خوێندنەوەی جیاواز بۆ چەمکی شامی شەریف هەیە، بەڵام زۆربەی بۆچوونەکان لەسەر ئەوە کۆکن کە مەبەست لە «شام»، مەملەکەتی شامی کۆنە، نەک سوریای ئێستا؛ ئەو ناوچەیەی کە فەلەستین، ئوردن، سوریا و لوبنانی لەخۆ دەگرت. زۆربەی لێکدانەوەکانیش ئەوە دەڵێن کە بەهۆی مێژووی دەوڵەمەند و پیرۆزی ئەو ناوچەیە، پێی گوتراوە شامی شەریف. جەلالەدینی ڕۆمی، زانا و شاعیری گەورەی تەسەوف، لە پێشەنگانی ئەو کەساانە بووە کە لە نووسینەکانیدا باسی «شامی شەریف» کردووە.لە نێو کوردەواری خۆشمانیش، ئەو شوێنانەی کە دزی، گەندەڵی، تاڵان، ڕاوەڕووت و کوشتن تێیاندا نەبووایە و خەڵک بە ئاسوودەیی ژیانیان تێدا بەسەر ببردایە، بە «شامی شەریف» ناودەبران. هەر بۆیە دەگوترا: «دونیا شامی شەریفە.»شایانی باسە، لەگەڵ دەستپێکردنی ئۆپراسیۆنی دژی گەندەڵی لە عێراق و ڕاپێچکردنی چەندین بەرپرس، وەزیر، پەرلەمانتار و کاربەدەست بۆ دادگا و زیندان بە تۆمەتی دزینی سامانی گشتی و خۆدەوڵەمەندکردن لەسەر حسابی گیرفانی خەڵک، لە هەرێمی کوردستانیش باس و گفتوگۆ لەسەر ئەو پەردەلابردنانە گەرم بووە.ئەمڕۆ تیڤییەکان، ماڵپەڕەکان و تۆڕە کۆمەڵایەتییەکان پڕ بوون لە هەواڵی دزییە سەیروسەمەرەکان، دۆلارە شاراوەکان و ڕابردووی ئەو کەسانەی کە تۆمەتی ئەو کارانەیان ئاڕاستەکراوە. بەڵام ئەوەی جێگای هەڵوەستە ئەوەیە کە هەندێک لە میدیاکانی سەر بە هێزە دەسەڵاتدارەکان لە هەرێمی کوردستاندا، بە جۆرێک ڕاپۆرت دەدەن کە گوایە هەرێمی کوردستان بەدەرە لە دیاردەی دزی و گەندەڵی، بەرپرسانی ئەم ناوچەیە وەک فریشتە وان.بێگومان، ئەرکی میدیا ئەوەیە پەردە لەسەر دزی و گەندەڵی هەڵماڵێت، بە تایبەتی کاتێک ئەو دیاردانە سنووری یاسا و ئادابی گشتی تێپەڕاندووە. بەڵام هەمان ئەو دەزگا ڕاگەیاندنانە دەبێت ئەوەشیان لەبیر نەچێت کە ئەگەر سبەی یان هەر کاتێکی دیکە ئەو هەڵمەتە بگاتە هەرێمی کوردستان، نابێت ببنە سەنگەری بەرگریی سلبی و ناڕەوا لە گەندەڵی و گەندەڵکاران.وەک دەزانرێت، دیاردەی گەندەڵی لە هەرێمی کوردستان لە ڕووی قەبارە و کاریگەرییەوە هیچی کەمتر لەوەی عێراق نییە. هەروەها، زۆر کەس باوەڕ ناکات بەرپرسانی کورد لە بەغدا لەو تۆڕەی گەندەڵییە دوور مابن.لە هەرێمی کوردستانیش، هاوشێوەی عێراق، نەک تەنها پارەی شاراوە هەیە، بەڵکو لێرە شوێنی پاراستن و شاردنەوەی سامانی گشتی زۆرترە. پێشتر زۆر جار باس لە پارەی ژێرزەمینی و سامانی شاراوە کراوە. کەس نییە نەزانێت ژمارەیەک لە بەرپرسان و بنەماڵەکانیان لە ماوەی چەند ساڵێکدا بە شێوەیەکی خێرا دەوڵەمەند بوون، ئەوەش پرسیارگەلێکی زۆر لەسەر سەرچاوەی ئەو سامانیان دروست کردووە.کەواتە، هەرێمی کوردستان شامی شەریف نییە. بەڵام پرسیاری سەرەکی ئەوەیە: ئایا ئۆپراسیۆنی دژی گەندەڵی پەل دەکێشێت بۆ شارەکانی هەرێمی کوردستانیش، یان نا؟خەڵکی کوردستان لە چاوەڕوانی ئەو ڕۆژەن کە دەرگای ڤیلا و کۆشکەکانی بەرپرسانی هەرێمی کوردستانیش لەبەردەم هەڵمەتی دژی گەندەڵیدا بکرێنەوە، تاکو بە چاوی خۆیان ببینن کێ لەسەر حسابی سامانی گشتی و قووتی خەڵک بووەتە خاوەنی ئەو هەموو سامان و دەسەڵاتە.&nbsp;&nbsp;&nbsp;

