لە بەرامبەر بڕیارەکەی دۆناڵد ترەمپ بۆ بەرزکردنەوەی باج لەسەر کاڵا چینییەکان، پەکین باجی لەسەر هاوردەی ئەمریکا بۆ سەدا ١٢٥ بەرزکردەوە. ئەمەش کاردانەوەی شەڕێکی بازرگانی زیاد دەکات کە هەڕەشەی ناسەقامگیری زنجیرەکانی دابینکردنی جیهانی دەکات.
ئەم زیادبوونە دوای ئەوە دێت کە کۆشکی سپی بەردەوام بوو لە گوشارەکانی لەسەر دووەم گەورەترین ئابوری جیهان و دووەم گەورەترین سەرچاوەی هاوردەکردنی ئەمریکا بە سەپاندنی باجی زیادە بەسەریدا، دوای ئەوەی زۆربەی ئەو باجانەی "بەرامبەر"ی بەسەر دەیان وڵاتی دیکەدا سەپێنرابوو، هەڵپەساردبوو.
وەزارەتی ئابوری چین لە بەیاننامەیەکدا ڕایگەیاندووە، "سەپاندنی باجی نائاسایی لەلایەن ئەمریکاوە بەسەر چیندا، بەشێوەیەکی جددی پێشێلکردنی ڕێساکانی بازرگانی و ئابووریی نێودەوڵەتی، یاسا بنەڕەتییە ئابوورییەکان و عەقڵی ساغە و تەنیا چەوساندنەوە و زۆرەملێی یەکلایەنە پێکدەهێنێت".
دوابەدوای بەرزکردنەوەی باجەکان، وەزارەتی بازرگانی چین ڕایگەیاند، چین "رێوشوێنی بەرپەرچدانەوەی یەکلاکەرەوە" دەگرێتەبەر و "تا کۆتایی شەڕ دەکات" ئەگەر ئەمریکا بەردەوام بێت لە "بەردەوامبوون لە پێشێلکردنی بنەڕەتی بەرژەوەندییەکانی".
وەزارەتەکە زیادی کرد: ئەگەر ئەمریکا بەردەوام بێت لە سەپاندنی باجی زیادە بەسەر ئەو کاڵا چینیانەی کە هەناردەی بۆ دەکرێت، چین پشتگوێی دەخات. لە بەیاننامەکەدا هاتووە: "سەپاندنی دووبارەی باجی بەرزی نائاسایی لەلایەن ئەمریکاوە بەسەر چیندا، بووەتە یارییەکی تەنها ژمارەکان و هیچ گرنگییەکی ئابووریی پراکتیکی نییە".
چین داوا لە ئەمریکا دەکات "هەنگاوێکی گەورە بەرەو پێشەوە بنێت لە لابردنی ئەوەی پێی دەوترێت باجی بەرامبەر و بە تەواوی پراکتیزە هەڵەکانی خۆی ڕاست بکاتەوە".
هەروەها نوێنەرایەتی چین لە ڕێکخراوی بازرگانی جیهانی ڕۆژی هەینی ڕایگەیاندکە سکاڵایەکی زیادەی لە ڕێکخراوی بازرگانی جیهانی سەبارەت بە باجەکانی ئەمریکا تۆمار کردووە.
لە بەیاننامەکەی نوێنەرایەتی چین بە پشتبەستن بە وتەبێژی وەزارەتی بازرگانی، ئاماژە بەوە کراوە کە "لە 10ی نیساندا ئەمریکا فەرمانی جێبەجێکردنی دەرکرد کە زیادکردنی زیاتری بەناو 'باجی بەرامبەر' لەسەر بەرهەمە چینییەکان ڕاگەیاند. چین سکاڵای لە ڕێکخراوی بازرگانی جیهانی تۆمارکردووە دژی دوایین ڕێوشوێنی گومرگی ئەمریکا".