پسپۆڕانی چاودێری پێست ئاماژە بەوە دەکەن کە ڕەفتارێکی باوی ڕۆژانە، کە زۆر کەس پێیان وایە بێ زیانە، ڕەنگە هۆکارێکی شاراوە بێت بۆ تێکچوونی تەندروستی پێست و دەرکەوتنی نیشانەکانی ماندوێتی و پیری پێشوەختە. بەکارهێنانی ئاوی زۆر گەرم بۆ شتنی دەموچاو، بەتایبەتی لە کەشوهەوای سارددا، هەستێکی کاتی بە ئارامی دەبەخشێت، بەڵام لە بەرامبەردا ڕەنگە زیانی درێژخایەن بەجێبهێڵێت کە کاریگەری لەسەر گەشاوەیی و نەرموونیانی پێست دەبێت.
دکتۆرە ئانیت فیلیپس، پسپۆڕی جوانکاری، ئاماژە بەوە دەکات کە بەرکەوتنی بەردەوامی پێست بە ئاوی گەرم دەبێتە هۆی لاوازکردنی ئەو چینە سروشتییەی کە هاوسەنگی شێداری دەپارێزێت و پێست لە فاکتەرە دەرەکییەکان دەپارێزێت، ئەمەش هەڵەیەکی باوە کە بەردەوام لە کلینیکەکەیدا تێبینی دەکات.
چەند ڕێنماییەک بۆ پاراستنی پێست لە چرچی:
- دوورکەوتنەوە لە ئاوی زۆر گەرم: ئاوی گەرم چینی چەوری سروشتی پێست تێکدەشکێنێت و دەبێتە هۆی وشکبوونەوە و دەرکەوتنی چرچی پێشوەختە.
- بەکارهێنانی ئاوی شلەتێن: باشترە لەکاتی خۆشتن یان شتنی دەموچاو ئاوی فێنک یان شلەتێن بەکاربێت بۆ پاراستنی هاوسەنگی شێداری پێست.
- بەرهەمی تایبەت: هەرگیز سابوون یان ئەو بەرهەمانەی بۆ جەستە دروستکراون بۆ دەموچاو بەکارمەهێنە؛ هەروەها ئاگاداربە ماددەکانی چاودێری قژ (وەک مەکەیف) بەر پێستت نەکەون.
- نیشانەی مەترسی: هەستکردن بە توندی یان ڕاکێشانی پێست (Tightness) دوای شتن، نیشانەی ئەوەیە ئاوەکە زۆر گەرم بووە یان پاککەرەوەکە قورس بووە.
- شێدارکردن (Moisturizing): ڕاستەوخۆ دوای شتن و کاتێک پێستەکە هێشتا کەمێک تەڕە، کرێمی شێدارکەر بەکاربهێنە بۆ ئەوەی شێدارییەکە لەناو پێستدا زیندانی بکەیت.
- جێگیری لە ڕۆتین: بۆ پێستی هەستیار، بەردەوام بەرهەمەکانت مەگۆڕە؛ ڕۆتینێکی سادە و جێگیر باشترین ڕێگەیە بۆ ئەوەی پێستت هاوسەنگی خۆی بەدەست بهێنێتەوە.