دەربارەی هێرشە چەکدارییەکەی ڕۆژی ڕابردوو کە هێزەکانی دەسەڵاتی کاتیی دیمەشق کردیانە سەر گوندی غانم عەلی لە ڕۆژهەڵاتی پارێزگای ڕەقە، هێزەکانی سووریای دیموکرات – هەسەدە ڕاگەیەندراوێکی بڵاوکردەوە.
دەقی ڕاگەیەندراوەكەی هەسەدە بەمجۆرەیە:-
لە چوارچێوەی هێرشێکی دیکە، کە ڕەنگدانەوەی پاشاگەردانی و بێدیسپلینی هەندێک لە گرووپە چەکدارەکانی سەر بە حکومەتی دیمەشقە، هێزەکانمان لە میحوەری گوندی غانم عەلی لە ڕۆژهەڵاتی ڕەقە، کەوتنە بەر هێرشێکی ترسنۆکانە و خیانەتکارانە، کە تێیدا فڕۆکەی بێفڕۆکەوانی خۆکوژ و چەکی قورسیان بە شێوەیەکی هەڕەمەکی بەکارهێنا، بەبێ ئەوەی هیچ ڕەچاوی سەلامەتی هاوڵاتیانی مەدەنی و سەقامگیری ناوچەکەش بکەن.
هێزەکانمان زۆر بەرپرسیارانە وەڵامی ئەم هێرشەیان دایەوە، لە ئەنجامی پێکدادانەکان سێ ئەنداممان بە سوکی برینداربوون و لەناو ڕیزەكانی چەکدارەکانی دەسەڵاتی كاتی دیمەشق زیانی گیانی هەبووە و ئەم ڕەفتارە بێباکانەیەش ئیرادەی ئەو لایەنانە پشتڕاست دەکاتەوە، بۆ ڕاکێشانی هەرێمەکە بۆ ناو گرژیی زیاتر و تێکدانی هەموو هەوڵەکان بۆ پاراستنی سەقامگیریی ناوچەکە.
ڕاشیدەگەیەنین، وەڵامدانەوەی هێزەکانمان لەگەڵ ئاست و سرووشتی هێرشەکەدا گونجاو بووە، لە هەمان کات بە تەواوی دانبەخۆداگرتن و بەرپرسیاریی مامەڵەمان کردووە، بۆئەوەی ململانێکان پەرەنەسێنن، بەڵام دووپاتی دەکەینەوە کە لە بەرانبەر هێرشە دووبارەکاندا بە بێدەنگی ڕاناوەستین، ئێمە وەڵامی ئەو جۆرە هێرشانە دەدەینەوە و ڕێوشوێنی گونجاو دەگرینەبەر بۆ پاراستنی گەلەکەمان و ناوچەکانمان و هێزەکانمان لە هەر هەڕەشەیەک.
داوا لەو لایەنانە دەکەین کە پشتیوانی ئەم گرووپە چەکدارییانە دەکەن، کە کۆنتڕۆڵیان بکەن و لە کارە نابەرپرسیارییەکانیان ڕایانبگرن، چونکە مەترسی ڕاستەوخۆ بۆ سەر ئاسایش و سەقامگیری لە سەرتاسەری ناوچەکەدا دروست دەکەن.