حکومەتی ئەمریکا گەورەترین دۆسیەی دەستدرێژی سەر منداڵان دادەپۆشێت

لە کۆنگرەیەکی ڕۆژنامەوانیدا کە دەنگدانەوەیەکی گەورەی لە واشنتن لێکەوتەوە، میلانی ستانسبێری، ئەندامی ئەنجوومەنی نوێنەرانی ئەمەریکا، حکومەتی وڵاتەکەی بە ئەنجامدانی "گەورەترین پڕۆسەی داپۆشینی تاوان" لە مێژوودا تۆمەتبار کرد. پەرلەمانتارەکە ئاماژەی بەوە دا کە بەرپرسانی باڵا هەوڵی شاردنەوەی ڕاستییەکانی پەیوەست بە دۆسیەی بازرگانیکردن بە مرۆڤ و دەستدرێژیی سێکسیی جێفری ئێپستین دەدەن.

ناوە دیارەکان کێن؟

ستانسبێری لەبەردەم باڵەخانەی کاپیتۆڵ، پەردەی لەسەر چەندین ناوی هەستیار هەڵماڵی کە بە وتەی ئەو لە بەڵگەنامە نهێنییەکاندا بوونیان هەیە، دیارترینیان بریتین لە:

ئیلۆن مەسک، ملیاردێر و بەرپرسی پێشووی ئاژانسی کارامەیی حکومەت.

هاوارد لوتنیک، وەزیری بازرگانیی ئێستا.

ستیڤ بانن، ڕاوێژکاری ستراتیژیی پێشووی دۆناڵد ترەمپ.

جۆن فیلان، وەزیری هێزە دەریاییەکان.

خانمە پەرلەمانتارەکە ڕاشکاوانە ڕایگەیاند: "زیاتر لە ٣٠ کەسایەتی کە پەیوەندیی ڕاستەوخۆیان بە خێزان و خودی دۆناڵد ترەمپەوە هەیە، ناویان لەم دۆسیانەدا هاتووە."

داپۆشینی تاوان و درۆکردن

ستانسبێری جەختی کردەوە کە بەشێک لە بەرپرسانی ئێستای ئیدارەی ئەمەریکا لەژێر سوێندی یاساییدا "درۆیان لەگەڵ گەلی ئەمەریکا و کۆنگرێس کردووە" و بەڵێنی دا لێپرسینەوەیان لەگەڵ بکرێت. ناوبراو ئاماژەی بەوەش دا کە لە کاتێکدا نزیکەی ١٠ وڵاتی دیکەی جیهان بەهۆی پەیوەندی لەگەڵ ئێپستین لێکۆڵینەوەیان لە بەرپرسانیان کردووە و ناچاری دەستلەکارکێشانەوەیان کردوون، کەچی لە ئەمەریکا هەوڵ دەدرێت دۆسیەکە ون بکرێت.

کێڵگەی "زۆرۆ" و کەمتەرخەمیی FBI

لە بەشێکی دیکەی قسەکانیدا، ستانسبێری بە نیگەرانییەوە باسی لە کێڵگەی (ڕانچی زۆرۆ) کرد لە ویلایەتی نیو مەکسیکۆ، کە بە ناوەندێکی سەرەکیی ڕووداوەکان دادەنرێت. ئەو ڕەخنەی توندی لە نووسینگەی لێکۆڵینەوەی فیدراڵی (FBI) گرت و وتی: "سەرەڕای ئەوەی قوربانییەکان سکاڵایان کردووە، بەڵام ئێف بی ئای هەرگیز لێکۆڵینەوەی تەواوەتی لەو شوێنە نەکردووە کە نهێنیی زۆر تاریک و قێزەونی تێدایە."

لە کۆتاییدا پەرلەمانتارەکە پەیامێکی ئاراستەی قوربانییەکان کرد و وتی: "باوەڕتان پێ دەکەین؛ ئێوە ٢٠ ساڵە هاوار دەکەن و ناوەکانمان پێ دەڵێن. تا دادپەروەری جێبەجێ نەبێت، دەست لە بەدواداچوون هەڵناگرین.