رۆژی هەینی، 28ی تشرینی دووەمی 2025، شاندێکی باڵای ئەمنیی عێراق و هەرێمی کوردستان بە ئامادەبوونی عەبدولئەمیر ئەلشەمری، وەزیری ناوخۆی عێراق و رێبەر ئەحمەد، وەزیری ناوخۆی هەرێمی کوردستان و حەمید ئەلشەتری، سەرۆکی دەزگای هەواڵگریی نیشتمانیی عێراق سەردانی کێڵگەی کۆرمۆریان لە سنووری قەزای چەمچەماڵ کرد.
ئێوارەی ڕۆژی چوارشەممە، کێڵگەی غازی کۆرمۆر لە قەزای چەمچەماڵ لەلایەن فڕۆکەی بێفڕۆکەوانەوە هێرش کرایە سەر، لە ئەنجامدا ئاگر لە یەکێک لە کێڵگەکان کەوتەوە، بەبێ ئەوەی هیچ زیانێکی مرۆیی لێبکەوێتەوە، لەکاتێکدا کێڵگەکە زیانی ماددی بەرکەوتووە.
دوێنێ پێنجشەممە، محەممەد شیاع سودانی سەرۆکوەزیرانی کاربەڕێکەری عێراق و فەرماندەی گشتی هێزە چەکدارەکان، بڕیاریدا لیژنەیەکی باڵای لێکۆڵینەوە پێکبهێنێت سەبارەت بەو هێرشەی کە کێڵگەی غازی کۆرمۆری لە پارێزگای سلێمانی کردە ئامانج، کە بووە هۆی دابەزینی بەرچاوی پێدانی کارەبا لە هەرێمی کوردستان.