڕاستەکە دەگرێ، ئەگەر بێ وەڵامیش مایەوە، تۆپ لە گۆڕەپانی دەوڵەت و پارتە دەستەلاتدارەکانی تورکیا دەمێنێتەوە.

مژاری گفتوگۆی ئاشتی، دەرفەت و ئاستەنگ

تێگەیشتن لە شێواندن باشترە! تێنەگەیشتن لە ناڕەزایەتی دەربڕین، لە خۆنیشاندان، لە مانگرتن لە خواردن، لە شێوازی داواکاریی چین و توێژەکانی خەڵک، ئاستەنگ دروستکردن لە بەردەم بەڕێوەبردنی داواکاریی مەدەنی، فشار خستنەسەر چالاکی مەدەنی، لە هەمووی خەراپتر تۆمەتبارکردنی چالاکە مەدەنییەکان، تێکەڵکردن بە کێشمەکێشی نێوان لایەنە سیاسییەکان خزمەتی گەشەکردنی کۆمەڵگەی کوردستان ناکات.خێمەی مانگرتووانی سلێمانی، مانگرتن لە خواردن، بۆ مانگرتووانی جێگەی ڕێز و بایەخ پێدانە، داواکردنی مووچەی مانگانە لە کاتی خۆی داوایەکی ڕەوایە، وەرنەگرتنی مووچە لەکاتی خۆی و پێنەدانی مووچە ناڕەوا و نایاسایی و نادادپەروەرانەیە،&nbsp;دواخستنی مووچە و بوونی بە سەرچاوەی هەواڵی بەپەلە و بەردەوامبوونی ئەم ڕەوشە بۆ چەندین ساڵ لەسەر یەک، هەم نیشانەی ڕوونی بێباکی و هەم تێنەگەیشتنە لە ڕەوشی ژیانی خەڵک.لە کاتێکدا ئەمە ڕەوشی مووچەخۆرانە،- لە باتی ئەوەی لیستی مووچە لە کاتی خۆی ئامادە بکرێت، کەچی دوادەکەوێت.- لە باتی ئەوەی لیستی مووچەخۆران پاک بکرێت و مووچەخۆری فیعلی و نافیعلی لە یەکتر جیا بکرێتەوە، ئێستا لەسەر بنەمای حزبی مووچەخۆر زیاد دەکرێ،خانەنشین زیاد دەکرێ.- وەزارەتی دارایی حکومەتی هەرێم لیستی مووچەی پێ ئامادە ناکرێ.بەغدا، ئیستغلالی ئەم ڕەوشەی کردووە و چەکی مووچە لە بەرانبەر هەرێم باش بەکاردەهێنێ و ناشیەوێت ئەم چەکەی لە دەست دەربچێت. بۆیە ئەگەر حکومەتی هەرێم و لایەنە دەسەڵاتدارەکانی هەرێم مەبەستیانە کێشەی مووچەی مووچەخۆرانی هەرێم چارەسەر ببێ، دەست لە سیاسەتی تۆمەتبارکردنی مانگرتووان و چالاکانی مەدەنی هەڵبگرن، پێویستە ئەو پرسە هەم لە ئەولەویەتی کارەکانی حکومەت بێ، هەم بە ستراتیژی نوێ سیاسەتی دارایی و پرسی مووچە ڕەنگڕێژ بکرێت.ئومێدەوارم خەباتی مەدەنی مامۆستایان، هەر بواری مووچە نەگرێتەوە، بەڵکو بەرەنگاربوونەوەی فۆرمی حزبیش بگرێتەوە لە بەڕێوەبردنی پەروەردە و خوێندن و کار و باری خوێندنگەکان دا.

بێکەس قادر

تێگەیشتن لە شێواندن باشترە!

