هەردو پەیامی پێش جەژن و ئەم دوایەی مەسعود بارزانی بۆ ڕێکەوتنی لایەنەکان و داکۆکی لەپێشمەرگە، مایەی هەڵوەستەن، ڕاستی لایەنی پەرۆشی پەیامەکان بۆ من جێی هەڵوەستە نیە لەو ڕوانگەیەوە بارزانی خۆی بەرپرسە لەوەی حزبەکەی کەزۆرترین دەنگ و کورسی هەیە هەژدە مانگە لایەنێکی سەرەکی پەکخستن و کۆنەبونەوەو کارانەکردنەوەی پارلەمانە، پەیامەکە کاتێک گرنگە بارزانی دوو دەستپێشخەری بکات، یەکەم سی و نۆ پارلەمانتارەکەی پارتی و ئەوەش کە بەتەکیان دەکەوێت بباتە پارلەمان و بڵێت فەرموو بادەست پێبکەین، بۆ خۆیشی ئەرک بکێشێت و سەردانێکی دەباشان بکات، ئەگەر دەیەوێت پەیامەکەی ببێتە کردار، لەدەرەوەی ئەم هەنگاوانە پەیامەکە لەقسە زیاتر نیە، ئەحمەد موختار بەگ دەڵێ قسە ناچێتە گیرفانەوە.سەبارەت پێشمەرگە، جارێ دەبێت بزانین هەرخۆی یەکنەخستن و یەکنەگرتن و ڕێکنەخستنی پێشمەرگە لەچوارچێوەی هێزێکی کوردستانیدا، ئەو هێزەی کردوە بەمیلیشیای حزبی ئەمەش کێماسیەکی گەورەیە بەتایبەت بۆ پارتی ویەکێتی، هەروەها بارزانی سیانزە ساڵ سەرۆکی هەرێم بوو، واتە سەرۆکی هێزە چەکدارەکانیش بوو ، یەکجار هەنگاوی کردەیی نەنا بۆ یەکخستنی پێشمەرگەو هەفتاو هەشتاو زێرەڤانی و بەرگری و فریاکوتن، ئێستاش درەنگ نیە با پارتی دەستپێشەری بکات و حزب و پێشمەرگە لەیەکتر جیاکاتەوەو پێشمەرگە بداتە وەزارەتی پێشمەرگەو لەدەستوەردانی حزبی دوریبخاتەوە، ئەمە بە قسە نابێت، ئەگەر پێشمەرگە یەک بن، لەبری حزب هێزی کوردستان بن کەس ناتوانێ وەک میلیشیا سەیریان بکات، لەدەرەوەی ئەمە، دەمێکە پێشمەرکە لای ئەمەریکاو عێراق وەک میلیشیا سەیر دەکرێت، هەر ئەو کاتەی لەسەردەمی دەسەڵاتی هۆشیار زێباریدا لەبەغدا کە ئەمەریکاو