هێڵی ئاسمانیی تورکیا بڕیاری دا گەشتەکانی بۆ سێ شاری گەورەی ئێران بۆ ماوەی دوو ڕۆژ ڕابگرێت، هۆکارەکەشی بۆ ئەو ئاڵۆزی و پێشهاتانە گەڕاندووەتەوە کە لەو وڵاتەدا ڕوو دەدەن.
ئەمڕۆ هەینی نۆی کانوونی دووەمی 2026، کۆمپانیای هێڵی ئاسمانیی تورکیا (Turkish Airlines) لە بەیاننامەیەکدا ڕای گەیاند: "بەهۆی پێشهاتە هەرێمییەکان لە ئێران، بڕیارمان داوە ژمارەیەک لە گەشتەکانمان هەڵبوەشێنینەوە".
بەپێی بەیاننامەکە، 17 گەشتی دیاریکراو بۆ هەردوو ڕۆژی هەینی نۆی کانوونی دووەم و شەموو 10ی کانوونی دووەم بۆ شارەکانی تاران، تەورێز و مەشهەد هەڵوەشێنراونەتەوە.
ئەم بڕیارەی تورکیا لە کاتێکدایە کە خۆپێشاندان و گرژی لە شارەکانی ئێران پەرەی سەندووە و دۆخی تەناهیی ئەو وڵاتە ناسەقامگیرە.