لە دواساتەکانی مامەڵەی رۆژی هەینیدا، بازاڕی زێڕ لە جیهاندا شڵەژانێکی گەورەی بەخۆیەوە بینی. دوای ئەوەی نرخەکەی بۆ ئاستێکی پێوانەیی و مێژوویی بەرزبووەوە، بە توندی داڕما و لە ماوەی چەند کاتژمێرێکدا نزیکەی 9٪ی بەهاکەی لەدەستدا.
سەرەتای رۆژەکە بۆ زێڕ ئەرێنی بوو، نرخەکەی نزیکبووەوە لە 5,600 دۆلار بۆ هەر ئۆنسەیەک، بەڵام بڕیارێکی سیاسی و ئابووری لە واشنتنەوە هاوسەنگییەکانی گۆڕی. کاتێک دۆناڵد ترەمپ، سەرۆکی ئەمریکا، کێڤین وارشی وەک کاندید بۆ پۆستی سەرۆکی بانکی ناوەندیی ئەمریکا (فیدراڵ رزەرف) لە شوێنی جیرۆم پاوڵ دەستنیشان کرد، بازاڕەکان کاردانەوەی خێرایان نیشان دا.
هۆکارەکانی دابەزینە کتوپڕەکە
1- فاکتەری سیاسی: کاندیدکردنی کێڤین وارش کە بە کەسایەتییەکی "توند" لە سیاسەتی نەختینەیدا دەناسرێت، دۆلاری بەهێز کرد.
2- بەهێزبوونی دۆلار: پەیوەندییە پێچەوانەکەی نێوان دۆلار و زێڕ وایکرد بە بەرزبوونەوەی دراوی ئەمریکی، زێڕ بە خێرایی پاشەکشە بکات.
3- کۆکردنەوەی قازانج: زۆرێک لە وەبەرهێنەران دوای گەیشتنی زێڕ بە لووتکە، دەستیان کرد بە فرۆشتنی پشکەکانیان بۆ بەدەستهێنانی قازانج،
ئەمەش وایکرد نرخەکە زیاتر بشکێت.
نرخەکان لە کاتی داخستنی بازاڕدا
لە نزمترین ئاستی رۆژەکەدا، نرخی هەر ئۆنسەیەک زێڕ بۆ 4,687 دۆلار دابەزی. هەرچەندە لە کاتژمێرەکانی کۆتایی داخستنی بازاڕدا کەمێک خۆڕاستکردنەوەی بەخۆیەوە بینی، بەڵام دواجار بە 4,894 دۆلار بۆ هەر ئۆنسەیەک جێگیر بوو، کە دەکاتە دابەزینێکی 9٪ لە ماوەی تەنیا یەک رۆژدا.