نووسینگەی ڕاگەیاندن و پەیوەندییە حکومییەکانی دەستەی دەستپاکی فیدراڵی عێراق، ڕاپۆرتی فەرمی خۆی سەبارەت بە چالاکی و دەستکەوتەکانی لە نیوەی یەکەمی ساڵی 2026دا بڵاوکردەوە. ئامارەکان نیشانەی چڕکردنەوەی هەوڵەکانن بۆ بەرەنگاربوونەوەی گەندەڵی و پاراستنی سامانی گشتی.
بەپێی ڕاپۆرتەکە، لە ماوەی شەش مانگی ڕابردوودا دەستەی دەستپاکی چالاکییە مەیدانییەکانی بەم شێوەیە تۆمار کردووە:
1. ئەنجامدانی 901 هەڵمەتی پشکنین و بەدواداچوون.
2. دەستگیرکردنی 471 تۆمەتبار لە کاتی ئەنجامدانی تاواندا (شێوازی سوور تێوەگلان).
3.دەرکردنی 155 فۆرمی دەستگیرکردن و ڕاپێچکردن دژ بە خاوەن پلە تایبەتەکان و بەرپرسانی باڵا.
لەسەر ئاستی دادوەریی، ڕاپۆرتەکە ئاماژەی بە یەکلاییکردنەوەی چەندین دۆسیەی گرنگ کردووە:
- دەرچوونی 436 بڕیاری دادوەریی جیاواز.
- بەفەرمی سزاخستنە سەر 491 کەس بەهۆی تێوەگلانیان لە دۆسیەکانی گەندەڵیی دارایی و کارگێڕی.
- کارکردن لەسەر 355 دۆسیەی تایبەت بە وەرگرتنەوەی تۆمەتبارانی ڕاکردوو و گێڕانەوەی ئەو پاره و سامانە تاڵانکراوانەی کە بۆ دەرەوەی وڵات قاچاخ کرابوون.
دەستەکە ڕایگەیاندووە کە لەم ماوەیەدا 40,567 فۆرمی ئاشکراکردنی دارایی (زانیاری سامانی بەرپرسان) وەرگیراوە. دوای وردبینییەکی چڕ، دەرکەوتووە کە 113 بەرپرس و فەرمانبەر کێشە و دژایەتی بەرژەوەندییەکانیان لە فۆرمەکانیاندا هەبووە.
هەروەها بە مەبەستی چاودێریکردنی ئەدای فەرمانبەران، تیمی دەستەکە 555 سەردانی مەیدانی بۆ دامەزراوە جیاوازەکانی دەوڵەت ئەنجام داوە و لەو چوارچێوەیەشدا 43 ڕاپۆرتی گشتگیر بۆ دەستنیشانکردنی کێشەکان، بەربەستەکانی کارکردن، و دیاردە نەرێنییەکان ئامادە کراون.