لە بەیاننامەیەکدا عەلی ساعدی، ئەندامی لیژنەی ئاسایش و بەرگری پەرلەمانی عێراق ڕایگەیاندووە، "هێزەکانی تاریکی جارێکی دیکە هێرشیان کردووەتە سەر ئەو کێڵگەی غازەی کە کارەبای بۆ پێنج ملیۆن هاووڵاتی عێراقی دابین دەکات".
جەختیشی کردەوە کە "نابێت فشارە سیاسییەکان هەڕەشە لە هاووڵاتیان و وڵات بکەن، هەروەها نابێ چەک وەک ئامرازێک بۆ گەیشتن بە ئامانجە سیاسییەکان بەکاربهێنرێت".
ئەلسەعدی گوتیشی، پێویستە سەرۆک وەزیران تاوانباران دەستگیر بکات و بیانخاتە بەردەم دادگا.
پێشنوەڕۆی ئەمڕۆش شاندێکی باڵای حکومەتی فیدراڵی بە سەرۆکایەتی وەزیری ناوخۆ گەیشتنە شوێنی هێرشەکە لە قەزای چەمچەماڵ بۆ ئەنجامدانی لێکۆڵینەوەی مەیدانی.
هەر ئەمڕۆ سەباح نوعمان وتەبێژی فەرماندەی گشتی هێزە چەکدارەکان ڕایگەیاند، هێرشەکەی سەر کێڵگەی نەوتی کۆرمۆر کردەوەیەکی "تیرۆریستی" بووە، ئاماژەی بەوەشکرد، لیژنەی لێکۆڵینەوە لە ماوەی 72 کاتژمێردا ئەنجامەکانی خۆی ڕادەگەیەنێت.