دۆناڵد ترەمپ، سەرۆکی ئەمریکا، جارێکی تر هۆشداریی توند دەداتە تاران و ڕایدەگەیەنێت کە گۆڕینی دەسەڵات لە ئێران بژاردەیەکی کراوەیە و دەکرێت ببێتە "باشترین ڕووداو". ئەم لێدوانانەی ترەمپ لە کاتێکدایە کە واشنتن هێزی سەربازیی زیاتر ڕەوانەی ناوچەکە دەکات.
ڕۆژی هەینی، دۆناڵد ترەمپ لە کۆشکی سپی بە ڕۆژنامەنووسانی ڕاگەیاند، هیوادارە گفتوگۆکان لەگەڵ ئێران سەرکەوتوو بن، بەڵام وتیشی: "دەبێت ئەم دانوستانانە ئەنجامیان هەبێت، ئەگەر نا، ڕۆژێکی زۆر خراپ و کارەساتبار چاوەڕێی ئێران دەکات."
کاتێک پرسیاری لێکرا سەبارەت بە گۆڕینی ڕژێمی ئێران، ترەمپ وتی: "پێدەچێت ئەوە باشترین شت بێت کە ڕووبدات."
سەرۆکی ئەمریکا ئاشکرای کرد کە فەرمانی کردووە کەشتییەکی تری فڕۆکەهەڵگر (دووەم کەشتی) ڕەوانەی ڕۆژهەڵاتی ناوەڕاست بکرێت بۆ ئەوەی پەیوەندی بەو کەشتییەوە بکات کە ئێستا لە ناوچەکەدایە. ترەمپ بە ڕاشکاوی وتی: "ئەگەر نەگەیشتینە ڕێککەوتن، پێویستمان بەم هێزە دەبێت، بەڵام ئەگەر ڕێککەوتین، ڕەنگە ناوچەکە جێبهێڵن."