ئەمڕۆ چوارشەممە، نرخی نەوتی جیهانی بۆ سێیەم ڕۆژ لەسەریەک بەردەوام بوو لە سەرکەوتن، ئەوەش بەهۆی هەڵکشانی توندی گرژییە سەربازییەکان لە ناوچەی کەنداو و زیادبوونی مەترسییەکان سەبارەت بە سەلامەتی دابینکردنی وزە لە ڕێگەی گەرووی هورمزی گرنگەوە.
بەپێی داتاكانی ئاژانسی "ڕۆیتەرز"، گرێبەستە داهاتووەکانی نەوتی خاوی ئەمریکی بە ڕێژەی نزیکەی 3% بازیان داوە و 97.48 دۆلاریان بۆ هەر بەرمیلێک تۆمارکردووە، ئەمەش لە ناوەڕاستی نیگەرانی وەبەرهێنەران لە فراوانبوونی بازنەی ڕووبەڕووبوونەوە ناوچەییەکان. هاوکات بەرمیلێک نەوتی تەکساس گەیشتە 95.26 دۆلار.
ئەم بەرزبوونەوەیە دوای ئەوە هات کە فەرماندەیی ناوەندی ئەمریکا ڕایگەیاند؛ چەند مووشەکێکیان تەقاندووەتەوە کە لە لایەن ئێرانەوە بەرەو کوێت و بەحرەین هاوێژرابوون. هێزەکانی ئەمریکاش لە بەرامبەردا بە ئامانجگرتنی چەند پێگەیەک لە دوورگەی "قشم"ی ئێرانی نزیک لە گەرووی هورمز وڵامیان دایەوە.
لە بەرامبەردا، سوپای پاسدارانی ئێران تەئکیدی کردەوە کە بارەگای فەرماندەیی فایلی پێنجەمی دەریایی ئەمریکایان کردووەتە ئامانج.