دوای ڕوخانی ڕژێمی بەعس لە ساڵی 2003 دا، دەرگە بە ڕووی دامەزراندنی خەڵک کرایەوە لە دەزگەکانی حکومەتی هەرێمی کوردستان، دەزگە و فەرمانگەکان لە پێویستیی خۆیان پتریان تێخزێنرا، ئەمە لەلایەک و لەلایەکی دیکەشەوە بە لێشاو خەڵک بە ناونیشانی جۆراوجۆر خانەنشینی بۆ کرا.یەک: دامەزراندن و خانەنشینکردن ئامانجی ئابووری و خۆشگوزەرانی لە پشت نەبوو، جگە لە پێکهێنانی لەشکرێک لە خەڵکی حزبی.دوو: لە دامەزراندندا، نەک هەر هیچ پێوەرێک ڕەچاو نەکرا، بەڵکو پێشێلی بنەماکانی کارگێڕی و پێوەرەکانی دڵسۆزی، ڕاژە، بڕوانامە، توانا و لێهاتوویی کرا.سێ: لە بواری خانەنشینکردن، هەموو سنوورێک تێپەڕێندرا، بە ناونیشانی پێشمەرگەی دێرین، پێشمەرگە و غەیرە پێشمەرگە، خەڵکی ئاسایی و نائاسایی، تەنانەت جاش و باش پێکەوە خانەنشین کرا.چوار : لیستی سەروەرانی گەل و نیشتمان پاک ڕانەگیرا و هەتا ئێستاش هەروا ماوەتەوە.پێنج : لە دامەزراندن، لە خانەنشینکردنی سەربازی و لە لیستی سەروەران دا، نەک هەر بنەمای یەکسانی و عەدالەت پیادە نەکرا، بەڵکو سنووری (العدل والانصاف) تێپەڕێندرا.شەش: بەهۆی درێژەدان بەو شێوازە حوکمڕانییە؛- لە بری بنیاتنانی ژێرخانی ئابووری، بەشی زۆری داهاتی گشتی بەهەدەر درا. - کشتوکاڵ، ئاژەڵداری، کرێکاری و کاسبکاریی فەرامۆش کرا، بەرهەمی خۆماڵی ماڵئاوایی کرد، ڕوو لە هاوردەکردنی بەرهەمی دەرەکی و ڕاکێشانی دەستی کاری بێگانە کرا.- لە بواری سەربازی، هێزێکی سەربازی تۆکمەی نیشتمانی پێک نەهێنرا.- لە سۆنگەی ئەم شێوازە کارگێڕییەدا، نا بەرانبەری چینایەتی زەق بووەوە.حەوت: مووچە بوو بووە سەرچاوەی بژێوی بەشی زۆری هاوڵاتیان و بارێکی گران بەسەر حکومەتەوە.هەشت: کاتێک بوودجە لە لایەن حکومەتی فیدراڵ ڕاگیرا، لەوە بگەڕێ کە حکومەتی هەرێمی کوردستان نەیتوانی مووچە دابین بکات، بەڵام زەق زەق لێکەوتەکانی ئەم سیاسەتە دەرکەوت، کە هەم مووچەخۆر شایستەی خۆی وەرنەگرت و سەرچاوەی بژێوی لە دەستدا، هەم هەرێمی کوردستان لەگەڵ قەیرانی بەردەوامی دارایی و ئابووری ڕووبەڕوو بووەوە.نۆ: ئەوکات و ئێستاش با بڵێین؛- مووچەخۆری فیعلی و نا فیعلی.- فەرمانبەری فیعلی و بندیوار.- پۆلیسی فیعلی و بندیوار.- پێشمەرگەی فیعلی و بندیوار.- خانەنشینی شایستە و نا شایستە.- کەسوکاری سەروەرانیش بە شەهیدی سەنگەر و غەیرە شەهیدەوە. پێکەوە مووچە وەردەگرن.لێرەدا بەدەر لە هەر ناکۆکییەکی دیکە؛ - ئایا ئەمە ڕاست و ڕەوایە!- ئایا ئەمە ناحەقی نییە، لە بەرانبەر حەق، کەوا هەر بەردەوامی هەیە؟- ئایا ئەمە یەکێک لە هۆکارە سەرەکییەکانی بێزاری و بێئومێدی نییە بە حکومەت، بە دامەزراوە، بە پڕۆسەی سیاسی و بە هەرێمی کوردستان؟