مارک ساڤایا، نێردەی تایبەتی ئەمەریکا بۆ عێراق ڕۆژی هەینی لە پۆستێکیدا لەگەڵ بڵاوکردنەوەی ئەم وێنانە لە تۆڕی کۆمەڵایەتی "ئێکس" دوپاتیکردۆتەوە کە ئەرکەکەی لە عێراق تیشک دەخاتە سەر بنیاتنانەوەی متمانە و پتەوکردنی هاوبەشی ستراتیژی نێوان بەغدا و واشنتۆن.
ئاماژەی بەوەشکرد، پەیوەندی نێوان هەردوو وڵات بە قۆناغێکدا تێدەپەڕێت کە پێویستی بە پەیوەندی ڕاستەوخۆ و ڕاستگۆیانە هەیە کە خزمەت بە بەرژەوەندییەکانی هەردوو گەل بکات.
مانگی تشرینی یەکەمی ڕابردوو دۆناڵد ترەمپ، سەرۆکی ئەمریکا بڕیاریدا مارک ساڤایا وەک نێردەی تایبەت لە عێراق دەستنیشان بکات.
مارک ساڤایا سێیەم نوێنەری ئەمەریکایە بۆ عێراق لە دوای پۆڵ بریمەر لە ساڵی 2003 و دوای برێت مەکگۆرک، لە کاتی شەڕی داعش لە ساڵی 2014.
