نرخی نەوت کەمێک بەرزبووەوە

ئەمڕۆ دووشەممە نرخی نەوت کەمێک بەرزبووەوە لەکاتێکدا بازاڕەکان چاوەڕوانی ئاکامی گۆڕانکارییە سیاسیەکان بوون لە ڤەنزوێلا وەک وڵاتێکی ئەندامی ئۆپێک.

نرخی بەرمیلێک نەوتی خاوی برێنت 17 سەنت بەرزبووەوە و گەیشتە 60 دۆلار و 92 سەنت، هاوکات نرخی بەرمیلێک نەوتی خاوی ئەمریکای ڕۆژئاوای تەکساس 11 سەنت بەرزبووەوە و گەیشتە 57 دۆلار و 43 سەنت.

ئەم هەنگاوانە دوای ئەوە هات کە دۆناڵد ترەمپ سەرۆکی ئەمریکا دەستگیرکردنی نیکۆلاس مادۆرۆی سەرۆکی ڤەنزوێلا ڕاگەیاند، هاوکات دووپاتیکردەوە کە گەمارۆکانی ئەمریکا بۆ سەر نەوتی ڤەنزوێلا هێشتا بە تەواوی هێزی خۆیەوە ماوە.

سەرچاوە ئاگادارەکان لە کارەکانی کۆمپانیای نەوتی دەوڵەتی ڤەنزوێلا، PDVSA، ڕایانگەیاند کە پێشهاتەکانی ئەم دواییە بەرهەمهێنانی نەوت یان پاڵاوتنی نەوتیان لە وڵاتەکەدا پەک نەخستووە و تا ئێستا هیچ پچڕانێکی بارکردن تۆمار نەکراوە.

لەلایەکی دیکەوە بەرپرسێکی باڵای ڤەنزوێلا ڕایگەیاند کە حکومەتی کاتی لە پشت مادۆرۆوە بە یەکگرتوویی دەمێنێتەوە، ئەمەش لە کاتێکدایە کە گرژییە سیاسییەکان لە وڵاتەکەدا پەرەدەسەنن.

لە پێشهاتێکی پەیوەندیداردا، ڕێکخراوی وڵاتانی هەناردەکاری نەوت و هاوپەیمانەکانی (ئۆپێک+) بڕیاریاندا ئاستی بەرهەمهێنان وەک خۆی بهێڵنەوە، ئەمەش یارمەتیدەر بوو بۆ هێورکردنەوەی نیگەرانییەکانی دابینکردن.

وەبەرهێنەران هەروەها چاودێری پێشهاتەکانی ئێران دەکەن، ئەمەش دوای هەڕەشەکانی ئەمریکا بۆ دەستێوەردان لەسەر ناڕەزایەتییە بەردەوامەکان، کە ڕێکخراوەکانی مافی مرۆڤ لە ڕاپۆرتێکدا بڵاویانکردۆتەوە، کە لە ماوەی هەفتەیەکدا لانیکەم 16 کەس کوژراون کە پەیوەندییان بە تێکچوونی بارودۆخی ئابووری و بەرزبوونەوەی ڕێژەی هەڵاوسانەوە هەیە.