عێراق ئیتفاقیەی کشانەوەی هێزی بیانیان لە عێراق واژو کرد، لە ڕێکەوتنەکەدا چەند جار نوسرابوو هێزگەلی دەرەوەی قانون، هەروەها ئەرزو ئاسمانی عێراق ڕادەستی سوپای عێراق کرابوو بەهەرێمیشەوە، ئەوسا نە وەزیری دەرەوە نەکەس متەقی نەکرد، بۆیە نەچوە بچێ با بەیەکخستنی پێشمەرگەی کوردستان وەڵامی دەمکوتکەرانەی بەراک و هەر کەسێکی تر بدرێتەوە.بەدوای دو پەیامەکەی بارزانیدا سەرۆکی حکومەتیش بەلایەنگەلی دیکە دەڵێ با ئاقڵانە بیر بکەنەوە، کاکی برا ئەگەر قسە لەهەنگاوی ئاقڵانەو بیرکردنەوەی ئاقڵانە بکرێت، ئەمە بۆ پارتیش ڕاستە، ئێ تۆش هەم کوڕی سەرۆکی پارتی هەم جێگری سەرۆکی کەواتە دیسان هەنگاو دەبێت لەئێوەوە دەست پێبکات، من باوەڕم وایە کەس نابێت لەپرسی هەرێمی کوردستاندا لەسەر بورجی عاجەوە ئامۆژگاری ئەوانی دیکە بکات، هەرێمی کوردستان هەڕەشەیەکی جدی لەسەرە، وەک چۆن کەرکوکیش هەمان هەڕەشەی بەزیادەوە لەسەرە، لایەنی زۆری هەڕەشەکەش ڕۆڵی ناجۆرانەی پارتی و یەکێتیە، کێدەستی گرتون، ئەرێ خەتای کێیە دوو ئەندامەکەی ئەنجومەنی پارێزگای کەرکوک کەپارتین لەگەڵ پێنج ئەندامەکەی یەکێتی هاوپەیمانی کوردی دروست ناکەن، عەرەب سێ بەش بوون بوونە یەک کەچی کورد شیرو تیر لەیەک دەسون، پرسیارو ئاماژەکە بۆ ئەوە بوو بڵێم پارتی نابێ قسە بکات دەبێت هەنگاو بنات.ئەگەر ڕاشکاو بین دەبێت دانی پێدا بنەین کەلەدەرەوەی مێژوداین و هێشتا قۆناغی خێڵمان تێنەپەڕاندوەو نەبوینە بەنەتەوە بەو مانایەی برین و ئازار کۆمانبکاتەوە، دڵنیام بارزانیەکان لەم قسەیەم تێدەگەن، یەکەمین هەنگاو دەبێ ئەوان بینەن مێژومان لیپە لەناشرینی و خوێن و ستەم ، کێ دەتوانێت لەو مێژوە دەرباز بێت، دەبێت بوێرو بگۆ بێت.

