بەتۆمەتی سیخوڕی بۆ ئیسرائیل، ئێران 200 سەرکردەی خۆپیشاندانەکانی دەستگیرکرد

میدیای فەرمی ئێران (ئاژانسی تەسنیم) بڵاویکردەوە، هێزە ئەمنییەکان 200 کەسیان وەک "سەرکردەی ئاژاوەگێڕان" دەستگیرکردووە. بەپێی هەواڵەکە، لە حەشارگەی ئەو کەسانەدا دەست بەسەر بڕێکی زۆر چەک و تەقەمەنیدا گیراوە و تۆمەتبارکراون بەوەی پەیوەندییان بە دەزگای هەواڵگری ئیسرائیل (مۆساد)ـەوە هەبووە. ئاژانسەکە بانگەشەی ئەوە دەکات کە ئەم دەستگیرکردنانە بوونەتە هۆی هێورکردنەوەی دۆخەکە.

عەلی لاریجانی، سکرتێری ئەنجومەنی باڵای ئاسایشی نیشتمانی، وێڕای داننان بە بوونی قەیرانی ئابووری، هۆشداریدا کە وڵات لە دۆخی جەنگدایە و دروستکردنی قەیرانی ناوخۆیی"ژیرانە نییە". ناوبراو جەختی کردەوە کە هێزە ئەمنییەکان بەبێ دوودڵی و بە توندی مامەڵە لەگەڵ ئەو گروپە چەکدارانە دەکەن کە دامەزراوەکان دەکەنە ئامانج.

ناڕەزایەتییەکان بەهۆی دابەزینی بەهای تمەن سەریان هەڵداوە و بووە هۆی گۆڕینی پارێزگاری بانکی ناوەندی (لە محەمەد فەرزینەوە بۆ عەبدولناسر هێماتی). خۆپیشاندانەکان لە چەند شارێک توندوتیژی و دروشمی دژی سیستەمی لێکەوتەوە و بووە هۆی برینداربوونی خۆپیشاندەران و هێزە ئەمنییەکان.