بومەلەرزە لە بازاڕی کانزا گرانبەهاکان؛ نرخی زێڕ و زیو بە توندی دابەزین

ڕۆژی دووشەممە، لە بازاڕەکانی جیهاندا، کانزا گرانبەهاکان پاشەکشەیەکی توندیان بەخۆوە بینی. نرخی زێڕ لە مامەڵە دەستبەجێکاندا زیاتر لە 3% و نرخی زیویش بە ڕێژەی 5% دابەزین، ئەمەش دوای ئەوەی بۆرسەی شیکاگۆ ڕێکاری نوێی بۆ مامەڵەکان ڕاگەیاند.

هۆکاری سەرەکی دابەزینەکە چییە؟

بەپێی ڕاپۆرتە ئابوورییەکان، هۆکاری سەرەکی ئەم دابەزینە دەگەڕێتەوە بۆ چوونەبواری جێبەجێکردنی بڕیارێکی گرووپی CME (بۆرسەی شیکاگۆ) بۆ بەرزکردنەوەی "داواکارییەکانی هامش" (Margin Requirements) لەسەر گرێبەستە ئایندەییەکانی کانزا گرانبەهاکان. ئەم ڕێکارە دەبێتە هۆی کەمبوونەوەی نەختینە و ناچارکردنی وەبەرهێنەران بۆ فرۆشتنی گرێبەستەکانیان (Liquidation).

زێڕ لە بەرزترین ئاستەوە بۆ نزمترین

نرخی زێڕ لە مامەڵە دەستبەجێکاندا بە ڕێژەی 3.3% دابەزی و گەیشتە 4703.27 دۆلار بۆ هەر ئۆنسەیەک، ئەمە لەکاتێکدایە کە پێنجشەممەی ڕابردوو زێڕ ئاستێکی پێوانەیی مێژوویی تۆمارکردبوو کە 5594.82 دۆلار بوو. هاوکات گرێبەستە ئایندەییەکانی ئەمریکاش بۆ مانگی نیسان بە ڕێژەی 0.3% دابەزین.

نرخی کانزاکانی تر لە بازاڕدا:

داکشانەکە تەنها زێڕی نەگرتەوە، بەڵکو کانزاکانی تریش بەم شێوەیە زیانمەند بوون:

زیو: بە ڕێژەی 5% دابەزی و گەیشتە 80.28 دۆلار (دوای ئەوەی لە لوتکەدا 121.64 دۆلار بوو).

​پلاتینیۆم: بە ڕێژەی 4.1% دابەزی و گەیشتە 2074.70 دۆلار.

​پەلادیۆم: بە ڕێژەی 3.3% دابەزی و گەیشتە 1642.35 دۆلار.

شارەزایان پێیان وایە جگە لە بڕیارەکەی CME، چاوەڕوانی وەبەرهێنەران بۆ ئاراستەی سیاسەتی نەختینەیی بانکی ناوەندیی ئەمریکا (فیدراڵ ڕیزەرف) کاریگەری گەورەی لەسەر ناجێگیری نرخەکان هەبووە.