هیوا سه‌ید سه‌لیم

ئایا هەرێمی کوردستان شامی شەریفە؟

لە ڕوانگەی زانستی سیاسییەوە، تۆپی پێ تەنها یارییەک نییە؛ بەڵکو بوارێکە بۆ دەرخستنی هێز، ناسنامە، نەتەوەییبوون، دیپلۆماسی و ململانێی سیاسی. بۆیە زۆرێک لە توێژەرانی زانستی سیاسی، تۆپی پێ بە «بەردەوامبوونی سیاسەت بە ئامرازێکی دیکە» دەزانن.ئێمەی کورد، وەک گەورەترین نەتەوەی بێ‌دەوڵەت لە جیهاندا، زۆرجار پێویستمان بەوە هەیە بۆ دەرفەتە جیاوازەکان بگەڕێین کە بتوانین هێز و ناسنامەی خۆمان بە وڵات و گەلانی دیکە بناسێنین. لەو بارەیەوە، وەرزش بە گشتی و تۆپی پێ بە تایبەتی، یەکێکن لە گرنگترین ئەو دەرفەتانە.چەند ڕۆژێکە مۆندیالی تۆپی پێی جیهانی لە وڵاتانی (ئەمەریکا، کەنەدا، مەکسیک)، دەستی پێکردووە. لەم پێشبڕکێیەدا، ئەگەرچی کورد وەک نەتەوە تیپی تایبەت بە خۆی نییە، بەڵام ئەزموونی بەشداری هەندێک هەرێم و ناوچەی بێ‌دەوڵەت وەک کوراساو، کە سەر بە شانشینی هۆڵەندایە و خاوەنی حوکمی زاتییە، دەکرێت ببێتە بابەتی لێکۆڵینەوە بۆ ئەوەی لە داهاتوودا هەرێمی کوردستانیش هەوڵی وەرگرتنی ئەندامێتی فیفا بدات.کاتێک ئەم پێشنیارە دەکرێت، لەوانەیە پرسیارێک هەبێت: ئایا هەرێمی کوردستان دەتوانێت تیپێکی یەکگرتووی تۆپی پێ هەبێت، لە کاتێکدا کە تۆپی پێ لە هەرێمدا خۆی لە ژێر کاریگەری دابەشبوونە سیاسییەکانە؟بەڵام با لەو پرسیارە تێپەڕین. ئەوەی ئێستا هەیە ئەوەیە کە کورد تیپی نیشتمانی تایبەت بە خۆی نییە و دروستکردنی ئەویش ئاسان نییە. پرسیارە گرنگەکە ئەوەیە: چۆن دەتوانرێت تۆپی پێ وەک ئامرازێکی هێزی نەرم بۆ ناساندنی دۆزی کورد لە سەکۆ و وێستگە گرنگە وەرزشییە جیهانییەکان بەکار بهێندرێت؟لە یاری نێوان (ئەڵمانیا و کۆدیڤوار)دا، کاتێک هەڵبژاردەی ئەڵمانیا بە گۆلێک لە دوای ڕکابەرەکەیەوە بوو، یاریزانی کوردی هەڵبژاردەی ئەڵمانیا، «دەنیز ئۆنداف»، کە هەمیشە شانازی بە ڕەگەز و بنەچەی کوردی خۆیەوە دەکات، بە کاریگەرییەکی ڕاستەوخۆ هۆکاری گۆڕانی ئەنجامی یارییەکە بوو. ئەو ڕووداوە وای کرد دڵی زۆرێک لە هەوادارانی کورد خۆش بێت و تۆڕە کۆمەڵایەتییەکان پڕ ببن لە وێنە و هەواڵەکانی ئۆنداف.ئەوە نیشان دەدات چەندە گرنگە کاتێک یاریزانێک دەتوانێت بۆشاییەکی هەبوونی نەتەوەکەی لە نێو پێشبڕکێی وڵاتاندا پڕ بکاتەوە، یان ببێتە هۆی ئەوەی ئالای کوردستان لە ناو هەوادارانی جیهانی تۆپی پێ بگاتە یاریگاکان. لە زانستی پەیوەندییە نێودەوڵەتییەکاندا، ئەم جۆرە کاریگەرییە بە «هێزی نەرم» ناسراوە.کورد بۆ ناساندنی دۆزی ڕەوای خۆی لە سەکۆ نێودەوڵەتییەکاندا پێویستی بە هێزی نەرم هەیە. دەنیز ئۆنداف دەتوانێت ببێتە یەکێک لەو کەسانەی کە جەماوەری کورد پشتیوانی لێ دەکات و ئەویش وەک باڵوێزێکی وەرزشی بۆ ناساندنی نەتەوەکەی خزمەت دەکات. تەنانەت بە هەندێک جووڵە و ئاماژەی سادەی ناو یاریگا، دەتوانێت پەیامێکی کوردانە بگەیەنێتە ملیۆنان کەس.لێرەدا دەکرێت بڵێین: حەقوایە زۆرێک لە کوردان، لەبەر ئەو یاریزانە کوردەی کە تا ئێستا یەکێکە لە ئەستێرە گەشەکانی مۆندیالی جیهانی تۆپی پێ، پشتیوانی لە هەڵبژاردەی ئەڵمانیا بکەن.

