ئەمڕۆ 48 ساڵ بەسەر ڕاگەیاندنی بزووتنەوەی سۆسیالیستی کوردستان تێدەپەڕێت، لە دوای نسکۆی شۆڕشی ئەیلوول بە ڕێبەرایەتی&nbsp;شەهید سەیدا ساڵح یوسفی، عەلی عەسکەری، دکتۆر خالید، عەلی هەژار، کاردۆ گەلالی و کاک ڕەسووڵ مامەند لەگەڵ پۆڵێک سەرکردە و فەرماندە دیکە ، بزووتنەوەی سۆسیالیستی کوردستان ،وەکوو ئیتجاهێکی سیاسی و فیکری نوێ، وەکوو پێویستییەکی بابەتی و مێژووکرد دامەزرا، وەکوو پێویستییە بابەتی و سەرەکییەکانی قۆناخەکە و بەرەنگاربوونەوەی ئالنگاریەکان و ڕەواندنەوەی تەمی بێئومێدی، دەستپێشخەر بووە لە هەڵگیرسانی شۆڕشی نوێ دا.نزیک بە نیو سەدە پێش ئێستا، کە بزووتنەوە دامەزرا، لە جێگەی بێئومێدی، هیوای بۆ تێکۆشان و بەرەنگاربوونەوە گەڕاندەوە، ڕێچکەکی سیاسی نوێی داهێنا، کە تا ئێستا تێکۆشەرەکانی بە شانازییەوە ئاوڕ لەو مێژووە پڕ لە سەروەری و قوربانیدانە دەدەنەوە، بە هەق بزووتنەوەی سۆسیالیستی کوردستان داینەمۆی هەڵگیرسانی شۆڕشی نوێی کوردستانە و قوربانیدانی سەرکردە و پێشمەرگە و تێکۆشەرەکانی چ لە سەنگەری خەباتی چەکدارانە و چ لە خەباتی نێو جەرگەی شارەکاندا، گەواهی ئەو ڕاستییە حاشا هەڵنەگرەیە، لەو بۆنە مێژووییەدا، سڵاو بۆ گیانی پاکی شەهیدانی بزووتنەوە، سڵاو بۆ هەستی بەرپرسیارێتی هەموو ئەو تێکۆشەرانەی لە دوای نسکۆ، شانیان دایە بەر ئەرکی شۆڕشگێڕانە و کوردانە، لێرەدا لەو ڕاستییە دوور ناکەومەوە کە مێژووی خەبات و تێکۆشانی بزووتنەوە نەک هەر فەرامۆش کراوە، بەڵکو لە سایەی دەسەڵاتی خۆماڵی کورد، غەدر لەو مێژووە کراوە، خانەوادەی سەربەرزی شەهیدانی بزوتنەوە، پێشمەرگە و تێکۆشەرانی ڕۆژانی سەختی مەیدانی خەبات و بەرەنگاربوونەوە مافی ئاسایی خۆیان پێ ڕەوا نەبینراوە.هەر لەو بۆنەیەدا داوا لە هەموو تێکۆشەرانی بزووتنەوە دەکەم لە خەمی ئەو مێژووە بن و پێکەوە خاوەندارێتی لەو سەروەریانە بکەین و وەکوو ئەوەی ڕوویداوە، بۆ مێژوو بینووسینەوە.لێرەدا جێگەی خۆیەتی جارێکی دیکەش جەخت لەسەر ئەو ڕاستییە بکەمەوە کە حزبی زەحمەتكێشانی كوردستان خۆی بە خاوەنی ئەو مێژووە و درێژە پێدەری ڕێچکەی سیاسی و ڕێبازی فیکری بزووتنەوەی سۆسیالیستی کوردستان دەزانێ. لە یادی 48 ساڵەی ڕاگەیاندنی دا سڵاو لە گیانی پاک و بێگەردی هەموو شەهیدانی بزووتنەوەی سۆسیالیستی کوردستان، سڵاو لە گیانی رێبەری دامەزرێنەر شەهید سەیدا ساڵح یوسفی. سڵاو لە گیانی پاکی هەموو شەهیدانی ڕێگای ئازادی کوردستان.

 بەڵێن عەبدولڵا 

بزووتنەوەی سۆسیالیستی کوردستان داینەمۆی هەڵگیرسانی شۆڕشی نوێی کوردستانە!

