پوختەی خاڵە هەرە گرنگەکانی بڕیارنامەکەی پەرلەمانی ئەوروپا پەیوەست بە ڕۆژئاوای کوردستان و سوریا

1. دۆخی مرۆیی و توندوتیژی:

پەرلەمان بە توندی سەرکۆنەی هێرشەکان بۆ سەر مەدەنییەکان و ژێرخانی شارە کوردییەکانی وەک کۆبانی، قامیشلۆ و حەسەکە دەکات. داوای کردنەوەی ڕێڕەوی مرۆیی بەپەلە دەکات بۆ گەیاندنی ئاو، خۆراک و دەرمان بۆ ئاوارەکان.

2. داننان بە مافەکانی کورد:

پێشوازی لە مەرسوومی پێدانی ڕەگەزنامە بە کوردەکان و ناساندنی زمانی کوردی وەک زمانێکی نیشتمانی لە سووریا دەکات. جەخت دەکاتەوە کە بەبێ بەشداری سیاسی و پاراستنی مافەکانی کورد، سووریا سەقامگیر نابێت.

3. ڕێککەوتنی هەسەدە و دیمەشق:

پشتگیری لە ڕێککەوتنی نێوان هێزەکانی سووریای دیموکرات (هەسەدە) و حکومەتی سووریا دەکات بۆ پاراستنی ئاگربەست و تێکەڵکردنی هێزەکان، بەو مەرجەی مافە مەدەنییەکانی کورد پارێزراو بن.

4. دەستێوەردانی تورکیا:

داوا لە تورکیا دەکات دەستبەجێ هێرشە سەربازییەکانی بۆ سەر باکووری ڕۆژهەڵاتی سووریا ڕابگرێت و ڕێز لە سەروەری خاک و یەکپارچەیی سووریا بگرێت.

5. مەترسییەکانی داعش:

نیگەرانی قووڵ هەیە لە هەڵاتنی چەکدارانی داعش لە زیندانەکان و کشانەوەی هێزەکانی ئەمریکا. پەرلەمان داوا لە وڵاتانی ئەورووپا دەکات هاووڵاتیانی خۆیان (بەتایبەت منداڵان) لە کەمپەکانی هۆڵ و ڕۆژ وەربگرنەوە.

6. ستایشی شەڕڤانانی کورد:

پەرلەمانی ئەورووپا ستایشی ئازایەتی شەڕڤانانی کورد (بەتایبەت ژنان) دەکات لە تێکشکاندنی داعش و پاراستنی ئاسایشی جیهان و ئەورووپا.

7. هاوکارییە داراییەکان:

یەکێتی ئەورووپا بڕی 620ملیۆن یۆرۆی بۆ ساڵانی 2026-2027-تەرخان کردووە، بەڵام ئەم هاوکارییانە مەرجدارن بە پاراستنی مافەکانی مرۆڤ و بەردەوامی ئاگربەست.