گەلی کورد، گەلێکە مێژوویێکی دوورو درێژە قوربانی دەدات لە پێناو پاراستن و مانەوەی خۆی. بۆ ئەمەش دیارە جگە لە بەرگری جەنگی و گیان فیدایی و قوربانی دان، پێویستی بەردەوامیشی نەک تەنها بە پاراستنی کلتور و تایەتمەندیەکانی هەبووە و هەیە، بەڵکو پێویستی بەردەوامی هەیە بەوەی گرنگیان پێبدات و بەرەو پێشەوەیان ببات و لەگەڵ ڕۆژگار بیانگونجێنێت، تا تاکەکانی نەتەوە ئەو پیرۆزیانە لەخۆبگرن و ببن بەشێک لە ئاکار و کەسایەتیان. پێویستە دامەزراوەکان بیانکەنە بەشێک لە ژیانی ڕۆژانە و پیرۆزی بۆ پیرۆزیەکان نیشان بدەن.نەتەوەیەک کە هەوڵی لەناوبردنی دەدرێت و مافە نەتەوەییەکانی لێ زەوتکراوە بۆ خۆپاراستن و گەیشتن بە مافەکانی، تەنانەت پێویستی بە گرنگی پێدانی زۆر زیاترى بەتایبەتمەندیەکانی وەک زمان و کلتور و جەژن و بۆنە تایبەتیەکان هەیە.ئەرکی جددیە لەسەر سیاسی و بەڕێوەبەر و حوکمڕانانی وڵات لە کرداری ڕۆژانە و سەرجەم پلان و بەرنامە و هەنگاوەکان ئەم بابەتە لەبەرچاو بگرن. تەنانەت لە سیمای شارو گەڕەکەکان، لە پەروەردەی منداڵان و ڕاهێنانی تاکەکان، لە شێوازی ژیان و فەلسەفەی بەڕێوەبردن پێویستە سیما نەتەوەیی و نیشتمانیەکان گرنگی تەواویان پێ بدرێت.کیانێکی سیاسی وەک هەرێمی کوردستان&nbsp;کە لەسەر ئاستی نێودەوڵەتی دانپێدانراوە&nbsp;لەسەر بنەمای نەتەوەییەوە، بەداخەوە دوای ئەو ھەموو خەباتە ئێستا ھەندێک کار دەکرێک کە بەشێکی بەهۆی فشاری دوژمنان و بەشێکی ڕەنگە بەهۆی نەزانیەوە بێت، بەڵام ئەوەی جێگای مەترسی گەورەیە و دەبینرێت بەشی زۆری پابەندبوونە بە رێنماییەکانی دوژمن و خۆنزیککردنەوەی زیاترە لە دوژمنانی نەتەوەیی لەپێناو بەرژەوەندیە تایبەتیەکانیان. بۆیە رۆژانە بەئاشکرا دەبینین بەشێک لە حوکمڕانانی ھەرێمی کوردستان نەک گرنگی بەو بابەتە نەتەوەیی و نیشتمانیانە نادەن، بەڵکو بەپێچەوانەوە هەوڵی ڕێگریکردن دەدەن، پیرۆزیەکان دەشێوێنن.خوە نەتەوەییە جیاکەرەوەکان لەناو دەبەن، گرنگی زیاتر بە بڵاوکراوەو سینەما و ئاکارەکانی دوژمن و نەتەوەی سەردەست دەدەن لەھەموو بوارەکاندا و بەھەموو رێگاکان. بۆ ئەم مەبەستە بینیمان چەند ساڵ بەر لە ئێستا لەھەموو سکرینەکانی وەزارەتی شارەوانی حکومەتی ھەرێم بۆ ریکلام لە شەقام و شوێنە گشتیەکان، لەسەرتاسەری ھەرێمی کوردستان رێکلام بۆ کەناڵە فەرمیەکانی وڵاتێکی داگیرکەری کوردستان دەکرا. لەکاتێکدا لە کوردستان دەیان کەناڵی راگەیاندنی حزبی و تەنانەت شەخسی خودی سەرۆک و دەستەکان ھەیە، بەڵام کەناڵێکی نیشتمانی و نەتەوەییمان نیە. ئەمە جگە لەوەی چەندان کەناڵ بۆ بڵاوکردنەوەی ھونەر و کولتوری دوژمنان ئێستا لە کودستان تەرخان کراون، لەرێگای دۆبلاژی زنجیرە دراماکانیان، کۆپی کردنی بەرنامەکانیان، بە پاڵەوان نیشاندانی ھونەرمەند و کارەکتەرەکانیان، تەنانەت شێوازی خوارد و جل و بەرگ و لەرێگا رۆیشتنەکانیان دەکەن بە مۆدێل و مۆدە و لەو رێگایەوە فەرھەنگ و کلتور و رەسەنایەتی و کوردەواری دەشێوێنن و لەبیر خەڵکی دەبەنەوە، بەشێوەیەک ھەرگیز دوژمنان نەیانتوانی ئەوە بکەن کە ئێستا لەسایەی حکومڕانی کوردیدا دەگوزەرێت.