بەگوێرەی وتەی سەرچاوەیەکی تایبەت کەلەناو گوندی لاجانەوە بۆ ئاپۆڕانیوز قسەی کردوە و نەیویست ناوی ئاشکرابکرێت ڕایگەیاند، لەدوای وەستانی شەڕ و پێکدادانەکان لەئێستادا هێزێکی زۆری ئەمنی لەچواردەورەی گوندی لاجان بڵاوەیان پێکراوە و ڕێگای سەرەکی هەولێر ـــ گوێڕیش داخراوە و ڕێگا بەچونی هیچ کەسێک نادرێت بچێتە ناو گوندەکەوە
هاوکات ئەوسەرچاوەیە باسی لەوەکردوە کە ئێوارەی ئەمڕۆ نوێنەری خۆپیشاندەرانی گوندی لاجان و بەرپرسانی ئەمنی لەهەولێر کۆبونەوەیەک ئەنجامدراوە، بەڵام کۆبونەوەکە شکستی هێناوە و هێزە ئەمنیەکان ڕەتیانکردۆتەوە ئەو کەسەی کە دەستگیرکراوە ئازادی بکەن
سەرچاوەکەی ئاپۆڕا باسی لەوەشکرد، بەهۆی شکستهێنانی کۆبونەوەکە پێیان وتراوە( ژن و منداڵەکان لەماڵەکاندا دوربخەنەوە و لەبەرامبەر یەکتردا دەوەستین)
هاوکات وتیشی، لەئێستادا هێڵی ئینتەرنێت و کارەبای گوندەکە بەتەواوەتی بڕدراوە و هێزێکی زۆری بێشوماری ئەمنی هاتونەتە نزیک گوندەکە و هەرکیەکانی ئەوسنورەش لە حاڵەتی ئامادەباشی تەواودان.
شایەنی باسە نیوەڕۆی ئەمڕۆ شەممە 28\11\2025 بەهۆی دەستگیرکردنی کەسێک کە لەخۆپیشاندانی پێنج شەممەی ڕابردوو بەشدارببو، جارێکی دیکە دانیشتوانی گوندی لەبەردەم کۆمپانیای لاناز خۆپیشاندان دەستی پێکرد و ڕێگای سەرەکی هەولێر ـــ گوێڕ بەتەواوی داخرا، دواتر گرژی و ئاڵۆزی لەنێوان خۆپیشاندەران و پاسەوانانی کۆمپانیاکە دروستبوو، بەهۆی تەقەی هەڕەمەکی ئەوهێزە کەسێک کوژرا و نزیکەی 10کەسی تریش برینداربوون کە برینی چەند کەسێکیان سەختە.