ڕۆژنامەی (نیویۆرک تایمز)ی ئەمریکی لە ڕاپۆرتێکیدا بڵاویکردوەتەوە، گروپە چەکدارە "چالاکەکان" لە ناوخۆی عێراق، کە پەیوەندی سیاسییان بە وڵاتێکی دراوسێیەوە هەیە تۆمەتبارن بە ئەنجامدانی هێرشەکەی سەر کێڵگەی گازی کۆرمۆر لە هەرێمی کوردستان.
ڕۆژنامەکە ئاماژەی بەوەکردووە، بەرپرسانی عێراقی و کورد لەدەرەوەی تۆمارەکە پشتڕاستیان کردووەتەوە کە هێرشەکە لەلایەن گروپە چەکدارە ناوخۆییەکانەوە ئەنجامدراوە کە پەیوەندی سیاسیان لەگەڵ وڵاتێکی دراوسێدا هەیە، بە لەبەرچاوگرتنی ئەوەی ئەو لایەنانە پەیوەندییە ئابورییە نزیکەکانی نێوان واشنتۆن و هەولێر وەک "خاڵێکی لاواز" دەبینن کە ناوچەکە دەکاتە ئامانجێکی ئاسان.
ڕۆژنامەکە لە زاری ڕەمزی موریدینی دامەزرێنەری سەنتەری جیۆپۆل بۆ لێکۆڵینەوەی مەترسی جیۆپۆلیتیکی بڵاویکردەوە، کە هێرشەکە تەنها چەند ڕۆژێک پێش کردنەوەی بینای نوێی کونسوڵخانەی ئەمریکا لە هەولێر ئەنجامدراوە و دەشڵێت: ڕوون و ئاشکرایە کە ئێرانییەکان بەدواداچوونیان بۆ ئەم پێشهاتە کردووە و هەوڵیانداوە پەیامێک بۆ واشنتۆن بنێرن کە ئەو کاریگەرییەی لە ناوخۆی عێراق هەیانە، توانای ئەوەی هەیە بەرژەوەندییەکانی ئەمریکا و هاوپەیمانەکانی بکاتە ئامانج لە ئەگەری هەرجۆرە پەرەسەندنێکی دۆخەکە.
لە ڕاپۆرتەکەدا ئاماژە بەوەکراوە کە گرژییە سیاسییەکانی نێوان بەغدا و هەولێر بەتایبەتی ناکۆکی لەسەر سەرچاوەکان و داهاتی نەوت و گاز، ڕەنگە هۆکارێکی پاڵنەری زیادەبن لە پشت ئەم جۆرە هێرشەوە.
ڕۆژنامەی نیویۆرک تایمز هەروەها ئاشکرایکردووە، بەرپرسانی هەرێمی کوردستان داوایان لە ئەمریکا و بەریتانیا کردووە سیستەمی بەرگری ئاسمانییان بۆ دابین بکەن بۆ پاراستنی ژێرخانی ئابووری، بەڵام بەهۆی نەبوونی ڕەزامەندی حکومەتی فیدراڵی لە بەغدا، کە دەسەڵاتی کۆتایی لە هەر کڕینێکی چەکدا هەیە، داواکارییەکە ڕەتکرایەوە.
لە ڕاپۆرتەکەدا ئاماژەی بەوەشکردووە، ئەو گروپە چەکدارانەی کە لە ناوخۆی عێراقدا کاردەکەن، هەرچەندە هەندێکیان تاڕادەیەک سەربەخۆیی داراییان بەدەستهێناوە، بەڵام هێشتا لەڕووی سیاسییەوە پەیوەستن بە وڵاتێکی دراوسێیەوە، و سەرکەوتوو بوون لە چەسپاندنی ئامادەیی خۆیان لەناو پرۆسەی سیاسیدا.
ڕۆژنامەکە دووپاتی کردەوە کە ئەمریکا تادێت فشار دەخاتە سەر حکومەتی عێراق بۆ چەکداماڵینی ئەو گروپانە، بەڵام جێبەجێکردنی ئەو داواکارییانە بە لەبەرچاوگرتنی کورسی پەرلەمانی و نفوزی دامەزراوەیییان لەناو سیستمی سیاسی عێراقدا، لەڕادەبەدەر قورسە.