مەتین مورادی، خوێندکاری زانکۆی کوردستان لە سنە، لە بواری هونەری تەلارسازی، خەڵاتی بڕوانامەى زێڕینى لە پێشبڕکێی گۆڵدن ترێزینی بردەوە، کە خەڵاتێکى جیهانییە و لە روسیا دابەشدەکرێت.
مەتین مورادی، خوێندکاری دوایین قۆناغی ماستەرە لە بواری دیزاینی شار لە زانکۆی کوردستان لە سنەی رۆژهەڵاتی کوردستان، خەڵاتەکەی لە بواری دیزاینی دوو پرۆژە بە ناوەکانی وارخان و باوان بردووەتەوە.
لە پێشبڕکێکەدا نوێنەرانی 33 وڵات بە دروشمی تەلارسازی وەکو هونەری بنیاتنان نەک وێرانکردن ئامادەبوون، خەڵاتى بڕوانامەى زێڕین لە ساڵی 2018ـەوە بەناوی ئەندازیاری رووسی دۆمێنیکۆ ترێزین پێشکەشدەکرێت، کە یەکەم ئەندازیارى شاری سانت پترسبۆرگی روسیا بووە و رێکخراوێکى سەربەخۆ سەرپەرشتى خەڵاتەکە دەکات و ساڵانە بەو ئەندازیارانەی دەدات کە لە بوارە جیاوازەکانی تەلارسازی و هونەرەکانی تەلارسازی داهێنان دەکەن.