وەزارەتەکە لە بەیاننامیەکدا دەڵێت: لە چوارچێوەی قۆناغی یەکەمی ئاگربەستی نێوان ئیسرائیل و حەمماس، حکومەتی ئیسرائیل رەزامەند بوە بە ئازادکردنی 735 زیندانیی و دەستبەسەرداگیراو لە زیندانییەکانمان.
ئاماژە بۆ ئەوەکراوە کە پرۆسەکە کاتژمێر 4:00ـی ئێوارەی سبەینێ یەکشەممە دەستپێدەکات، کە ئەوکاتەیە دیاریکراوە بۆ دەستپێکردنی ئاگربەستی نێوانیان.
بەپێی زانیارییەکانی وەزارەتەکە لەو لیستەی ئیسرائیل ئامادەی کردوە و بڕیارە ئازاد بکرێن، ناوی چەند ئەندامێکی بزوتنەوەی حەمماس و جیهاد و فەتتح،ی تێدایە، کە بەشێکیان بە زیندانی هەتا هەتایی سزادراون و تۆمەتبارن بە کەیسی کوشتن.
لەنێوان ئەو کەسانەی ئازاد دەکرێن، زەکەریا زوبەیدی هەیە کە سەرکردەی پێشوی کەتیبەی شوهەدای ئەقسایە کە باڵی چەکداریی جوڵانەوەی فەتحە، پێشتر لە ساڵی 2021 هەوڵی هەڵاتنی لە زیندانەکانی ئیسرائیل دابو، بەڵام دەستگیر کرایەوە.
لەئێستادا ژمارەی بارمتە فەڵەستینییەکانی ژێردەستی ئیسرائیل ژمارەیان 10,400 کەسە، کە 5 هەزار و 250یان پێش روداوەکانی ئۆکتۆبەر دەستگیر کراون و لەدوای 7ـی ئۆکتۆبەری ساڵی رابردوشەوە 53 بارمتە لەژێردەستی ئیسرائیل گیانیان لەدەستداوە.