رۆژی دووشەممە، 24ـی تشرینی دووەمی 2025، سەرکەوت کاڕەش، بەڕێوەبەری راگەیاندنی بەرگریی شارستانیی هەرێمی کوردستان لە لێدوانێکدا رایگەیاند: "لە سەرەتای ئەمساڵەوە 61 هاوڵاتی لە هەرێمی کوردستان لە ئاودا خنکاون کە زۆرترینیان لە هەولێر و کەمترینیان لە هەڵەبجە بووە."
بە گوتەی سەرکەوت کاڕەش، لەناو خنکاوانی ئەمساڵدا تەرمی دوو کەس تا ئێستا نەدۆزراوەتەوە، کە یەکێکیان ئاڤێستایە و ئەوی دیکەش منداڵێکە، هۆکارەکەشی هەڵکەوتەی جوگرافیی و سەختی بەشێک لە شوێنەکانە بەهۆی بوونی ئەشکەوت و کون و کەلەبەر لەناو ئاوەکاندا.
ئاماژە بەوەشدەکات، هەر ئەم ساڵ 117 کەسیان لە خنکان رزگارکردووە. دەشڵێت، لە هەوڵی بەردەوامی هۆشیارکردنەوەی هاوڵاتییاندان بە مەبەستی کەمکردنەوەی رووداوەکانی خنکان لەڕێگە جیاوازەکانی وەک، هەڵواسینی رێنمایی و بوونی تیمەکانی بەرگریی لە زۆربەی شوێن و رووداوەکان.
ئاماری رووداوەکانی خنکان لە هەرێمی کوردستان بەم جۆرەیە:
پارێزگای هەولێر؛ 21 کەس
پارێزگای سلێمانی؛ 3 کەس
پارێزگای دهۆک؛ 5 کەس
پارێزگای هەڵەبجە؛ 2 کەس
ئیدارەی سەربەخۆی زاخۆ؛ 8 کەس
ئیدارەی سەربەخۆی سۆران؛ 10 کەس
ئیدارەی سەربەخۆی راپەڕین؛ 2 کەس
ئیدارەی گەرمیان؛ 2 کەس
قەزای ئاکرێ؛ 8 کەس