بڕیارە ئەمڕۆ هەینی، شاندێکی باڵای ئەمنیی عێڕاق کە پێکهاتوون لە عەبدولئەمیر شەمەری، وەزیری ناوخۆی عێراق و حەمید شاتری، سەرۆکی دەزگای هەواڵگری عێراق و بەیاوەری ڕێبەر ئەحمەد، وەزیری ناوخۆی هەرێمی کوردستان سەردانی پارێزگای سلێمانی بکەن، ئەمەش لە چوارچێوەی هەوڵەکان بۆ پتەوکردنی هەماهەنگی ئەمنی نێوان حکومەتی فیدراڵی و هەرێم.
هەر ئەمڕۆش بڕیارە شاندەکە بچنە کێڵگەی غازی کۆرمۆر و لە نزیکەوە بەدواداچون بۆ دۆخەکە و لێکۆڵینەوەکان بکەن.
هەروەها بەشێکی دیکەی سەردانەکە پەیوەست بە هەماهەنگییەکانی نێوان هێزەکانی پێشمەرگە و سوپای عێراق و چۆنیەتی دۆزینەوەی میکانیزمی گونجاو بۆ رێگریکردن لە ئەگەری دوبارەبونەوەی ئەو هێرشانە.
شەوی 26ی 11، کێڵگەی غازی کۆرمۆر لە قەزای چەمچەماڵ لەلایەن "فڕۆکە بێفڕۆکەوانەکانەوە" هێرش کرایەسەر بەهۆیەوە ئاگر لە یەکێک لە کێڵگەکان کەوتەوە، بەبێ ئەوەی هیچ زیانێکی مرۆیی لێبکەوێتەوە، لەکاتێکدا کێڵگەکە زیانی ماددی بەرکەوتوو بووە هۆی کەمبوونەوەی پێدانی بڕی کارەبای نیشتیمانی لە هەرێمی کوردستان.