ئەمڕۆ هەینی 9ی ئایاری 2025 لە بەیاننامەیەکدا کە لە ماڵپەڕی وەزارەتی دەرەوەی ئێران بڵاوکراوەتەوە هاتووە، ڕۆژی شەممە عەباس عێراقچی وەزیری دەرەوەی ئێران سەرەتا سەردانی ڕیاز دەکات "بۆ دیدار و دانوستان لەگەڵ بەرپرسانی باڵای سعودیە"، پاشان بۆ دەوحە "بۆ بەشداریکردن لە کۆنفرانسی دیالۆگی عەرەبی و ئێران".
بڕیارە هەفتەی داهاتوو ترەمپ گەشتێکی بۆ وڵاتانی سعودیە و قەتەر و ئیمارات بکات ، لە 13 تا 16ی ئایار، ئەمە یەکەم گەشتی دەبێت بۆ دەرەوەی ئەمریکا لە خولی دووەمی سەرۆکایەتیدا. هەروەها سەردانێکی کورتی بۆ ڕۆما ئەنجامدا بۆ بەشداریکردن لە پرسەی پاپا فرانسیس .
پێشتر ترەمپ ڕایگەیاندبوو، پێش سەردانەکەی بۆ ڕۆژهەڵاتی ناوەڕاست لەم مانگەدا "ڕاگەیاندنێکی زۆر گەورە" دەبێت .
ترەمپ لە میانی چاوپێکەوتنەکەیدا لەگەڵ مارک کارنی سەرۆکوەزیرانی کەنەدا لە کۆشکی سپی زیادیکرد، "ئەمە یەکێک دەبێت لە گرنگترین ڕاگەیاندنەکانی ساڵانی ڕابردوو لەسەر پرسێکی دیاریکراو".