ئەحمەد موسەوی، جێگری سەرۆکی فراکسیۆنی سادقون لە پەرلەمانی عێراق، زانیاریی نوێی لەبارەی فشارەکانی واشنتن و گۆڕانکارییەکانی ناو چوارچێوەی هەماهەنگی ئاشکرا کرد و ڕایگەیاند کە ئەمریکا پەیامێکی توندی ئاراستەی بەرپرسانی عێراق کردووە.
بەپێی گوتەکانی ئەحمەد موسەوی، ویلایەتە یەکگرتووەکانی ئەمریکا بە ڕوونی بە لایەنە عێراقییەکانی ڕاگەیاندووە کە پێداگری لەسەر کاندیدکردنی نوری مالیکی بۆ پۆستی سەرۆکوەزیران، دەرەنجامی قورسی دەبێت. موسەوی ئاماژەی بەوە کرد کە ئەمریکا هەڕەشەی سەپاندنی سزای کردووە بەسەر "بانکی ناوەندیی عێراق و کۆمپانیای سۆمۆ بۆ بەبازاڕکردنی نەوت و وەزارەتەکانی دەرەوە و بەرگری".
جێگری سەرۆکی فراکسیۆنی سادقون ئاشکرای کرد کە لە ناو چوارچێوەی هەماهەنگی گفتوگۆی چڕ هەیە بۆ تێپەڕاندنی ئەم قەیرانە. بەپێی زانیارییەکان، بڕیارە لە چەند ڕۆژی داهاتوودا نوری مالیکی بە فەرمی لە کاندیدبوونی پاشەکشە بکات.
موسەوی باسی لەوەش کرد کە لایەنەکان خەریکی ڕێککەوتنن لەسەر کەسایەتییەکی دیکە بۆ پۆستی سەرۆکوەزیران و دوای دیاریکردنی، ناوەکەی بە فەرمی ڕادەگەیەنرێت.