تۆپی پێ و سیاسەت

لەو ڕۆژەی فەرمانبەر لە یەکێک لە وەزارەتەکان دادەمەزرێ چاوی لەوەیە بە پێی پەیژەی وەزیفی لە پلەیەکەوە بۆ پلەیەکی بەرزتر سەر بکەوێت، تا دەستکاری شایستە داراییەکەی بکرێت کە وەک گرێبەستێک وایە لە نێوانی ئەو حکومەت، ئەمە ئەگەر فەرمانبەرەکە لە کەرتی گشتی دامەزرا، بۆ کەرتی تایبەتش دەوستێنە سەر ئەو گرێبەستەی هەردوو لا لەسەری ڕێکدەکەون.شایانی باسە، ریزبەندی پلەی وەزیفی لە نێو ماددەی (١٩)ی یاسای خزمەتی مەدەنی عێراقی لە یاسایی ژمارە (٢٤)ی ساڵی ١٩٦٠، کە لە هەرێمی کوردستاندا بە یاسای ژمارە (١٦) لەلایەن پەرلەمانی کوردستانەوە هەموارکراوەتەوە، زۆر بە ڕوونی ڕێکخراوە، لەو یاساییە&nbsp;هاتووە کە فەرمانبەر لە چ کاتێکدا مافی پلەبەرزکردنەوەی هەیە.فەرمانبەرانی هەرێمی کوردستان سێزدە ساڵە لەو مافە یاساییە بێبەش کراون، واتا لە ساڵی ٢٠١٣وە لە شوێنی خۆیان ماونەتەوە، ئەویش بە بیانووی بوونی قەیرانی دارایی کە بەرۆکی هەرێمی کوردستانی گرتووە. لە ماوەی ئەو سێزدە ساڵەدا، فەرمانبەر هەیە لەو ساڵەی دامەزراوە لە هەمان پلەی ماوەتەوە و پلەی بەرزنەبووەتەوە؛ هەروەها زۆرێک لەوانە خانەنیشین بوونە ئەو چەند ساڵەیان وەک شایستەی دارایی بۆ هەژمار نەکراوە، هی واش هەیە خەونی پلەبەرزکردنەوەیان بردووەتە ژێر گڵ و بەو مافە یاساییە نەگەیشتوون.ڕۆژی ١٥ی حوزەیرانی ٢٠٢٦، لەسەر بڕیاری ئەنجومەنی وەزیرانی هەرێمی کوردستان، ئەو مافە گەڕێندرایەوە بۆ فەرمانبەرانی سەر بە وەزارەتی ناوخۆ. دەگوترێت بڕیارەکەی حکومەت لەسەر دوای فەرمی وەزارەتی ناوخۆ بووە.کاتێک گوێبیستی ئەو هەواڵە بووین، پێمان وابوو کە حکومەتی هەرێمی کوردستان جیاکاری لەنێوان فەرمانبەرانی وەزارەتێک و وەزارەتێکی دیکەدا دەکات. بەڵام کاتێک وردەکاریی بڕیارەکە بڵاوکرایەوە، تێگەیشتین کە بڕیارەکە بەبێ جێبەجێکردنی مافە داراییەکەیە؛ واتە فەرمانبەری وەزارەتی ناوخۆ پلەی بەرز دەکرێتەوە، بەڵام مووچەکەی گۆڕانکاری بەسەردا نایەت.لە کوردەواریدا بۆ ئەو حاڵەتە تەنزێک هەیە کە دەڵێت: «لەسەر بووزی لۆیان بنووسە». بەڵام هەر ئەوەش باشترە لەوەی فەرمانبەر لە پلەی خۆیدا بچەقێت وەک باقی فەرمانبەرەکانی دیکە.ئەوەی حکومەتی هەرێمی کوردستان لە بەرانبەر فەرمانبەران دەیکات، هیچ بیانوویەکی هەڵناگرێت. چارەسەری قەیرانی دارایی لە ئەستۆی حکومەتە، نەک فەرمانبەر. ناکرێت بە بیانووی قەیرانی دارایی، حکومەت دەست بباتە سەر مافە یاسایی و داراییەکانی فەرمانبەران. بۆیە هەرچی زووە دەبێت حکومەت ئەم زوڵمە گەورەیە لەسەر فەرمانبەران هەڵگرێت و مافە یاسایی و داراییەکانیان بە تەواوی بگەڕێنێتەوە&nbsp;

