ڕیال مەدرید کۆتایی بە سەردەمی چابی ئاڵۆنسۆ هێنا
چیرۆکی چابی ئاڵۆنسۆ و ڕیال مەدرید گەیشتە وێستگەی کۆتایی. ئەو گەشتەی بە ئاوازێکی ئەفسوناوی دەستی پێکرد، بە کەمانچەی سوێری کابووسێک کۆتایی هات. یانەی ڕیال مەدرید بە فەرمی دوورخستنەوەی چابی ئاڵۆنسۆی لە پۆستی ڕاهێنەرایەتی ڕاگەیاند، دوای تاقیکردنەوەیەکی ئازاربەخش کە نەتوانرا زیاتر بەرگەی بگرن.
بەیاننامە فەرمییەکەی یانەی شاهانە
یانەی ڕیال مەدرید لە ڕاگەیەندراوێکی فەرمیدا ئاماژەی بەوە کردووە:
"ڕیال مەدرید ڕایدەگەیەنێت کە بە ڕێککەوتنی هەردوولا، کۆتایی بە ئەرکی چابی ئاڵۆنسۆ وەک ڕاهێنەری تیپی یەکەم هێنرا. چابی هەمیشە وەک ئەفسانەیەک و نوێنەری بەهاکانی یانەکە دەمێنێتەوە و بێرنابیۆ هەمیشە ماڵی ئەو دەبێت. سوپاسی خۆمان بۆ ئەو و ستافەکەی دەردەبڕین بۆ ئەو کار و خۆبەخشییەی لەم ماوەیەدا پێشکەشیان کرد."
ژمارەکان چی دەڵێن؟ لەماوەی ٦ مانگ دا
کاروانی ئاڵۆنسۆ لە مەدرید تەنها 232 ڕۆژ (نزیکەی 6 مانگ) بەردەوام بوو. لەو ماوەیەدا سەرپەرشتی 34 یاری کرد:
24 بردنەوە.
4 یەکسانبوون.
6 دۆڕان.
ئەم ژمارانە لە ڕووکەشدا خراپ نین، بەڵام کێشە گەورەکە لە "داڕمانی کتوپڕ"ی ئاستی تیپەکەدا بوو.
وەرچەرخانە ترسناکەکە: لە لوتکەوە بۆ لێواری کەوتن
تاکو 1ی تشرینی دووەم و پێش یارییەکەی ڤالێنسیا، ئاڵۆنسۆ وەک "پاشا" دەردەکەوت؛ لە 20 یاریدا 17 بردنەوەی هەبوو و بە 5 خاڵ پێشەنگی خولەکەی گرتبوو. بەڵام تەنها لە ماوەی 41 ڕۆژدا هەموو شتێک سەرەوژێر بووەوە:
تەنها 3 بردنەوە لە 9 یاری کۆتاییدا.
لەدەستدانی پێشەنگی خول و دوورکەوتنەوە بە 4 خاڵ.
کەوتنە لێواری ماڵئاواییکردن لە چامپیۆنزلیگ.
ئەو شکستە پاشکۆیانەی بەرامبەر (لیڤەرپوول، ڤالیکاس، ئێلچی، جیرۆنا و سێلتاڤیگۆ) و لە کۆتاییشدا "مانچستەر سیتی"، گورزی کوشندەیان لە پڕۆژەکەی چابی دا.
هۆکارە شاراوەکان: تەنها ئەنجام نەبوو!
سەرچاوە نزیکەکان لە یانەکە باس لەوە دەکەن کە دوورخستنەوەی ئاڵۆنسۆ تەنها پەیوەندی بە ئەنجامەوە نەبووە، بەڵکو:
ونبوونی ناسنامە: تیپەکە چیتر شێوازێکی یارییکردنی ڕوونی نەمابوو.
کێشەی جەستەیی: یاریزانەکان لە ڕووی لەشجوانییەوە لە ئاستی پێویستدا نەبوون.
پەیوەندی لەگەڵ ژووری جلگۆڕین: هەست دەکرا ئاڵۆنسۆ پەیوەندییە گەرمەکەی لەگەڵ یاریزانەکان لەدەستداوە.
کۆتا دەرفەت کە سوودی نەبوو
کارگێڕی مەدرید دەرفەتی سێ یاری کۆتایی ساڵی 2025یان دابوو بە ئاڵۆنسۆ بۆ ئەوەی وێنەی تیپەکە چاک بکاتەوە، بەڵام وەک "پاشایەک کە لە چەکمات ڕابکات"، چابی هیچ پارچەیەکی بۆ شەڕکردن پێ نەمابوو. شکستی شەوی ڕابردوو بەرامبەر سیتی، کۆتا بزمار بوو لە تابووتی کاروانی ئاڵۆنسۆ وەک ڕاهێنەری سپی پۆشەکان.
ئێستا پرسیارە گەورەکە ئەوەیە: کێ دەبێتە فریادڕەسی نوێی سانتیاگۆ بێرنابیۆ؟