دە: بۆ ئەوەی هەرێمی هەرێمی کوردستان لە نێوەخۆدا سەقامگیر و بەهێز بێ، بۆ ئەوەی حکومەتی هەرێم وەکوو هەرێمێک لە عێراق، وەکوو هەرێمێک لە ئاستی ناوچەكە و نێودەوڵەتان بەهێز بێ و دەوری هەبێ پێویستە :1. لە نێو عێراقدا، حکومەتی هەرێم سیستەماتیک و دەستووری بێ.2. لەوە بگەڕێ لە عێراق چ دەگوزەرێ، هێزی چەکدار لەسەر چ بنەمایەک پێک دەهێنرێ، داهات چی لێ دێ، مووچە چۆن دەدرێ، ئەوان دەوڵەتن بە هەر شێوەیەک حوکمڕانی بکەن دەوڵەتەکە هەر دەمێنێ، بەڵام هەرێمی کوردستان مان و بەردەوامبوون و پێشکەوتن و بەهێزبوونی لە چوارچێوەی دەوڵەتی عێراقدا، بەندە بە پیادەکردنی یاسا و دەستوور و پێشخستنی سیستەم و چەسپاندنی بنەماکانی دیموکراسی و دادپەروەری لە حوکمڕانی دا.3. ئەگەر ئامانج ئەوەیە هەرێمی کوردستان، هەرێمێکی تۆکمە بێ، دەبێ حوکمڕانی لە ڕێگەی هەڵبژاردن لە خەڵکەوە بۆ خەڵک بێ، نەک لە حزبەوە بۆ حزب، دەبێ دەستاودەستکردنی دەسەڵات فەراهەم بکرێ.4. دەبێ لیستی مووچەی فەرمانبەران و خانەنشینان و هێزی چەکدار بەپێی یاسا و سیستەم بێ، نەک هەر بۆ ڕازیکردنی حکومەتی فیدراڵ، بەڵکو لەبەر خۆی و بۆ خۆی پێویستە جێگەی بایەخ پێدان بێ.5. دەبێ لە هەرێم، هێزە چەکدارەکان لە دەستی حزبەوە دەربهێنرێ. 6. دەبێ نیگەرانی و تێبینیەکانی دۆستەکان و وڵاتانی هاوپەیمان بەهەند وەربگیرێن، لە چۆنیەتی مامەڵەکردن لەگەڵ بەرنگاربوونەوەی دیاردەی گەندەڵی و یەکخستنی هێزی پێشمەرگە و ڕوەشی مافی مرۆڤ لە هەرێمی کوردستان. 7. دەبێ لە مامەڵەکردن لەگەڵ حکومەتی فیدراڵ، دەستوور پێوەرمان بێ، دەبێ مافە دەستورییەكان هێلی هاوبەش و خەتی سۆر بێ، دەبێ بەرژەوەندیی خەڵک و بەرژەوەندیی هەرێم لە سەرووی بەرژەوەندی دیکەوە بێ!دە: لە ئاکامی نەبوونی ستراتیژێکی سیاسی هاوبەش لە هەرێم، نەبوونی نەخشەڕێگەیەک بۆ تێپه‌ڕاندنی قەیرانی سیاسی، نەبوونی سیاسەتێکی هاوبەش بۆ چۆنیەتی مامەڵەکردن لە پێوەندییە ناوچەیی و ناودەوڵەتییەکان، نەبوونی پلان و بەرنامەیەکی هاوبەشی دروست بۆ چارەسەرکردنی کێشە هەڵپەسێردراوەکان و کێشە بەردەوامەکانی نێوان هەرێم و حکومەتی فیدراڵ، لە ئاکامی لە دەستدانی کات و دەرفەتەکان، سەرەڕای کارتێکردنی فاکتەرەکانی دیکە، ڕەوشی هەرێمی کوردستان لە بازنەیەكی داخراودا دەخوولێتەوە.بە تێگەیشتن لە ئاڵنگارییەکان و لە ڕاستییە بابەتییەکانی ئەم ڕەوشەی هەرێم و ئاڵۆزییەکانی ڕەوشی عێراق و ناوچەکە، ئەگەر خەڵک خاوەنداری لە خۆیی و لە مەسەلە ڕەواکەی نەکات، دەربازکردنی هەرێم لەو دۆخە ناهەموارەی کە هەتا ئێستا درێژەی هەیە، لە توانا و لە بەرنامەی حزبە دەسەڵاتدارەکان نییە!

بابەتەکانی بێکەس قادر

با بە پێش ڕووداوەکان نەکەوین!

مژاری گفتوگۆی ئاشتی، دەرفەت و ئاستەنگ

تێگەیشتن لە شێواندن باشترە!

بەس مووچە نا!