پلە بەرزنەکردنەوە، ئەو زوڵمەی حکومەت لە فەرمانبەرانی دەیکات   

&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;لەوەتەی لە تورکیا بڕیاری هەڵوەشاندنەوەی ئەنجامەکانی کۆنگرەی ٣٨ی پارتی گەلی کۆماری (CHP)&nbsp;دەرچووە، زۆر کەس دەپرسێت ئایا ئەو یڕیارە یاساییە&nbsp;یان هەنگاوی سیاسی دەسەڵاتە دژ بە گەورەترین هێزی ئۆپزسیۆنی تورکیا.بەرە لەوەی وەڵامی ئەو پرسیارە بدەینەوە دەمانەوەێت بڵێین بڕیاری دادگای تورکیا بۆ هەڵوەشاندنەوەی ئەنجامی کۆنگرەی ٣٨ ی&nbsp;&nbsp;&nbsp;(CHP)یەکێک بوو لە گەورەترین رووداوە سیاسیەکان تورکیا لە ساڵی ٢٠٢٦دا.&nbsp;ئەم بڕیارە، کە بەهۆی بیانووی&nbsp;ناڕێکیی لە هەڵبژاردنەکانی ناو کۆنگرە بووە هۆی دەستوەردانی دادگا لەو پرسە، شایانی باسە، بڕیارەکەی دادگا لە ناوخۆی تورکیا قسە و مشتومڕی زۆر لەنێوان ئەوانەی دەڵێن بڕیارەکە “یاسایی” بووە و ئەوانەشی کە دەڵێن “هەنگاوێکی سیاسی” بووە لێکەوتۆتەوە، لە ئێستادا مشومڕەکە خەریکە دەگوازرێتەوە بۆ ناو بارەگا و لایەنگرانی خودی ئەو پارتەش. ئەوەی لە لایەنی فەرمی ڕاگەیندرا ئەوە بوو کە&nbsp;دادگا بانگەشەی کرد کە کۆنگرەکە بەهۆی شکاندنی بنەماکانی دیموکراسی ناو کۆنگرەی (CHP) و هەبوونی دەستوەردان لە پرۆسەی هەڵبژاردندا ئەنجامەکانی ئەو کۆنگرەیە بە هەڵوەشاوە لە قەلەم دەدرێت. ئەوەش بووە هۆی ئەوەی کە بڕیار بدرێت سەرکردایەتی پێشووی حیزب واتا سەرکردایەتی پێش کۆنگرەی ٣٨ کە لە لایەن "کەمال کلیچندار ئۆغلۆ" سەرکردایەتی دەکرا بگەڕێتەوە سەرکارو جلەوەی حزبەکەیان ڕادەست بکرێ بۆ ئەم هەنگاوە &nbsp;لە لایەن حکومەت پشتیوانی&nbsp;لەو بڕیارە کراو و بە زەبری هێز سەرکردایەتی ئێستا پارتەکە بە سەرۆکایەتی "ئۆزگۆر ئۆزێل" لە ئۆفیسی سەرەکی پارتەکە وەدەرنران، ئۆفیسەکە ڕادەستی باڵی دیکەی پارتەکە کرا.