دەسەڵاتە ئەمنییەکانی پارێزگای زیقار، وردەکاریی تاوانێکی دڵتەزێنیان ئاشکرا کرد کە تێیدا خێزانێکی سێ کەسی بوونە قوربانی. دوای ئەوەی سەرەتا وا بڵاوکرایەوە کە ڕووداوەکە کەوتنەوەی ئاگر بووە، لێکۆڵینەوەکان دەریانخست کە "تاوانێکی ئەنقەستە" و لەلایەن کەسێکی نزیک لە قوربانییەکانەوە ئەنجام دراوە.
ڕۆژی دووشەممەی ڕابردوو، هەواڵی سوتانی ئۆتۆمبێلێک لە ناوچەی (سایح) لە ڕۆژئاوای شاری ناسریە بڵاوکرایەوە، کە تێیدا پیاوێک و هاوسەرەکەی و منداڵە ساواکەیان لەناو ئۆتۆمبێلەکەدا گیانیان لەدەستدابوو. قوربانییەکان خەڵکی پارێزگای بەسڕە بوون و بۆ گەشت و سەیران چووبوونە کێڵگەکەی خۆیان لەو ناوچەیە.
سەرچاوەیەکی ئەمنی ڕایگەیاند، دوای تێپەڕبوونی 48 کاتژمێر و لێکۆڵینەوەی ورد، دەرکەوتووە کە پاسەوانی کێڵگەکە بکوژی سەرەکییە. تاوانبارەکە بە مەبەستی دزینی ئەو بڕە پارەیەی کە پێیان بووە، خاوەنکارەکەی و خێزانەکەی کوشتووە و دواتر بۆ شاردنەوەی شوێنەواری تاوانەکەی، ئاگری لە ئۆتۆمبێلەکەیان و تەرمەکانیان بەرداوە.
هێزە ئەمنییەکان توانییان تاوانبارەکە دەستگیر بکەن و لە ئێستادا لەژێر لێکۆڵینەوەی چڕدایە. بڕیارە دوای تەواوبوونی ڕێکارەکان، ڕەوانەی دادگا بکرێت بۆ ئەوەی بەپێی یاسا توندترین سزای بەسەردا بسەپێنرێت.