لەتیف فاتیح فەرەج

کوردی دەرەوەی مێژو

<h3> </h3>زۆر جار مرۆڤ ئاستی توڕەیی لە بارو دۆخی سیاسی هەرێمی كوردستان دەگاتە شوێنێك كە ئیدی ڕەنگە هیچ نەمێنێت بۆ وتن ، ئەو پاشقولدان و یەكبوغزاندن و ناشرینیەی لە نێو كایەی سیاسی ئێمەدایە هەمیشە ئەو چوارینەم بیر دەخاتەوە كە لە بنەڕەتا موڵكی مامۆستا بەشیر موشیر نیەو ئەو واژوی لە سەر كردوە ، یان ڕەنگە دكتۆر عیزەدین مستەفا ڕەسوڵ هەر بۆ ئەوەی دۆزی ناجۆری كورد نیشانی خۆی بدات لە مامۆستا هەژاری خواستبێت و ئیمزای وەشانەكەی گرێدابێت بە ئوستادەوە:لە ئاست یەكتر دڕن چەشنی هەڵۆ یەك دادەپاچن بۆ لە بۆ غەیرە شڕن چەشنی پەڕۆ وەك دەست و قاچن بۆ هەزار تیرەو لك و هۆزن وەكو دوژمن لە یەك ناچن ئەترسم ڕۆژێ‌ لەم خاكە هەموو تیاچن وەكو سمكۆ گەلۆ سەركردەو سەردارێك هەیە لەم باشورە لە ئێستادا هەڵوەستە بكات و بپرسێت ئەرێ‌ ئێمە خەریكی چین ، ئەم هەموو ناشرینكردنی یەكترە نەبڕایەوە ،بۆ چەند چەكێكی خۆڕی كەكەس نازانێ‌ گەیشتوە یان نا ، كەس نازانێ‌ لە كوێ‌ حەپەلوش كراوە ، خەریكن ترەمپە سور دەكەن بە گژ كوردا ، لە كاتێكا ئەمەریكا لە پێش ترەمپ و لە دوای ئەویش وەك بەریتانیا قەرزاری هەرە گەورەی كوردن ، كە زۆر جار بۆ ئەوان " شەڕكەری چاكبووینە" لە دیدارەكەی باڤڵ تاڵەبانیدا دەستی تۆمەت ڕاستەو خۆو ناڕاستەو خۆ بۆ كەس درێژنەكرا ، ئەو وتی ئێمە دوو بەشین نەهاتوەتە ئێرە بە هیوام لەلایەكەی دیكەش بپرسن بزاننن براوەتە كوێ‌ ،گەلۆ ڕەنگە وەك كوردێك من ئەو وەڵامەی تاڵەبانیم زۆر لە بەردڵان نەبێت و خۆزگەم خواستبا تاڵەبانی بەمورگانی گوتبا چەكی چی و منەتی چیمان بە سەردا دەكەن ، كورد نەبوایە ئێستا ڕەنگە داعش لە لۆس ئەنجلۆسیش هەبان، بەڵێ‌ كورد هەمیشە بۆ مرۆڤایەتی قوربانی داوەو لەو لاشەوە سەنگەری لە خۆی گرتوە.پەیامنێرەكوردەكە لە ئەمەریكا هەر ئەوەندە دەستی لە ترەمپ گیر بوو بیری چوو ئەو میدیاكاری نەتەوەیەكە ئەنفال و كیمیاباران و جینۆسایدو كوشت و بڕی هەڵەبجەو قەڵادزێ‌ و ئێزدی و فەیلی و بارزانی لێكراوە لە بری پرسیاری ئەو هەموو ستەمە وتی چەكەكان لە سلێمانیە، جا گەلۆ ترەمپ سەیركەن ترەمپ چەند ئاكاریانەتر، لە پرسیارە جاسوسیەكە وەڵامی دایە ، ئەوە كورد ، ئەوەش ترەمپ ، ئەم پەلاماردانی سلێمانیە ئەو پەڕٍی بێڕەوشتی كوردیە ، هەتا ئەگەر هەواڵەكەش سەدا هەزار ڕاست بێت .ئێمە دەزانین كوردبوون ئاكارە ، شەرەفمەندیە ، ڕاستە شەڕی ناوخۆ یەككوشتن ، دیل كوشتن ، تێكدانی ماڵی یەكترمان هەبووە ، بەڵام جاشی لێدەرچێت ئەوەش بە گشتی نا هەرگیز كورد هێندە شەرەفسز نەبووە بەو جۆرە بێگانە لە خۆی هانبدات ، ئەمە بێگانە لە خۆ هاندانەو دەچێتە چوار چێوەی خیانەتەوە ، ئەگەر حكومەتی هەرێم و وەزارەتی ناوخۆ سزای ئەو بگۆ مەترسیدارە نەدەن كەواتە بابەتەكە موو نیە حەبلە . ئەم كورد چ سەیرە خودایە سەدام دیكتاتۆر بوو ، زۆر كەم عەرەبی سونە دەبینی سەرزەنشتی سەدام بكەن بگرە هەمیشە بە شان و باڵیدا هەڵدەڵێن ، كەچی كوردە حەیاتەكە ئازادیخوازو فەیلەسوفی وەك عەبدوڵا ئۆچئالانی بیست و حەوت ساڵە لە زینداندایە كەچی هێشتا هەن پەلاماری دەدەن ، ئەمە بۆ زۆری تر ، بۆ زۆر شارو ناوچەش ڕاستە ، ئیتر كوردەكەیە. بە هیوام سەرانی یەكەمی پارتی و یەكێتی ئەم وتارە زۆر كورتە ببینن.

