وەزارەتی دەرەوەی ئێران ڕۆژی پێنجشەممە (١ی ئایاری ٢٠٢٥) گەمارۆ نوێیەکانی ئەمریکای بەسەر ژمارەیەک قەوارەی ئێران و وڵاتانی دیکەدا ئیدانە کرد و بە پێشێلکارییەکی ئاشکرای یاسا نێودەوڵەتییەکانی ناوبرد. ئەمەش چەند ڕۆژێک پێش دەستپێکردنی خولی نوێی دانوستانە ئەتۆمییەکان دێت کە بڕیارە شەممەی داهاتوو لە ڕۆمای پایتەختی ئیتاڵیا بەڕێوەبچێت.
ئیسماعیل باغایی وتەبێژی وەزارەتی دەرەوەی ئێران لە بەیاننامەیەکی ڕۆژنامەوانیدا ، ڕایگەیاندووە، سزاکانی ئەم دواییەی ئەمریکا نوێنەرایەتی "بەڵگەیەکی زیاتر دەکەن لەسەر هەڵسوکەوتی دژبەیەکانەی بڕیاردەرانی ئەمریکا و هەوڵێکی بە ئەنقەست بۆ ڕێگریکردن لە هاوکارییە ئابوورییەکانی نێوان وڵاتان". ناوبراو جەختی کرد: تاران بە پێشێلکارییەکی ئاشکرای یاسا نێونەتەوەیی و دەسدرێژکارییەکی بەردەوام بۆ سەر خەڵکی ئێران دەڕوانێت.
وەزارەتی دەرەوەی ئەمریکا ڕۆژی چوارشەممە سەپاندنی سزای بەسەر حەوت قەوارەی ئێران، تورکیا و ئیمارات و هەروەها دوو کەشتی ڕاگەیاند، بەهۆی ئەوەی کە بە تێوەگلانیان لە بازرگانی نایاسایی بە نەوت و بەرهەمە پترۆکیمیاییەکانی ئێران وەسفی کرد.
مارکۆ ڕوبیۆ، وەزیری دەرەوەی ئەمریکا ڕوونیکردەوە کە "ئەم هەنگاوە چوار فرۆشیار و یەک کڕیاری بەرهەمە پترۆکیمیاییەکان بە بەهای سەدان ملیۆن دۆلار لەخۆدەگرێت"، جەختی لەسەر "پابەندبوونی واشنتۆن بۆ گەیشتن بە سفر هەناردەکردنی نایاسایی ئێران، لەوانەش ئەوانەن کە بۆ چین رەوانە دەکرێت".
ئەم پێشهاتانە لە کاتێکی هەستیاردایە لە پەیوەندییەکانی نێوان تاران و واشنتۆن، لە کاتێکدا هەردوولا ئامادەکاری دەکەن بۆ چوونە ناو خولێکی نوێی دانوستان لە نێوان ئاماژەکانی پەرەسەندنی گرژییە سیاسی و دیپلۆماسییەکان.