میدیاکانی ئێران ڕۆژی شەممە ڕایانگەیاند، هێزەکانی ئیتلاعاتی ئێران بە تۆمەتی سیخوڕی بۆ ئیسرائیل پێنج کەسیان دەستگیرکردووە، ئەم دەستگیرکردنانە لە کاتێکدایە کە ئاڵوگۆڕی تەقە لە نێوان ئێران و ئیسرائیل بەردەوامە، دوای ئەوەی ئیسرائیل لە ڕۆژی هەینیدا گەورەترین هێرشی ئاسمانی بۆ سەر دوژمنە سەرسەختەکەی دەستپێکرد، لە هەوڵێکدا بۆ ڕێگریکردن لە پەرەپێدانی چەکی ئەتۆمی.
ڕۆژی هەینی، مۆسادی ئیسرائیل گرتەیەکی ڤیدیۆیی بڵاوکردەوە کە بوونی بریکارەکانی لە ناوخۆی ئێراندا بەڵگەی لەسەرە، کە بنکەیەکیان بۆ فڕۆکەی بێفڕۆکەوانی تەقینەوە لە ناوخۆی وڵاتدا دانابوو.
سەرچاوەیەکی ئەمنی ئیسرائیل ئۆپەراسیۆنی مۆسادی بە ناوازە وەسف کرد لە ڕووی پانتاییەوە، لەگەڵ پیشەسازییە سەربازییەکانی ئیسرائیل و مۆساد و ئەمنی ئیسرائیل بەشدارییان لە جێبەجێکردنیدا کردووە.
بە وتەی ئەو سەرچاوەیە، ئۆپەراسیۆنەکە لەسەر بنەمای چەندین ساڵ پلاندانان و کۆکردنەوەی زانیاری هەواڵگری بووە، هاوکات لەگەڵ جێگیرکردنی پێشوەختەی تواناکان لە ناوخۆی ئێراندا. باسی لە سێ ئۆپەراسیۆنی مۆساد لە ناوخۆی ئێران کرد کە هاوکات بوون لەگەڵ هێرشە ئاسمانییەکە.
ئاشکراشی کرد کە بریکارەکانی مۆساد بنکەیەکیان بۆ فڕۆکەی بێفڕۆکەوانی تەقینەوە لە نزیک تارانی پایتەخت دامەزراندووە و جەختی لەوە کردەوە کە ئۆپەراسیۆنەکە پێویستی بە بیرکردنەوەی داهێنەرانە و پلاندانانی بوێرانە و جێبەجێکردنی وردی تەکنەلۆژیای پێشکەوتوو هەیە، لەگەڵ بەشداریکردنی هێزە تایبەتەکان و بریکارەکان کە لە قووڵایی ناوخۆی ئێراندا کاردەکەن، کە لەلایەن دەزگا هەواڵگرییەکانی ئێرانەوە دەستنیشان نەکراون.