&nbsp;&nbsp;&nbsp;پێش ئەوەی قسە لەسەر کێشەکانی هەرێمی کوردستان بکەین، دەبێ درک بەو ڕاستییە بکەین کە بارودۆخێکیان لە نێو ڕای گشتی درووست کردووە، تێگەیشتنێکی بابەتیانە لە ڕاوبۆچوون و هەڵوێستەکان قوڕس بووە. بۆیە هەر كاتێك باسی مامەڵەی خراپی عێراق بەرامبەر هەرێم دەكرێت ڕاستەوخۆ بە مەبەست یان بێ مەبەست بێت، وا لێكدانەوەی بۆ دەكرێ كە ئەوە داکۆکیی کردنە لە دەسەڵات. دەبێت بزانرێت بەرگری لە قەوارەی هەرێم و مافە دەستوورییەكانی جیاوازە لە داکۆکیی لەدەسەڵات. &nbsp;بە دیوێکی دیکەشەوە هەر كاتێكیش باس لە خراپی سیستەمی حوکمڕانی دەكرێت ڕاستەوخۆ بەوە تۆمەتبار دەكرێین كە ئەو هەڵوێستانە خزمەت بە عێراق دەكات و دژ بەهەرێمی کوردستانە، ئەمەشیان تێگەیشتنێكی هەڵەیە. چونكە هەر حزبێکی سیاسیی مافی خۆیەتی لە چوارچێوەی پڕۆژەی سیاسیی خۆی بارودۆخی كوردستان‌ و شێوازی حوكمڕانی هەڵبسەنگێنێ‌ و ئاساییە جیاواز بیربكاتەوە. هەڵسەنگاندن و تێڕوانینی ئێمە بۆ سیستەمی حوكمڕانی لە هەرێمی کوردستان بەو شێوەیە:١- هەمیشە جەختمان لەوە كردۆتەوە كە سیستەمی حوكمڕانی لە هەرێمی کوردستان، لەسەرەتاوە لەسەر بنەمایەكی هەڵە بنیات نراوە، درێژە پێدانیشی بەهەمان شێواز كارەسات و نەهامەتی لێدەكەوێتەوە. ٢- هەرێمی کوردستان بە زۆر و دوور لە خواست و ئیرادەی گەل دوو زۆنی زەرد و سەوزیان بەسەردا سەپاندووە، هەر ئەوەش وایکردووە بەهۆی ململانێی تەسکی حزبایەتی جۆرێک لە ڕکابەری و ململانێی زۆر قێزەون و بێزاركەر لەسەر حسابی دۆزی ڕەوای گەلەكەمان و مافەكانی سەرهەڵبدات و زەمینەش بۆ ناحەزان و دوژمنان خۆش بکرێت تا ئاسانتر دەستوەردان لە بارودۆخی هەرێم دا بكەن‌ و هێندەی تر دۆخی كوردستان بەرەو ئاڵۆزی بەرن.ئێمە هەمیشە دژ بەو دابەشكردنە ناڕەواو ناڕاستە بووینە، چونکە نەدەبوو شۆڕش و خەبات‌و و فیداكاری و قوربانیەكانی هێزی پێشمەرگەو گەل و ڕاپەڕینی بەهاری ساڵی 1991، بکرێتە قوربانی ململانێی حزبەکان و زۆنی سەوز و زەرد.٣- ڕاستە ئێستا بە رواڵەت یەك حكومەتمان هەیە، بەڵام لە واقیعدا دوو دەسەڵات و دوو فەرمانڕەوایی پیادە دەكرێ، ئەوەش وایکردووە شتێک لە ئارا نەبێت بەناوی حکومەتی هاوڵاتی. ٤- ڕەخنەیەکی دیکە ئەوەیە بۆ لە ماوەی 33 ساڵی رابردوو دەسەڵات لە چوارچێوەی پڕۆژەی ستراتیژی نیشتمانیی سەبارەت بە تێكڕای سێكتەرەكانی ئابووری، پەروەردە، تەندروستی، كشتوكاڵ، ئاو و سەرچاوەكانی ئاو، كارەبا، پیشەسازی، ژینگە كاری نە كردووە. بەڵکوو مامەڵە لەگەڵ ئەم سێکتەرانە زیاتر بە ئامانجی بەرژەوەندیی حزب ئەنجام دراوە و بەڕێوەبردراوە .