ئاژانسی "بلومبێرگ" لە ڕاپۆرتێکی نوێدا پەردە لەسەر ستراتیژییەکی مەترسیداری ئەنقەرە لادەدات و ڕایدەگەیەنێت، حکومەتی تورکیا پلانەکانی خۆی بۆ دەستوەردانی سەربازی لەناو خاکی ئێراندا نوێ کردووەتەوە، ئەمەش لە ئەگەری دروستبوونی هەر نائارامییەکی ناوخۆیی یان هێرشی دەرەکی بۆ سەر تاران.
سیناریۆی سووریا لە ئێران دووبارە دەبێتەوە؟
بەپێی زانیارییەکانی بلومبێرگ کە لە سەرچاوە ئاگادارەکانەوە وەریگرتووە، سوپای تورکیا چاوەڕێی ساتەوەختێک دەکات کە دەسەڵاتی ناوەندی لە تاران لاواز بێت. پلانەکە بریتییە لە:
بەزاندنی سنوور: ناردنی هێزی سەربازی بۆ قووڵایی خاکی ئێران وەک "دەستوەردانی پێشوەختە".
کۆنترۆڵکردنی ناوچەیی: دروستکردنی ناوچەیەکی جیاکەرەوە یان کۆنترۆڵکردنی ناوچە سنوورییەکان، هاوشێوەی ئەوەی لە ڕۆژئاوای کوردستان و باکووری سووریا ئەنجامی دا.
ئامانجە ستراتیژییەکانی ئەنقەرە
چاودێران پێیان وایە ئەم جووڵەیەی تورکیا تەنها بۆ پاراستنی سنوور نییە، بەڵکو ئامانجی سیاسی و نەتەوەیی لە پشتە، لەوانە:
ڕێگریکردن لە هەر دەسەڵاتێکی کوردی: تورکیا دەیەوێت پێشوەختە ڕێگری لە دروستبوونی هەر قەوارە یان جووڵەیەکی کوردی بگرێت لە ناوچە کوردییەکانی ئێران (ڕۆژهەڵاتی کوردستان) لە کاتی پشێویدا.
هەژموون بەسەر ناوچە ئازەرییەکان: چەسپاندنی نفوز و هەژموونی سەربازی لەو ناوچانەی ئازەرییەکانی ئێرانی تێدا نیشتەجێن.
مەرجی دەستپێکردنی ئۆپەراسیۆنەکە
ڕاپۆرتەکە جەخت دەکاتەوە کە ئەم پلانە تەنها کاتێک دەچێتە بواری جێبەجێکردنەوە کە ئێران ڕووبەڕووی "هێرشی سەربازی دەرەکی" بێتەوە یان "پێکدادانی ناوخۆیی" بگاتە ئاستێک کە تاران کۆنترۆڵی بەسەر سنوورەکاندا نەمێنێت.