ئەمڕۆ دووشەممە، حکومەتی عێراق جێبەجێکردنی سزای لەسێدارەدانی بەسەر یەکێک لە دیارترین کاربەدەستانی پێشووی ڕژێمی بەعس دا ڕاگەیاند، کە دەستی هەبووە لە کوشتنی کەسایەتیی ئایینی و سیاسی، محەممەد باقر سەدر.
ئەرشەد حاکم، گوتەبێژی دەزگای ئاسایشی نیشتمانیی عێراق، لە لێدوانێکی تایبەتدا بۆ میدیاکان ئاشکرای کرد کە دوای بڕینی هەموو قۆناغە یاساییەکان و پەسندکردنی لەلایەن دادگاوە، سزای لەسێدارەدان بەسەر سەعدوون سەبری قەیسیدا جێبەجێ کرا.
سەعدوون سەبری قەیسی، کە کاربەدەستێکی باڵای سەردەمی بەعس بووە، لە هاوینی ساڵی 2025 لە لایەن دادگای باڵای تاوانەکانی عێراقەوە بڕیاری لەسێدارەدانی بۆ دەرچووبوو. بەپێی بەڵگەنامەکانی دادگا، ناوبراو تێوەگلابوو لە:
- تیرۆرکردنی محەممەد باقر سەدر و بنتولهودای خوشکی لە ساڵی 1980.
- ئەنجامدانی تاوانی دژی مرۆڤایەتی بەرامبەر بە زانایانی بنەماڵەی حەکیم.
- کوشتن و بێسەروشوێنکردنی ژمارەیەک هاووڵاتی بێتاوان.
محەممەد باقر سەدر، کە وەک دامەزرێنەری حیزبی دەعوە و بیرمەندێکی گەورەی شیعە دەناسرێت، لە ساڵی 1980دا لەگەڵ خوشکەکەی لەلایەن ڕژێمی پێشووی عێراقەوە دەستگیرکران و دواتر کوژران.
جێبەجێکردنی ئەم سزایە دوای زیاتر لە 46 ساڵ بەسەر ئەو ڕووداوەدا دێت.