وەزارەتی پلاندانانی عێراق ڕایدەگەیەنێت، لەسەرەتای ساڵی نوێوە مەرجەکانی هاوردەکردنی ئۆتۆمبێل گۆڕانکاری بەسەردا دێت و مەرجەکانی حکومەتی عێراق تایبەت بە ئۆتۆمبێلی هاوردە جێبەجێ دەکرێت” كە بەو هۆیەوە هاورددەكردنی چەند جۆرێكی ئۆتۆمبێل قەدەغە دەكرێت و بەوهۆیەوە نرخی ئۆتۆمبێل بەرزدەبێتەوە.
فەیاز محەمەد عەبد، سەرۆکی دەزگای کۆنتڕۆڵی جۆری لە وەزارەتی پلاندانانی عێراق سەبارەت بە هاوردەکردنی ئۆتۆمبێل بۆ عێراق پلانێکی نوێی ئاشکرا کرد و ڕایگەیاند، لە دەستپێکی ساڵی نوێوە عێراق بەهیچ شێوەیەک رێگە نادات بە هاوردەکردنی ئۆتۆمبێلی بەکارهاتووی سووتاو و نووقمبوو، یان ئەو ئۆتۆمبێلانەی توشی ڕووداو و زیانی گەورە بووبێتەوە.
ئاماژەی بەوەکرد، پێویستە ئەو ئۆتۆمبێلانەی هاوردە دەکرێن لەگەڵ پێداویستییەکانی کەشوهەوای عێراق گونجاوبن و مەرجی ڕەنگ و جۆری ئۆتۆمبێل و وڵاتی بەرهەمهێن گرنگ نییە.
باسی لەوەشکرد، کاتێک بازرگانێک 1000 ئۆتۆمبێل هاوردەی عێراق دەکات، دەبێت هەموو زانیارییەکانی ئەو ئۆتۆمبێلانە لە سیستەمێکی تایبەت بە وەزارەتی پلاندانان تۆمار بکات.