ئەو بڕیارەی دادگای تورکیا لە لای&nbsp;زۆر لە چاودێران و ڕێکخراوەکانی مافی مرۆڤ&nbsp;بە بڕیاری سیاسی و ململانێی نێوان دەسەڵات و ئۆپزسیۆن دەبینرێت. تایبەتمەندیی ئەم بڕیارە ئەوەیە کە لە کاتێکدا دەرچوو کە (CHP) &nbsp;دوای سەرکەوتنی هەڵبژاردنە خۆجێییەکان و بردنەوەی گەورە شارەوانییەکانی (ئەستەنبۆل و ئەنقەرە و هەروەها ئیزمیر...هتد)، وە بەهێزبوونی سیاسی (CHP) ، وەک هەڕەشەیەکی ڕاستەوخۆ بۆ دەسەڵاتی حوکمڕان دەبینرا. هەروەها، رووداوەکانی وەک دەستگیرکردنی کەسانی وەک "ئەکرەم ئیمامئۆغلو" سەرۆکی گەورە شارەوانی ئەستەنبۆل و هێرشەکانی سەر بنکەی حیزب، گومانە سیاسییەکان زیاتر کردووە.&nbsp;پرسیارە سەرەکییەکە ئەوەیە: ئەگەر بڕیارەکە تەنها یاسایی بووایە، بۆچی لەو کاتە هەستیارە سیاسییەدا بڕیاری دادگا جێبەجێ کرا؟ ئەم پرسیارە وای کردووە زۆر کەس باوەڕ بکەن کە یاسا لێرەدا تەنها ئامرازێکە بۆ گەیشتن بە ئامانجێکی سیاسی.وەڵامی ئەو پرسیارە لای ئێمە ڕوونە، ئەو ڕۆژەی کە (CHP) ڕایگەیاند بۆ هەڵبژاردنی سەرۆکایەتی تورکیا &nbsp;"ئەکرەم ئیمام ئۆغلو"کاندید دەکات، یەکسەر لە لایەن دەسەڵات تۆمەتی بۆ درووستکرا و خرایە زیندان، ئێستاش کە ئۆپزسیۆن پێداگری لەسەر هەڵبژاردنی پێشوەختەی تورکیا دەکات و دۆخی هێزەکانی دەسەڵاتیش بە تایبەت ئەردۆگان و پارتەکەی "&nbsp;AKP " خراپە وە ناتوانێت بە شیوازی دیموکراسیانە ململانێ لەگەڵ ئۆپزسیۆن بکات، پەنا بۆ تۆمەتی داتاشراو دەبات لە ڕێگەی دادگا.دواجار دەڵێین، لە هەر وڵاتێک و سیستەمێکی حوکمڕانیدا، یاسا سەروەری خۆی لەدەستدا و دادوەر بووە مەقاشی دەستی دەسەڵاتداران نا بێت ئومێد لەسەر ئەو سیستەمە هەڵبچندرێت، ئەوەی ئێستا لە تورکیا ڕوودەدات ڕێک ئەوەیە.

