بەڕێوەبەرایەتی گشتی کەشناسی و بوومەلەرزەزانی هەرێم ئاگادارییەکی نوێی بڵاوکردەوە و ڕایگەیاند، لە ئێوارەی ئەمڕۆوە هەرێمی کوردستان دەکەوێتە ژێر کاریگەری شەپۆلێکی بەفر و باران کە لە دەریای ناوەڕاستەوە سەرچاوەی گرتووە.
بەپێی زانیارییەکانی کەشناسی، ئەمڕۆ دووشەممە ئاسمان نیمچە هەور دەبێت لە ناوچە سنوورییەکانی ڕۆژهەڵات و سەنتەری پارێزگای سلێمانی، تەمومژ تا درەنگانی شەو بەردەوام دەبێت. لە کاتەکانی ئێوارەدا بارانبارین لە دهۆکەوە دەستپێدەکات و پاشان ناوچەکانی تری هەرێم دەگرێتەوە، هەروەها سبەی سێشەممە ئاسمانی هەرێم بە گشتی هەوری باراناوی دەبێت. لە سەنتەری پارێزگاکانی سلێمانی، دهۆک و هەڵەبجە و ناوچە شاخاوییە بەرزەکان ئەگەری بەفربارین هەیە.
پێشبینی دەکرێت پلەکانی گەرما بە ڕێژەی 3 بۆ 4 پلە ڕوو لە دابەزین بکەن.
کەشناسی ئاماژەی بەوەشکردووە کە ئەم ناسەقامگیرییەی کەشوهەوا تا ڕۆژی چوارشەممە بەردەوام دەبێت، بەو هۆیەشەوە داوا لە هاوڵاتییان و شۆفێران دەکرێت لە ناوچە شاخاوییەکان و ئەو شوێنانەی تەم و بەفری لێیە، وریاتر بن.