كورد بون و هیچ و پوچی

ئەوەتەی سلێمانی بووە بەشار هەر كوردێكی ڕۆژهەڵاتی كوردستان لە لایەن هەر ڕژێمێكی ئێرانیەوە تەنگە تاو كرابێت سلێمانی ئامێزی بۆ كردوەتەوە ، كوردی ڕۆژهەڵاتیش لە بواری كارو پیشە ، بازرگانی و هونەرو پێشكەوتنی شارەكەدا درێخیان نەكردوە، ڕاستە سلێمانی سروشتێكی هەیە زیاتر دەقی بەوە گرتوە كە كوڕی گەڕەك و ئەو شتانە باسدەكرێت ، بەڵام هەرگیز دەرگای بەڕوی كەسدا دانەخستوە ، لە مەستورە خانمەوە ، تا سمكۆو تا ئازادیخوازانی كوردو ئەوانی تریش هەمیشە سلێمانی داڵدەی ئێرانیان و خەڵكی ڕۆژهەڵاتی كوردستانی داوە ، ئەمەش وەك بەشێك لە كورد بوون ، سلێمانی هەر بۆ برای كوردی نا بۆ خەڵكی دیكەش وابووە، حوسێن شەهرستانی دەگێڕێتەوە كە هاتوەتە سلێمانی بە خۆی و خێزانەوە پاش ئەوەی لە چنگی بەعس هەڵدێت چۆن خانەخوێكەی خزمەتی دەكات و پێویستیەكانی بۆ دابیندەكات تا ئەو كاتەی دەنێردرێتە دەرەوە. سلێمانی یەكێكە لەو شارە كوردیانەی هەرگیز هیچ كوردێكی تر ، جا ڕۆژهەڵاتی بن یان رۆژئاوایی و باكوری ، خۆیان بە غەریب و نامۆ نەزانیوەو یەكسەر تێكەڵ بە هەست و كەوت و نەریتی شارەكە بوونە، هەر بۆیە جەلالی مەلەك شا ئاوات دەخوازێت ئەو ڕۆژە بێت كاوەی كوڕی لەبەر گەراجی شاری سنە سواری ئۆتۆمبیل بێت و لە سلێمانی دابەزێت ، یەكێك لە هۆكاری ڕق لێبوونی دوژمن ، جا ئەو دوژمنە ئێران بێت یان توركیاو عێراق لە سەردەمی ستەمكاریدا ئەو كوردبوونەی سلێمانیە ، كوردبوونێكی ئاكاری مرۆیی، هەر ئەوەشە وادەكات شاعیرو وەرگێڕێكی وەك فەرهاد پیرباڵ بڵێت شەو ڕۆژێك مانەوە لە سلێمانی بە دەڕۆژمانەوەی پاریس ناگۆڕمەوە، هەروەك چۆن شاعیرو نوسەری كاكەیی كەركوكی هیجری دەدە دڵی سلێمانی و پیرەمێرد دەخوازێت و لە سەر سلێمانیش كتێبێت دەنووسێت، خۆ پیرە مێرد خۆیشی لە كاتی بەفر باریندا دەڵێت " دەڵێی بەڵقیسە تارای زیوینی پۆشیوە "&nbsp;لەتیف هەڵمەتی شاعیریش شیعرێكی زۆر جوانی بۆ ئەو شارە هەیە ، هەروەك چۆن شێخ ڕەزا بە باڵای دارولمولكی باباندا هەڵدەڵێت. شارێك دوژمن لێی بترسێت و خزمەتی نەكات و بە شارێكی ڕەزا قورسی ببینێت و هەركێ‌ بێت هێزی خۆی لە سەر تاقیبكاتەوە ناپاڵم و بۆمبی ئینگلیز و تورك و فارس و عەرەبی بەركەوتبێت هەر دەبێت كورد ، كوردی چوار پارچە خۆشیان بوێت ، مەگەر ئەو ناحەزو داخ لەدڵانەی چاویان كورد بونەكەیدا هەڵنەیات ، هەڵبەت دەكرێت ڕەخنە&nbsp;هەبێت، دەكرێت داوای باشترو جوانتربۆ شار بكرێت، بەڵام ناكرێت ڕقت لێی بێت، رقیش لە كوێ‌ لە شارێك لە ڕۆژی دروستبوونیەوە تا ئەم چركە ساتە دەستبەرداری مرۆیی بوون و كورد بونی خۆی نەبووە ، كورد بوون بە مانا ئاكاریەكەی .&nbsp; سلێمانی شاری ژیان و پێكەوە بوون و خۆشەویستیە ،ئەگەر ململانێی سیاسی و ناجۆری حزبی لێگەڕێن خەڵكەكەی نمونەی خەڵكی باشن ، لە هەموو كارەساتێكی سروشتی یان مرۆیی كردا لە بەشەكانی دیكەی كوردستان، سلێمانی درێخی نەكردوەو لە سەر باكورو رۆژئاواو ڕۆژهەڵات سزا دراوەو ئەو بەردەوام بووە لە پاڵپشتی سیاسی و كۆمەك و بە تەنگەوە بوون و بە دەنگەوە چونیان، ڕەنگە هەر ئەوە بەس بێت كە دەكرێت ئەوانی تر گەواهی بۆ بدەن .

بابەتەکانی لەتیف فاتح فەرەج

کوردی دەرەوەی مێژو

كورد بون و هیچ و پوچی

سلێمانی و كوردی ڕۆژهەڵات