             هیوا سەید سەلیم

کاتێک دادوەر دەبێتە مەقاشی دەستی دەسەڵاتداران

لە کاتێکدا کە ماوەیەکە لایەنی کوردی ڕەخنەی زۆری لە هەڵوێستی دەوڵەتی تورکیا دەگرێت بەوەی خەمساردانە مامەڵە لەگەڵ پڕۆسەی ئاشتی دەکات، دەوڵەت باخچەلی جارێکی دیکە گۆمەکەی هەژاند و داوای کرد دەبێت عەبدولڵا ئۆجالان لە نێو ئەو پڕۆسەیەدا پێگەیەکی فەرمی یاسایی و سیاسی هەبێت. شایانی باسە، لەم چەند ڕۆژەی دواییدا قسەکانی دەوڵەت باخچەلی، سەرۆکی پارتی نەتەوەپەرستی MHP،سەرنجی زۆری ڕاکێشا لە نێو ڕای گشتی تورکیا، کاتێک پێشنیاری ئەوەی کرد کە عەبدولڵا ئۆجالان بتوانێت ڕۆڵێکی فەرمی لە پڕۆسەی ئاشتیدا ببینێت. ئەو ناوی «کۆردیناتۆری پڕۆسەی ئاشتی و سیاسیبوون»ی بۆ ئەو ڕۆڵە بەکار هێنا. ئەم هەڵوێستەی باخچەلی گرنگ بوو، چونکە ئەو سەرۆکی ئەو حزبەیە کە لە مێژوودا هەڵوێستی توندی دژی PKK و ئۆجالانی هەبووە. بۆیە ئەو گۆڕانە لە زمان و هەڵوێستدا وەک پەیامێکی سیاسی گرنگ سەیر کرا. گۆڕانکاری لە هەڵوێستەکانی باخچەلی و سیاسییەکانی تورکیا لە دوای ئەوە هات کە PKK لە دواین کۆنگرەی خۆیادا کە لە مانگی نیسانی ٢٠٢٥ گرێدرا ڕایگەیاند خەباتی چەکداری کۆتایی پێدەهێنێت و چەک دادەنێت، ئەویش دوای بانگەوازی ئۆجالان لە ٢٧ی شوباتی هەمان ساڵ بڵاوکرایەوە، گفتوگۆ لەسەر چارەسەری سیاسی و پڕۆسەی ئاشتی زیاتر بوو. هەندێک لایەن، بە تایبەت DEM Party، ئەم هەنگاوەی سەرۆکی MHPیان بە ئەرێنی زانی و پێیان وایە دەتوانێت دەرگای گفتوگۆ و ئاشتی بکاتەوە.&nbsp;دوابەدوای پێکهێنانی کۆمسیۆنە پەرلەمانییەکە دەرچەی یاسایی و سیاسی و پێدانی ڕۆڵی زیاتر بە ئۆجەلان داخوازی بەردەوامی لایەنی کوردیە لە قەندیلەوە بگرە تا دەم پارتی. بەڵام لایەنانی دیکە، بە تایبەتی نەتەوەپەرستانی توندڕەو، دژی ئەو بیرۆکەیەن و دەڵێن نابێت هیچ ستاتوسێک بدرێت بە ئۆجالان. لە هەموو حاڵێکدا، قسەکانی باخچەلی بە یەکێک لە گرنگترین گۆڕانکارییە سیاسییەکانی ئەم دواییانە لە تورکیا دادەنرێت، چونکە یەکەم جارە لایەنێکی نەتەوەپەرستی پێکهێنەری حکومەت بە شێوەیەکی ئاشکرا و بە ئەرێنی باس لە ڕۆڵی ئۆجالان لە پڕۆسەی ئاشتی دەکات و بۆ دەرچوون لە چەقبەستنی پڕۆسەش پێشنیارێکی لەو شێوەیە پێشکەش دەکات.

