میدیا ئیسرائیلییەکان ڕۆژی دووشەممە ڕایانگەیاند، کە لە ئەنجامی تەقەکردن لە یەکتربڕی نیشتەجێبوونی ڕامۆت لە نزیک قودس پێنج ئیسرائیلی کوژراون و 14ی دیکەش برینداربوون.
کەناڵی 12ی ئیسرائیل بڵاویکردەوە، هێزێکی زۆری سوپای ئیسرائیل بەپەلە گەیشتوونەتە شوێنی تەقەکردنەکە، هاوکات خزمەتگوزاری ئەمبولانسی ئیسرائیلیش ئاشکرایکردووە ژمارەیەک لەو بریندارانە باری تەندروستییان ناجێگیرە.
دواتر پۆلیسی ئیسرائیل بڵاویکردەوە "دوو چەکدار کە تەقەیان لە پاسێک کردووە لە قودس کوژراون و بەهۆیەوەش چەندین برینداری لێکەوتووەتەوەوە کە برینی هەندێکیان سەختن".
ڕادیۆی سوپای ئیسرائیل لە زاری دەزگای ئاسایشی شین بێتەوە ڕایگەیاندووە، لێکۆڵینەوەکان ئاماژەیان بەوە کردووە کە هێرشبەرەکان سواری پاسەکە بوون و تەقەیان کردووە. ڕادیۆکە ئاماژەی بەوەشکردووە، تاوانباران دانیشتووی قودسی ڕۆژهەڵات بوون.
لای خۆیەوە کەناڵی 12ی ئیسرائیل بڵاویکردەوە، ئەنجامدەرانی هێرشەکەی قودس لە گوندێکی شاری ڕامەڵڵا لە کەرتی ڕۆژئاواوە گەیشتوونەتە ئەو وڵاتە.
شایەتحاڵەکان دەڵێن یەکێک لە تاوانباران خۆی وەک پۆلیسی هاتوچۆ پۆشیوە و سواری پاسەکە بووە و لە مەودای خاڵی سپییەوە هێرشەکەی دەستپێکردووە.
دوای هێرشی تەقەکردنەکە گەمارۆیەکی ئەمنی سەپێندرا و سەرجەم دەروازەکانی چوونە ژوورەوە و دەرچوون بۆ قودس داخران، هەروەها دەروازەکانی نێوان کەناری ڕۆژئاوا و قودس داخران.
لەم چوارچێوەیەدا لیواکانی ئەلقودس، باڵی سەربازی بزووتنەوەی جیهادی ئیسلامی فەلەستین، لە بەیاننامەیەکدا وتی: "ئێمە پیرۆزبایی لەو ئۆپەراسیۆنە مەزنە دەکەین لە قودسی داگیرکراودا، وەڵامێکی سروشتی و ڕەوایە بۆ تاوانە بەردەوامەکانی دوژمنی زایۆنی دژی گەلی فەلەستینیمان لە کەناری ڕۆژئاوا و کەرتی غەززە و قودسی داگیرکراو."
لای خۆیەوە بزووتنەوەی حەماس لە بەیاننامەیەکدا ڕایگەیاندووە: پیرۆزبایی لەو ئۆپەراسیۆنە قارەمانانە و ناوازەیە دەکەین کە دوو چەکداری خۆڕاگری فەلەستینی لە یەکەی نیشتەجێبوونی ڕامۆت لە باکووری قودسی داگیرکراو ئەنجامیان دا. دووپاتی دەکەینەوە کە ئەم ئۆپەراسیۆنە وەڵامێکی سروشتییە بۆ تاوانەکانی داگیرکەری و شەڕی قڕکردن کە دژی گەلەکەمان ئەنجامی دەدات. پەیامێکی ڕوونە کە پلانەکانی بۆ داگیرکردن و لەناوبردنی شاری غەززە و وێرانکردنی شاری غەززە مزگەوتی ئەقسا بێ سزا نابێت.
ئاماژەی بەوەشکرد، "ئێمە بەهایەکی زۆر بە خۆڕاگری و خۆڕاگری گەنجانمان لە کەناری ڕۆژئاوای داگیرکراودا دەدەین، داواش لە جەماوەری گەلە خۆڕاگرەکەمان دەکەین کە پێکدادانەکان لەگەڵ داگیرکەر و دانیشتووانەکەی پەرەپێبدەن، هەروەها تەحەدای سوپای تاوانکارییەکەی و ڕێوشوێنە ئەمنی و سەربازییەکانی بکەین، بۆ پشتیوانیکردن لە گەلەکەمان و شوێنە پیرۆزەکانمان، هەروەها مافی ئازادی و ڕزگاربوونمان لە داگیرکارییەکان دووپات بکەینەوە".