٥- دوای تێپەڕینی 33 ساڵ هێزی پێشمەرگە، وەك هێزێكی نیشتمانیی دوور لە حزبایەتی رێك نەخراوە، تا ئێستا دوو هێزی پێشمەرگەو دوو ئاسایش و دوو هێزی ناوخۆ و دوو دژە تیرۆر هەیە.ئەوەی تا ئێستاش دەبینرێت نەبوونی ئیرادەیەكی راستەقینەیە بۆ چارەسەری ئەم پرسە گرنگ و چارەنووسسازانە، چونكە ئێمە پێمان وایە ئەگەر دەستبەرداری حزبایەتی بن یەكخستنی هێزی پێشمەرگە بەهیچ جۆرێك ئەوەندە زەحمەت نیە كە 33 ساڵ بخایەنێ، لەكاتێكدا كۆمەكی هاوپەیمانان و پێداگیریان لە پەلەكردن و یەكخستنی پێشمەرگە هەمیشە جەغتی لێکراوەتەوە.٦- &nbsp;لەم سیستەمە حوكمڕانییە، دامەزراوەكانی حكومەت خرانە خزمەتی حزب، هەلی یەكسان بۆ هاوڵاتیان لە دامەزراندن و پلە ئاساییەکانی وەزیفیش نییە، بەتایبەتیش لەهێزی پێشمەرگە‌و وەزارەتی ناوخۆ و ئاسایش. هەروەها هەلی كار بەشێوەیەكی دادپەروەرانە دابین نەکرا، بەڵکو پلە و پۆستەکان بە پێوەری حزبی دابەش دەکرێت، نەک لێهاتوویی، ئەمە جگە لە بوارەكانی بازرگانی و سەرمایەگوزاری و بوارەكانی تر، بەهەمان شێوە مامەڵەیان لە تەكدا كراوە. دەرەنجام متمانەی هاوڵاتیانی كوردستان بە حكومەت و دامەزراوەكانی لاواز كرا. ٧- شەفافیەت لە داهات و خەرجیەكان كە یەكێكە لە پرسە گرنگەكان، بەهۆی ململانێی حزبی و خراپ ئیدارەدانی ئەو بوارە، رۆژانە بۆتە وێردی سەر زمانی چین‌و توێژەكانی كۆمەڵگا، دەبوایە پەرلەمان رۆڵی چاودێڕی خۆی لەم بارەوە بدیبایە و ڕێگەی نەدابا ئەو پرسەش بكرێتە پرسێكی سیاسیی و لە ململانێیەكان بەكاربهێنرێ. چونكە ئەم مەسەلە پەیوەندی بە داهاتی نیشتمانییەوە هەیەو دەبێ خاوەنداریەتی لێ بکرێت و لە خزمەتی کۆمەڵانی خەڵک بێت. ئەم خاڵانەو زۆری تریش، بارودۆخێكیان هێنایە كایەوە، كە خەڵك بڕوای بە پرۆسەی سیاسی و حكومەت و پەرلەمان‌و حزبە سیاسییەكان لاواز بێت تا ڕادەی لاوازبوونی ئینتمای خەڵك بە خاك و نیشتمان، بەداخەوە ئێستا لەنێوان قەوارەی هەرێم و ئایندەی وڵات م، مووچە بۆتە مەسەلەیەكی سەرەكی، کە پێویستە چارەسەرکردنی مووچە و وەرگرتنی بەشێوەیەکی ڕێکوپێک مانگانە لە کاتی خۆیدا بەبێ دواکەوتن لە ئەولەویەتی کارەکانی حکومەتی هەرێمی کوردستان بێت.ئێمە پێمان وایە ئەگەر ئیرادەیەک هەبێ بۆ چارەسەرکردنی کێشەکان، ئەگەر لایەنە سیاسییەکان لە خەمی چارەسەرکردنی ڕیشەیی هەموو کێشەکانن، دەبێ لە داواو داخوازی ڕەوای خەڵک تێبگەن و بگەڕێنەوە بۆ ڕای خەڵک و لە نێوان خۆیاندا هەموو کێشەکان بە دیالۆگ و گفتوگۆکردن لەسەر مێز چارەسەر بکەن.

بابەتەکانی بەڵێن عەبدولڵا

بزووتنەوەی سۆسیالیستی کوردستان داینەمۆی هەڵگیرسانی شۆڕشی نوێی کوردستانە!

هەرێم لە چ دۆخێک دایە