ئەمڕۆ شەممە ڕوانگەی ئيکۆ عێراق لە بەیاننامەیەکدا ڕایگەیاندووە، "زەرەر و زیانی ڕۆژانەی وەستانی بەرهەمهێنانی ئەو سێ جۆرە غازە لە کێڵگەی کۆرمۆر زیاتر لە 7.41 ملیۆن دۆلارە".
ڕوونیشی کردەوە کە "ئەو کێڵگەیە پێش هێرشەکە ڕۆژانە 530 ملیۆن پێ سێجا غازی سروشتی بەرهەمدەهێنا"، ئاماژەی بەوەشکرد "نرخی یەک ملیۆن پێ سێجا غازی سروشتی نزیکەی 10 هەزار دۆلارە".
ڕوانگەکە ڕوونی کردەوە کە "غازی سروشتی شل (LNG) کە بەشێوەیەکی باو بۆ بەرهەمهێنانی کارەبا بەکاردەهێنرێت، هاوردەکردن یان گواستنەوەی بۆ عێراق یان ناوچەکە زۆر گرانە"، هۆکاری ئەمەشی گەڕاندەوە بۆ "سەختی گواستنەوە و دابەزاندنی لە ڕێگەی بۆری عێراقییەوە و تێچووی زۆری گواستنەوەی کەشتیوانی".
ئاماژەی بەوەشکرد، "هەروەها کێڵگەکە ڕۆژانە 1580 تۆن LPG (کە بە غازی چێشت لێنان ناسراوە) بەرهەمدەهێنێت"، ئاماژەی بەوەشکرد "نرخی هەر تۆنێک 500 دۆلارە".
بەگوێرەی ئەو ڕوانگەیە، کۆرمۆر هەروەها ڕۆژانە نزیکەی 22 هەزار بەرمیل غازی کۆندێنسات بەرهەم دەهێنێت و نرخی هەر بەرمیلێک 60 دۆلارە.
ئیکۆ عێراق ئاماژەی بەوەدا کە "ئەم زیانانە، زیانەکانی داخستنی کرێی کۆمپانیا بەرهەمهێنەرەکان و تێچووی هێڵەکانی گواستنەوە و کەمبوونەوەی بەرهەمهێنانی کارەبا ناگرێتەوە".