هیوا سەید سەلیم

ئەو ستاتۆیە چییە کە باخچەلی بۆ ئۆجالان داوای دەکا؟

&nbsp;کاتێک لە دوا ساتەکانی یارییەکەدا، ماڵی شیعە لەسەر کاندیدکردنی عەلی زەیدی ڕێککەوتن، لایەنە دەسەڵاتدارەکانی هەرێمی کوردستان (پارتی و یەکێتی) لە پێشەنگی ئەو لایەنانە بوون کە پەیامی پیرۆزباییان بۆ سەرۆک وەزیرانی ڕاسپێردراو نارد و ئومێدی سەرکەوتنیان بۆ خواست.&nbsp;ئاسکرایە کە هێشتا ڕوون نیە کە (زەیدی) لەو ئەرکەدا سەرکەوتوو دەبێت، یان دوای ٣٠ ڕۆژ، لەو ماوەیەی دەستوور بە پێی ماددەی ٧٦ دیاری کردووە، سەرۆککۆمار کەسێکی دیکە بۆ ئەو ئەرکە ڕادەسپێرێت. بەڵام، لەبڕی ئەوەی دەسەڵاتدارانی هەرێم مەرجی خۆیان بۆ پشتیوانی لە (عەلی زەیدی) بخەنەڕوو، پەیام لەسەر پەیامی پیرۆزبایی دەدەن.&nbsp;باشە ئەگەر لەلای ئێوە ڕێککەوتن لەسەر پێکهێنانی حکومەت و ڕاسپاردنی سەرۆک وەزیرانی تازە هێندە گرنگە، دەفەرموون ئێوەش چاو لە ماڵی شیعە بکەن و دوای ساڵ و نیوێک لە هەڵبژاردنی پەرلەمانی کوردستان، جورئەت بکەن کێشە حزبییەکانتان وەلابنێن، پەرلەمانی کوردستان لە سوڕی قەفلکراو دەرباز بکەن و حکومەتی تازە دابمەزرێنن.&nbsp;بەڵام هەموو ئاماژەکان ئەوەمان پێدەڵێن کە (پارتی و یەکێتی) ئەو کارە ناکەن، بگرە خەریکی شەڕێکی ئاست ‌نزمی ڕاگەیاندنن.&nbsp;پارتی دوای هەڵبژاردنی سەرۆککۆمار بڕیار دەدات وەک سەرۆک مامەڵە لەگەڵ (نزار ئامێدی) نەکات!&nbsp;خۆزگە پارتی ئەوەی بەرانبەر سەرۆککۆماری تازە دەیکرد، بەرانبەر سەرۆک وەزیرانی ڕاسپێردراو بیکردایەوە؛ بەوەی مەرجی بۆ دادەنێت کە لە بەرانبەر بەڵێنی جێبەجێکردنی مافە دەستوورییەکان و شایستەداریکردنی داهاتی خەڵکی کوردستان، پشتیوانی لێبکات.شایانی باسە، سیاسەتی خۆبەکەم‌زانینی بەرپرسانی هەرێم لە ئاست ئەوانی دیکە و شکاندنی یەکتری لە ناوخۆی کوردستان، زیانی زۆری بە ناو و بانگی کورد گەیاندووە و متامەی خەڵکیشی بە سیستەمی حوکمڕانی لە هەرێمی کوردستان لاوازکردووە.ئێمە داوای ئەوە لە بەرپرسانی پارتی و یەکێتی ناکەین کە پەیوەندی باشیان لەگەڵ پێکهاتەکانی عێراق نەبێت، بەڵکو ناکرێت دۆستی ئەوان و دوژمنی خۆتان بن. ئەگەر ناو ماڵی خۆتان ڕێکبخەنەوە، کێشە حزبیەکانتان وەلابنێن و مەرج و مەرجاداری بۆ یەکتری دانەنێن،دڵنیابن بەغدا و ئیدیکەش حسابی باشترتان بۆ دەکات.هۆشدارتان پێدەدەین کە درێژەدان بەو دۆخەی هەرێمی کوردستان، مەترسی ئەوەی لێدەکەوێتەوە کە لە غیابی شەرعیەت، هەرێم&nbsp;بەرەو نەمانی یەکجارەکی ببردرێت. بۆیە ناکرێت دەست لەملی ئەوان بکەن و لێرەش شەڕی یەکتری بکەن.&nbsp;

بابەتەکانی هیوا سەید سەلیم

ئایا هەرێمی کوردستان شامی شەریفە؟

تۆپی پێ و سیاسەت

پلە بەرزنەکردنەوە، ئەو زوڵمەی حکومەت لە فەرمانبەرانی دەیکات

کاتێک دادوەر دەبێتە مەقاشی دەستی دەسەڵاتداران

ئەو ستاتۆیە چییە کە باخچەلی بۆ ئۆجالان داوای دەکا؟

پیرۆزبایتان بۆ ئەوان، شەڕتان بۆ ئێمە