ڕۆژنامەی وۆڵ ستریت جۆرناڵ بڵاویکردووەتەوە، مانگی رابردوو کەشتییەک سەدان کیلۆمەتر لە کەناراوەکانی سریلانکاوە دووربووە لە لایەن تیمێکی ئۆپەراسیۆنە تایبەتەکانی هێزی دەریایی ئەمریکا هێرشی كراوەتەسەر و دەستیان بەسەر بارەکەیدا گرتووە پێش ئەوەی ڕێگەی پێبدات بەردەوام بێت لە گەشتەکەی.
ئەم ئۆپەراسیۆنە کە پێشتر ڕانەگەیەندرابوو، لە چوارچێوەی هەوڵەکانی پنتاگۆن بۆ پەکخستنی تۆڕە سەربازییە نهێنییەکانی ئێران بوو، دوای ئەوەی ئەمریکا و ئیسرائیل لە کاتی شەڕێکی 12 ڕۆژەی مانگی حوزەیرانی ڕابردوودا زیانێکی زۆریان بە دامەزراوە ئەتۆمی و مووشەکییەکانی ئێران گەیاند.
ئەمە یەکەمجارە لە ماوەی ساڵانی ڕابردوودا کە سوپای ئەمریکا رێگری لە بارێكی چینی بكات کە لە ڕێگای ئێراندا بووە، ئەمەش وەک نیشانەیەک بۆ پەرەسەندنی ڕێوشوێنەکانی ئەمریکا بۆ سنووردارکردنی توانا سەربازییەکانی تاران لەنێو بەردەوامی گرژییەکان لەسەر بەرنامە ئەتۆمییەکەی.
چین لە مێژە هاوپەیمانێکی دیپلۆماسی و ئابووری ئێرانە و نەوتی خاوی ئێران هاوردە دەکات و سزاکانی ئەمریکا بۆ سەر تاران بە نایاسایی شەرمەزار دەکات. تا ئێستا ڕوون نییە کە ئایا حکومەتی چین ئاگاداری ئەو بارانەن کە بە مەبەستی بەرنامەی مووشەکی ئێرانن، کە زۆرجار لە لایەن کەشتی و کۆمپانیاکانی ژێر دەسەڵاتی ئێرانەوە ئەنجام دەدرێن.
ئۆپەراسیۆنەکە چەند هەفتەیەک پێش ئەوەی ئەمریکا دەستی بەسەر کەشتییەکی نەوتهەڵگری گەمارۆدراودا لە کەناراوەکانی ڤەنزوێلادا بگرێت کە ڕۆژی چوارشەممە بوو. ئەو تانکەرە بۆ گواستنەوەی نەوت لە ڤەنزوێلا بۆ ئێران بەکاردەهێنرا. ئەم کردەوانە ڕەنگدانەوەی گرتنەبەری تاکتیکی دەریایی شەڕانگێزتر لەلایەن ئیدارەی ترەمپەوەیە بەرامبەر بە نەیارەکانی، تاکتیکێک کە ئەمریکا لەم دواییانەدا بە دەگمەن بەکاری هێناوە.
فەرماندەیی هیندستان و زەریای هێمن ئەمریکا کە ئۆپەراسیۆنەکەی ئەنجامدا، ڕەتیکردەوە هیچ لێدوانێک بدات. وتەبێژانی ئێران و وەزارەتی دەرەوەی چینیش وەڵامی داواکارییەکانی بۆ لێدوانیان نەدایەوە.
بەرپرسێک ڕایگەیاند کە بارەکە پێکهاتەیەکی تێدابووە کە دەتوانرێت لە چەکی ئاسایی ئێراندا بەکاربهێنرێت، ئاماژەی بەوەشکرد کە بارەکە لەناوچووە. زیاتر ئاماژەی بەوەشکردووە، ئەو کەرەستەی دەستی بەسەردا گیراوە دوو بەکارهێنان بووە، واتە هەم بەکارهێنانی مەدەنی و هەم بەکارهێنانی سەربازییان هەیە.