ئەمە زیادەرۆیی نیە، چونکە ئاکارەکانی دوژمن راستەوخۆ و ناڕاستەوخۆ بەرەنگاری و بەرخۆدان لەناخی تاکدا دروست دەکەن و&nbsp;زۆر جار ئامانجەکانیان نەک ناپێکرێن، بەڵکو پێچەوانەکەیان رودەدات و دەبینرێت بەرامبەر دوژمنکاریەکانی دوژمن خۆرێکخستن و بەرەنگارى دروست دەبێت. بەڵام تا ئەم چرکەساتەش تا ڕادەیەکی زۆر کۆمەڵگا گوێڕایەڵ، چاولێکەر و لاساییشی بۆ سیاسەت و سیاسیەکانی کوردستان ھەیە، بۆیە ھەڵەکانی ئەوان سەدانجار کاریگەری زیاترە لە دوژمنکاری دوژمنان.بۆ نمونە: وەک گوتمان جگە لەوەی لەکاتێکدا تا ئێستا حکومەتی هەرێم نەک کەناڵی نیشتانی نیە، بەڵکو هیچ بەرنامەیەکی لەڕووی ڕاگەیاندن و سينەما و دۆکیومێنتاریشەوە نیە، لەکاتێکدا ڕۆژانە ڕۆڵەکانی شاهێدحاڵی جینۆساید و تاوەنەجەنگیەکانی دوژمنان بەداخەوە کۆچی دوايي دەکەن، کەچی شاھێدیەکانیان تۆمار نەکراون. لە بواری سینەما و نووسین و ھونەر کەمترین گرنگیان پێدراوە،&nbsp;لەلایەکیترەوە دەسەڵات جەژنی پیرۆزیی نەتەوەییش کە جەژنی نەورۆزە بێ نرخ دەکات و ڕۆڵەکانی بەتاوانی پلانسازی و هاندانی خەڵک بۆ بەشداری لە جەژن دەستگیر دەکات، لەکاتێکدا پێویستە لە بست بەبستی خاکی کوردستان و ھەر شوێنێک تاکێکی کوردی لێبیت رێز لەنەوروز بگیرێت و ئاسانکاری بۆ یادکردنەوەی بکرێت وەک چۆن ئەم ساڵ لە ئەوروپا و وڵاتانی جیھان بینیمان. ئەم دەسبەسەرکردن و دەستگیرکردنە بەئاشکرا بەتاوانی ئامادەکاری بۆ بەشداری لە جەژنگێڕاني بناری قەندیل دیسان جێبەجێکردنی ئەجێندای دوژمنی نیشتمانیە بۆ ئەوەی پارچەکردنی کوردستان لە ھزر و بیری تاکی کورد دا جێگیر بکات. ئەمەش کە دەبێت پێچەوانەکەی بەرەو پێشەوە ببرێت و لە خەیاڵی تاکەکاندا بچێنرێت کە جیاوازی نێوان مامەیارە، ئاکرێ و قەندیل وئورمیە و ئامەد و کۆبانێ و ھەولێر نیە.&nbsp;بۆم جۆرد گرتن و ترساندنەش نەک تەنها خەڵک چاوترسێن دەکات، بەڵکو لەڕاستیدا کاریگەری لەسەردڵ و دەرون و ھەست و نەستی تاکەکانی کۆمەڵگا و بەتایبەت گەنجانمان دروست دەکات کە شکۆی جەژنی نەتەوەیی و پیرۆزیە نەتەوەییەکانيان لەلا بێنرخ و بێنرختر بێت ، ئەگەر ئەمە بەردەوامبێت کاریگەری زۆر خراپتری لەداھاتودا دەبێت. بەمەش خزمەتی گەورە تەنھا بە دوژمنانی نەتەوەیی و نیشتمانی دەگەیەنن.بۆیە تکایە ھاوڕێ کوردی ئازاد بکەن کە تاوانەکەی تەنھا ئامادکاریە بۆ بەشداری لە ئاھەنگەکانی جەژنی نەورۆز.

بابەتەکانی پەرێز عومەر

ئامادەکاری بۆ بەشداری لە جەژنی نەورۆز لە شانازیەوە بۆ تاوان