وۆڵ ستریت جۆرناڵ پەردە لەسەر هێرشە ئاسمانییە نهێنییەکانی ئیمارات بۆ سەر ئێران و هاوکارییە سەربازییەکانی لەگەڵ ئیسرائیل لادەدات
ڕۆژنامەی "وۆڵ ستریت جۆرناڵ"ی ئەمریکی لە ڕاپۆرتێکی مەیدانیی نوێدا ئاشکرای کردووە کە دەوڵەتی ئیماراتی یەکگرتووی عەرەبی، لە ماوەی جەنگەکەدا و بە هەماهەنگییەکی چڕ لەگەڵ ویلایەتە یەکگرتووەکانی ئەمریکا و ئیسرائیل، دەیان هێرشی ئاسمانیی نهێنیی کردووەتە سەر خاک و بەرژەوەندییەکانی ئێران. بەپێی زانیارییەکانی ڕۆژنامەکە، ئەم هێرشانە تەنانەت دوای ڕاگەیاندنی فەرمیی ئاگربەستیش نەوەستاون و بەردەوامییان هەبووە، کە تێیدا چەندین ئامانجی سەربازیی ستراتیژی و دامەزراوەی وزەی گرنگ لە ناوەوەی ئێران کراونەتە ئامانج؛ ئەم پێشهاتە سەربازییە توندەش بووەتە هۆی دروستبوونی گرژی و ناکۆکییەکی قووڵ لە پێوەندییەکانی نێوان ئەبوزەبی و ڕیازدا.
لەلایەکی دیکەوە، ڕۆژنامە ئەمریکییەکە ئاماژەی بە ڕەهەندێکی تری هاوکارییە سەربازییەکانی نێوان ئیسرائیل و ئیمارات کردووە و ڕایگەیاندووە کە تا ئێستاش دەیان سەربازی ئیسرائیلی لە ناوەندێکی سەربازیی ناوخۆی ئیماراتدا جێگیرن.
ئەم سەربازانە لە سەرەتای مانگی ئازاری ڕابردووەوە بە مەبەستی کارپێکردن، بەڕێوەبردن و پاراستنی پاترییەکانی سیستمی بەرگریی ئاسمانیی "قوبەی ئاسنین" ڕەوانەی ئەو وڵاتە کراون، کە ئیسرائیل وەک هاوکارییەک پێشکەشی ئیماراتی کردووە بۆ پاراستنی ئاسمانی وڵاتەکەی.