دوای تێکچوونی ئەو ئاگربەستە کاتییەی کە لە مانگی حوزەیرانی ڕابردوودا بەدەستهاتبوو، جارێکی دیکە گرژی و ئاڵۆزییە سەربازییەکانی نێوان ویلایەتە یەکگرتووەکانی ئەمریکا و کۆماری ئیسلامی ئێران بە توندی سەریان هەڵدایەوە. هێرشی نوێ دەکرێتە سەر شارە کەناراوییەکانی ئێران و هەڕەشەی داخستنی گرنگترین ڕێڕەوەکانی وزەی جیهان دەکرێت.
پارێزگاری بوشەهر، محەممەد موزەفەری ڕایگەیاند کە هێزەکانی ئەمریکا هێرشیان کردووەتە سەر سێ شوێن لە شاری بوشەهر (کە تاکە وێستگەی ئەتۆمی ئێرانی لێیە)، بەڵام هێرشەکە هیچ زیانێکی گیانی لێنەکەوتووەتەوە.
لای خۆیەوە سوپای ئێران ڕایگەیاند کە لە ئەنجامی هێرشێکی موشەکی ئەمریکا بە 13 موشەک بۆ سەر سەربازگەیەک لە نزیک شاری ئێرانشەهر لە باشووری ڕۆژهەڵاتی وڵاتەکە (بەمپور)، حەوت سەربازی ئێرانی کوژراون. سوپای ئێران بەڵێنی تۆڵەسەندنەوەی توندی داوە.
دوای ئەوەی ئێران گەرووی هورمزی داخست و واشنتیش گەمارۆی دەریایی بەسەر بەندەرەکانی ئێراندا سەپاند، سوپای پاسدارانی ئێران هەڕەشەی توندی کرد کە تەواوی ڕێڕەوەکانی تری هەناردەکردنی وزە کە ئەمریکا و هاوپەیمانەکانی سوودی لێ دەبینن، دادەخات.
شارەزایانی سەربازی پێیان وایە ئێران ئەو کارە بۆ ئەوە دەکات کە لە ڕێگەی هاوپەیمانەکانی (حوسییەکانی یەمەن) گەرووی باب المندب لە دەریای سوور دابخات، ئەمەش مەترسییەکی گەورە لەسەر شادەماری وزەی جیهان دروست دەکات.
وەک کاردانەوەیەک بەرامبەر هێرشەکانی ئەمریکا، سوپای پاسدارانی ئێران ڕایگەیاند کە چەند پێگەیەکی ئەمریکی لە وڵاتانی دەوروبەر کردووەتە ئامانج، لە کوێت، میدیا فەرمییەکان ڕایانگەیاند کە ئاگرکەوتنەوە لەو شوێنەی کرابووە ئامانج کۆنترۆڵ کراوە. هەروەها لە ئوردنیش بەرگری ئاسمانی ئوردن توانی سێ موشەکی بالیستی تێکبشکێنێت کە لە خاکی ئێرانەوە ئاراستە کرابوون.
سوپای پاسداران جەختی کردەوە کە گەرووی هورمز (کە پێشتر یەک لەسەر پێنجی نەوتی جیهانی پێدا تێپەڕ دەبوو) بە داخراوی دەمێنێتەوە تا ئەو کاتەی "شەڕەنگێزییەکانی ئەمریکا کۆتایی دێت."
سەرۆکی ئەمریکا، دۆناڵد ترەمپ هۆشداری توندی دایە تاران و ڕایگەیاند کە ئەگەر نەگەڕێنەوە سەر مێزی گفتوگۆ، هەفتەی داهاتوو وێستگەکانی وزە و پردەکانی ئێران دەکاتە ئامانج.
ترەمپ لە چاوپێکەوتنێکدا لەگەڵ کەناڵی "فۆکس نیوز" وتی: "من ئامانجەکانی کەرتی وزەم بۆ کۆتایی فەرماندەییەکە هێشتووەتەوە، بەڵام لە کۆتاییدا ئەگەر پێویست بکات لێیان دەدەین. باشترە بۆ ئێرانییەکان کە بگەنە ڕێککەوتن."
هەروەها ترەمپ باسی لەوە کرد کە بیرۆکەی پێشووی بۆ سەپاندنی باجی 20% لەسەر کەشتیوانی ناو گەرووی هورمز کێشاوەتەوە و لەبری ئەوە هەوڵی ڕێککەوتنی وەبەرهێنان لەگەڵ وڵاتانی کەنداو دەدات.
بەهۆی ئەم ئاڵۆزییە نوێیانە و پچڕانی دابینکردنی نەوت، نرخی نەوتی جیهانی بازدانێکی گەورەی بەخۆیەوە بینی بە جۆرێک نرخی نەوتی خاوی برێنت گەیشتە بەرزترین ئاستی خۆی لە ماوەی یەک مانگی ڕابردوودا و بەرمیلێک نەوت 84 دۆلاری تێپەڕاند.
نرخی نەوتی خاوی تێکساسیش گەیشتە نزیکەی 80 دۆلار بە هەمان شێوە بەرزبوونەوەی بەرچاوی تۆمارکرد. پێشبینی دەکرێت لەگەڵ بەردەوامی گرژییەکان نرخەکان زیاتریش سەرکەون.