نوری مالیکی، سەرۆکی هاوپەیمانی دەوڵەتی یاسا، لە پەیامێکی نوێدا جەختی لەسەر پاراستنی مافی گەلی عێراق لە دیاریکردنی چارەنووسی سیاسی خۆیان کردەوە و ڕایگەیاند، هەڵبژاردنی سەرکردەکان و حکومەت شانازییەکی نیشتمانییە و دەبێت وڵاتانی تر ڕێزی لێ بگرن.
مالیکی ڕایگەیاند: "ئێمە دەستبەرداری مافی عێراقییەکان نابین و کەمتەرخەمی ناکەین لە هەڵبژاردنی ئەو کەسانەی کە گەل متمانەیان پێیەتی و لێهاتووییان تێدا دەبینێت بۆ سەرکردایەتیکردنی قۆناغەکە."
ئاماژەی بەوەش کرد کە عێراق ڕێز لە ئیرادەی نیشتمانی و بڕیاری سەربەخۆی خۆی دەگرێت و چاوەڕوانیشە ئەوانی تر بە هەمان شێوە ڕێز لەم بڕیارانە بگرن، وەک چۆن عێراق ڕێز لە کاروباری ناوخۆی ئەوان دەگرێت.
سەبارەت بە پەیوەندییە نێودەوڵەتییەکان، مالیکی گوتی، کە وڵاتەکەی خوازیاری دروستکردنی پەیوەندییەکی هاوسەنگی سیاسی، ئابووری و ئەمنییە لەگەڵ هەموو دەوڵەتانی ناوچەکە و وڵاتە زلهێزەکان.
جەختیشیکردەوە کە ئەم پەیوەندییانە دەبێت لەسەر بنەمای "هاوبەشی و بەرژەوەندی هاوبەش" بن، بەتایبەت لەگەڵ ئەو وڵاتانەی هاوکاری عێراق بوون، دوور لە هەر دەستوەردانێک یان کاریگەرییەکی نەرێنی.
لە کۆتایشدا سەرۆکی هاوپەیمانی دەوڵەتی یاسا دووپاتی کردەوە کە ڕێزگرتن لە دیموکراسی و مافی گەل لە هەڵبژاردنی سیستەمی سیاسی لە ڕێگەی دامەزراوە دەستوورییەکانەوە، پرەنسیپێکی نەگۆڕە لای ئێمە و بەردەوام دەبین لەسەر ئەم ڕێڕەوە و پاشەکشەی لێ ناکەین.