سوپای پاسدارانی ئێران لە بەیاننامەیەکی فەرمیدا ڕایگەیاند، لە چوارچێوەی قۆناغی پێنجەمی ئۆپەراسیۆنەکانیاندا، چەندین پێگەی سەرەکیی سوپای ئەمریکایان لە بەحرەین کردووەتە ئامانج و زیانی گەورەیان پێ گەیاندوون.
بەپێی بەیاننامەکەی سوپای پاسداران، لەم ئۆپەراسیۆنەدا کە ناوی نراوە "نەسر دوو"، ئەم شوێنانە کراونەتە ئامانج و لەناو براون:
1. ناوەندی فەرماندەیی و کۆنترۆڵکردنی NSI سەر بە کەشتیگەلی پێنجەمی ئەمریکا لە بەحرەین.
2. کۆگا گەورەکانی کەرەستە و پێداویستییە سەربازییەکان.
3. تانکییەکانی سووتەمەنی سەر بە هێزەکانی ئەمریکا.
سوپای پاسداران هۆشداریی توند دەداتە ئەمریکا و هاوپەیمانەکانی و ڕایدەگەیەنێت، هێزەکانیان ڕێگای هەناردەکردنی نەوت و غازیان لە زەریای هیندییەوە داخستووە، ئەمەش زیان بە بەرژەوەندییە ئابوورییەکانی ئەمریکا دەگەیەنێت.
لە بەیاننامەکەدا هاتووە: "دوژمن دەبێت بزانێت کە پێویستە چاوەڕوانی داخستنی ڕێگاکانی تری هەناردەکردنی نەوت و غاز بکات کە خزمەت بە بەرژەوەندییەکانی ئەمریکا و هاوپەیمانەکانی دەکەن. هەناردەکردنی نەوت و غاز لە ناوچەکەدا، یان بۆ هەمووان دەبێت یان بۆ کەس نابێت."