دوای نزیکەی سێ هەفتە لە نکۆڵیکردنی فەرمی، حکومەتی ئێران بۆ یەکەمجار دانی نا بەوەی کە ژمارەی کوژراوانی خۆپێشاندانەکانی ئەم دواییە، کە بە "ڕاپەڕینی ڕیاڵ" ناسراوە، ئاستێکی پێوانەیی تۆمارکردووە و گەیشتووەتە زیاتر لە 5 هەزار کەس.
ئاژانسی هەواڵی "ڕۆیتەرز" لە زاری بەرپرسێکی باڵای ئێرانییەوە بڵاویکردەوە، کە تاران دانی بەوەدا ناوە کە لە میانی پێکدادانەکاندا زیاتر لە 5000 کەس گیانیان لەدەستداوە. بەپێی گوتەی ئەو بەرپرسە نزیکەی 500 کەس لە کوژراوەکان ئەندامی هێزە ئەمنییەکانن و زۆرینەی ڕههای قوربانیانی دیکە لەنێو ڕیزەکانی خۆپێشاندەران و هاووڵاتیانن.
هەر لەو ڕاپۆرتەدا ئاماژە بەوە کراوە کە پارێزگا کوردنشینەکانی باکووری ڕۆژئاوای ئێران زۆرترین ڕێژەی کوژراوانیان تێدا تۆمارکراوە. ئەم ناوچانە گۆڕەپانی توندترین و خوێناویترین پێکدادان بوون لەنێوان هێزە ئەمنییەکان و بەشداربووانی "ڕاپەڕینی ڕیاڵ"، کە بەهۆی داڕمانی بەهای دراو و بارودۆخی بژێوییەوە سەری هەڵدا.
ئەم دانپێدانانەی ئێران دوای گوشارێکی زۆری نێودەوڵەتی و بڵاوبوونەوەی ڕاپۆرتە مەیدانییەکان دێت، کە پێشتر تاران هەوڵی دەدا ئامارە ڕاستەقینەکان بشارێتەوە یان بە کەمتر لە قەبارەی خۆی نیشانی بدات. چاودێران پێیان وایە ئەم ژمارەیە گەورەیە ئاماژەیە بۆ قووڵی قەیرانە نێوخۆییەکانی ئێران و ئەو توندوتیژییە زۆرەی کە بۆ کپکردنەوەی ناڕەزایەتییەکان بەکارهاتووە.